كەشە ءماجىلىس وتىرىسىندا دەپۋتات ارداق نازاروۆ رەسمي ءسوزىن باستاماي تۇرىپ، اناسىنىڭ تۋعان كۇنى ەكەنىن ايتىپ، مىنبەردەن قۇتتىقتاۋ جولدادى. بۇل ارەكەت قوعامدا قىزۋ تالقىعا ءتۇسىپ، ءتۇرلى پىكىرلەر ايتىلۋدا.

ءماجىلىس – ەلىمىزدىڭ ەڭ باستى زاڭ شىعارۋشى ورگانى. مۇندا ايتىلاتىن ءاربىر ءسوز، كوتەرىلەتىن ءار ماسەلە حالىقتىڭ مۇددەسىنە ساي بولۋى ءتيىس. ەندى ونىڭ سالماعى ءتىپتى ارتپاق. ال قازىرگى ماجىلىستە كاسىبي، ءبىلىمى مەن بىلىگى جەتكىلىكتى دەپۋتاتتاردىڭ قاتارىندا ءارتۇرلى ادامدار ءجۇر. سولاردىڭ قاتارىندا، ارداق نازاروۆتىڭ سوڭعى ارەكەتتەرى قوعامنىڭ سىنىنا ءجيى ىلىگۋدە.

Abai.kz وقىرماندارىنىڭ تالقىسىنا بەلگىلى جۋرناليست كامشات تاسبولاتتىڭ پىكىرىن ۇسىنعاندى ءجون كوردىك...

سۋرەت: anatili.kazgazeta.kz سايتىنان الىندى.

كامشات تاسبولات:

– نەگىزى كۇلەتىن ەمەس، جىلايتىن جاعداي. ەۋروپادا نە امەريكادا بەلگىلى ءبىر اۋداندا اتىس-شابىس، قىز زورلاپ، ادام ولىمىمەن اياقتالعان جاعداي بولسا، قىلمىسكەردى ءىزىن سۋىتپاي، تۇتقىندايتىن پوليتسيا مەن «breaking news» بەرەتىن جۋرناليستەرى بىلاي تۇرسىن، اكىمدىك وكىلدەرى مەن سايلانعان دەپۋتاتتارى ەل الدىنا شىعىپ، قوعامدىق قاۋىپسىزدىكتى ساقتاۋعا كەپىل بولاتىندارىن ايتىپ شىعادى. وكىنىشكە قاراي، تالعار دەسە شوشيتىن كۇيگە تۇستىك. كەگەن، رايىمبەك، ەڭبەكشىقازاق، ۇيعىر جانە تالعار اۋداندارىنان سايلانعان دەپۋتات ارداق نازاروۆ پارلامەنتتە دابىل قاعىپ، «تالعاردا قىز زورلاندى، كۇدىكتى جازاسىن الماي بوستاندىقتا قالعان سوڭ قىزدىڭ 30 جاستاعى اعاسىن ءولتىردى، 2 جاسار ءسابيدى ۇرلاپ كەتتى، ال ءسابي تابىلعاندا ونىڭ اۋزىنا شۇعىل وپەراتسيا قاجەت بولدى» دەدى مە؟ تالعاردان سايلانعان دەپۋتات رەتىندە بۇل ىسكە ارالاستى ما؟ بولماسا سۇمدىق جاعداي! قوعامدىق رەزونانس تا بولدى عوي. ءسابيدىڭ دەنساۋلىق جايى، پسيحولوگيالىق جاعدايى مەن وتباسىنىڭ كۇيى قانداي؟

وكىنىشكە قاراي دەپۋتات حالىقتان الىستاعان فرانتسۋز پاتشايىمى ماريا انتۋانەتتا سياقتى «حالىق اش بولسا، ءتاتتى ءبالىش جەسىن» دەگەندەي، ءوزىنىڭ اناسىن پارلامەنت تورىندە 70 جاسىمەن قۇتتىقتادى.

ال تالعاردا قىزى زورلانىپ، ۇلى ولتىرىلگەن انا كوز جاسىن توگىپ، كۇنى كەشە بالاسىن جەر قوينىنا تابىستادى. ال حالىقتان مۇنشالىقتى الىستاعان دەپۋتات بىزگە كەرەك پە؟

الماتى وبلىسىنا قوعامنىڭ تامىرىن باسىپ، ەلمەن ناقتى جۇمىس ىستەيتىن دەپۋتات اۋاداي كەرەك. ءوز باسىم مىقتى-مىقتى دەپۋتاتتاردى بىلەم، ءبىرى – ءبىلىم سالاسىندا جاقسى جۇمىس ىستەپ جاتىر، ءبىرى – مىقتى زاڭگەر، جاقسى زاڭ جازادى، ءبىرى – جەر داۋىن كۇشتى شەشەدى… ال سپورتشى دەپۋتات شە؟ وسىعان دەيىن ونىڭ اتى تەك كۇلكىلى مالىمدەمەلەرمەن بايلانىستى بولمادى ما؟ بۇل قازىرگى بيلىكتىڭ دە قادىرىن كەتىرىپ، حالىق سەنىمىنەن ايىراتىن ءجايت ەمەس پە؟ تالعاردا قاندى وقيعا بولىپ جاتىر، ال سەنىڭ باسقا ەمەس، ءدال وسىنداي ساتتە، ءبىر وتباسى عانا ەمەس، بۇكىل الماتى وبلىسى قارا جامىلىپ، قازاقستاندىقتار شوك بوپ وتىرعاندا پارلامەنتتى «سازدى سالەم» باعدارلاماسىنا اينالدىرعانىڭ ورىندى ما؟ پارلامەنتتىڭ رەگلامەنتى، دەپۋتات ەتيكاسى قايدا قالدى؟

ءبارىمىزدىڭ انامىز بار، بىراق اناڭدى قۇتتىقتاۋدىڭ ءوز ءجونى بار. ءدال قازىرگىدەي تالعاردا شەرزات ىسىنەن كەيىن بۇكىل قوعامدى ءدۇر سىلكىندىرگەن «قىز زورلاۋ، ادام ءولتىرۋ، ءسابي ۇرلاۋ، وعان قاستاندىق جاساۋ» قىلمىسى بوپ جاتقاندا، سونى ايتۋدىڭ ورنىنا «ولمەيتىن تاقىرىپتار» شەڭبەرىندە دەپۋتاتتىق ساۋال جولداۋ، قۇتتىقتاۋ ايتۋ تەك ورىنسىز عانا ەمەس، قوعامنان الىستاۋدىڭ، باسقا پلانەتادا ءومىر ءسۇرۋدىڭ بەلگىسى ەمەس پە؟ بۇل بارشاعا ساباق بولۋى كەرەك. بۇل ءدال قازىرگىدەي قاندى جاعدايدان كەيىن ايتىلاتىن قۇتتىقتاۋ ەمەس. كوڭىل ايتاتىن كەز بۇل…

Abai.kz