استانادا قازاقستاننىڭ كولىك اپتالىعى اياسىندا كولىك-لوگيستيكا سالاسىنىڭ الەۋەتىن اشۋ ماسەلەلەرى تالقىلاندى.

وندا تەمىرجول، اۆتوموبيل، تەڭىز جانە اۆياتسيالىق كولىكتى دامىتۋعا، تسيفرلىق شەشىمدەردى ەنگىزۋگە، حالىقارالىق جۇك تاسىمالدارىنىڭ تيىمدىلىگىن ارتتىرۋعا جانە سالالىق كادرلاردى دايارلاۋعا نازار اۋدارىلدى.

شىعىس – باتىس، سولتۇستىك – وڭتۇستىك مارشرۋتتارىندا جانە ترانسكاسپي حالىقارالىق كولىك باعىتىندا مەملەكەتتەردىڭ ءوزارا ءىس-قيمىلىن نىعايتۋ شارالارى قارالدى. ءبىر الاڭعا 40-قا جۋىق ەلدىڭ سالالىق ساراپشىلارى جينالدى.

فورۋمعا ازەربايجان، ارمەنيا، اۋعانستان، بەلارۋس، گرۋزيا، يران، قىرعىزستان، پاكىستان، رەسەي، تۇرىكمەنستان، تۇركيا، وزبەكستان جانە چەحيا مەملەكەتتەرىنەن كولىك ۆەدومستۆولارى باسشىلىعى، سونداي-اق حالىقارالىق ۇيىمداردىڭ، ءىرى كولىك-لوگيستيكالىق كاسىپورىندار مەن ديپلوماتيالىق كورپۋستىڭ وكىلدەرى قاتىستى. 2026 جىلدىڭ 9 ايىنىڭ قورىتىندىسى بويىنشا كولىك سالاسىنىڭ ءوسۋى 7,2%-دى قۇرادى. سالا كوشباسشىلار قاتارىنا كىرەدى. دۇنيەجۇزىلىك بانكتىڭ باعالاۋى بويىنشا ينفراقۇرىلىمدىق ينۆەستيتسيالاردى ساۋدا راسىمدەرىن جەڭىلدەتۋمەن جانە شەكاراداعى كىدىرىستەردى قىسقارتۋمەن ۇشتاستىرۋ ەلدەردىڭ ءجىو-ءىن شامامەن 15%-عا ۇلعايتۋعا مۇمكىندىك بەرەدى.

قازاقستان پرەمەر-ءمينيسترى ولجاس بەكتەنوۆ كولىك-لوگيستيكا سالاسىنىڭ ءجىو قۇرىلىمىنداعى ماڭىزدىلىعىن جانە مەملەكەتتىڭ ونىڭ ەل ەكونوميكاسىنداعى ۇلەسىن ۇلعايتۋعا نيەتتى ەكەنىن اتاپ ءوتتى.

«قازاقستان پرەزيدەنتى قاسىم-جومارت كەمەلۇلى توقاەۆ ەلىمىزدىڭ كولىك-لوگيستيكا الەۋەتىن دامىتۋدى ستراتەگيالىق باسىمدىقتاردىڭ ءبىرى رەتىندە ايقىندادى. زاماناۋي كولىك ينفراقۇرىلىمى حالىقارالىق ساۋدانى كەڭەيتۋگە، ينۆەستيتسيالار تارتۋعا، جاڭا وندىرىستەر قۇرۋعا جانە مەملەكەتتەر اراسىنداعى ەكونوميكالىق بايلانىستاردى نىعايتۋعا ىقپال ەتەدى»، – دەپ اتاپ ءوتتى ولجاس بەكتەنوۆ.

قازاقستان كولىك ينفراقۇرىلىمىن دامىتۋ جونىندەگى اۋقىمدى باعدارلامانى جۇزەگە اسىرۋدا. كەيىنگى 7 جىلدا 36,3 مىڭ شاقىرىم اۆتوموبيل جولى سالىنىپ، جوندەلسە، 5 جىل ىشىندە 5 مىڭ شاقىرىم تەمىرجول سالىنىپ، جاڭعىرتىلدى. شەكارا ماڭىنداعى، تەڭىز جانە اۋەجاي ينفراقۇرىلىمى دامىپ كەلەدى. اۆياتسيالىق قاۋىپسىزدىك دەڭگەيى 95,7%-عا جەتكىزىلدى. وتكەن جىلدىڭ قورىتىندىسى بويىنشا قازاقستان ارقىلى وتەتىن ترانزيتتىك تاسىمال كولەمى 18%-عا ۇلعايىپ، 39,1 ملن تونناعا جەتتى. كولىك مينيسترلىگىنىڭ مالىمەتىنشە، 2035 جىلى تەڭىز پورتتارىنىڭ وتكىزۋ قابىلەتىن 4 ەسە، فلوت قۋاتىن 5 ەسە ارتتىرىپ، ترانزيتتىك تاسىمال كولەمىن جىلىنا 100 ملن تونناعا جەتكىزۋ جوسپارلانۋدا.

پرەمەر-مينيستر قاتىسۋشىلاردىڭ نازارىن حالىقارالىق لوگيستيكانى ۇيىمداستىرۋ تاسىلدەرىن جەتىلدىرۋ جانە شىعىس – باتىس، سولتۇستىك – وڭتۇستىك كولىك دالىزدەرىنىڭ، ترانسكاسپي باعىتى مەن بولاشاعى زور ترانساۋعان ءدالىزىنىڭ ءوزارا بايلانىسىن نىعايتۋ پەرسپەكتيۆالارىنا اۋداردى. مەملەكەتتەردىڭ بىرلەسكەن جۇمىسىنىڭ ماڭىزدى باعىتتارى – ينفراقۇرىلىمدى دامىتۋ، لوگيستيكانى تسيفرلاندىرۋ جانە تۇتاس ءترانزيتتى قامتاماسىز ەتۋ.

باسىمدىقتاردىڭ قاتارىندا ينفراقۇرىلىمدىق شەكتەۋلەر مەن اكىمشىلىك كەدەرگىلەردى جويۋ، «جاسىل دالىزدەردى» جانە «ءبىر تەرەزە» قاعيداتىن ەنگىزۋ بار، بۇل ترانسشەكارالىق تاسىمالداۋدى جەڭىلدەتۋگە، جۇكتەردى جەتكىزۋ مەرزىمدەرى مەن قۇنىن قىسقارتۋعا مۇمكىندىك بەرەدى. بىرلەسكەن ينۆەستيتسيالىق جانە ينفراقۇرىلىمدىق جوبالاردى جۇزەگە اسىرۋعا كوشۋدىڭ ماڭىزدىلىعى اتاپ ءوتىلدى.

Abai.kz