قازاقستانداعى اپاتتى ۇيلەردىڭ دەنى قاي وبلىستا ورنالاسقانى انىقتالدى

مۇنداي مالىمەتتى ونەركاسىپ جانە قۇرىلىس مينيسترلىگى تاراتتى. ۆەدومستۆو ەلدەگى اپاتتى جاعدايداعى ۇيلەردىڭ سانىنا دا توقتالىپ ءوتتى.

مينيسترلىك اتالعان دەرەكتى وبلىستاردان العان. ءدال قازىرگى ۋاقىتتا قازاقستانداعى اپاتتى جاعدايداعى ۇيلەردىڭ سانى – 1031. بۇلار كوپپاتەرلى تۇرعىن ۇيگە جاتادى. وكىنىشتىسى، ادامداردىڭ تۇرۋىنا قاۋىپتى ۇيلەردىڭ كوبى 2 قالا مەن 1 وبلىستا تىركەلگەن.

– ەڭ كوبى – اتىراۋ وبلىسىدا، وندا 217 كوپپاتەرلى اپاتتى تۇرعىن ءۇي بار، كەلەسى ورىندا استانا قالاسى تۇر (206 كوپپاتەرلى تۇرعىن ءۇي) جانە شىمكەنت قالاسىندا 108 كوپپاتەرلى ءۇي تىركەلگەن، – دەلىنگەن مينيسترلىكتىڭ اقپاراتىندا.

ءبىر قۋانىشتىسى، مەملەكەت باسشىسى قاسىم-جومارت توقاەۆتىڭ تاپسىرماسىنا ساي، 2029 جىلعا دەيىن وڭىرلەرگە اپاتتى جانە ەسكى تۇرعىن ءۇي قورىنىڭ 40 مىڭعا جۋىق مەنشىك يەلەرىن جاڭا تۇرعىن ۇيمەن قامتاماسىز ەتۋ كەرەك. قر ۇكىمەتىنىڭ 2022 جىلعى 23 قىركۇيەكتەگى №736 قاۋلىسىنا سايكەس، 2023-2029 جىلدارعا ارنالعان تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسى بەكىتىلگەن، ونىڭ اياسىندا وڭىرلەردە جوندەۋ باعدارلامالارى ىسكە اسىرىلىپ جاتىر.

تۇجىرىمدامانى ىسكە اسىرۋ جونىندەگى جۇمىستى كۇشەيتۋ، اپاتتى جانە ەسكى تۇرعىن ءۇي قورىنىڭ مەنشىك يەلەرىن تۇرعىن ۇيمەن قامتاماسىز ەتۋ قارقىنىن جەدەلدەتۋ جونىندە تۇبەگەيلى شارالارمەن جەرگىلىكتى اتقارۋشى ورگاندار اينالىسىپ جاتىر.

Abai.kz