Ranking ساراپشىلارى وسىنداي بايلام جاساپتى. سوڭعى بىرنەشە جىلدا قازاقستاندا ەكونوميكالىق تەڭسىزدىك جاعدايى وڭالا قويعان جوق دەيدى ولار. بۇعان حالىقتىڭ ەڭ كەدەي 10%-ى مەن ەڭ اۋقاتتى 10%-ىنىڭ تابىسى بويىنشا جاسالعان ستاتيستيكالىق دەرەكتەر دالەل بولىپتى. 2019 جىلدان 2023 جىلدى قوسا العانعا دەيىن بۇل ەكى توپتىڭ تابىس الشاقتىعى 5,9-6 ەسە بولسا، وتكەن جىلى رەكوردتىق 6,2 ەسەگە جەتكەن.

ۇلتتىق ستاتيستيكا بيۋروسىنىڭ ماماندارى حالىقتىڭ تابىسىن ەسەپتەگەندە، بۇكىل حالىقتى دەتسيلدىك دەپ اتالاتىن 10 توپقا بولەدى. بۇل ورايدا كەدەيلەر قاتارىنا حالىقتىڭ ەڭ تومەنگى 10%-ىن عانا ەمەس، ودان كەيىنگى كەمىندە ءتورت توپتى دا قوسۋعا بولادى. بۇل توپتاردا جان باسىنا شاققان تابىس ءتىپتى 85 مىڭ تەڭگەنى قۇرايتىن ەڭ تومەنگى جالاقىعا دا جەتپەيدى. ەل بويىنشا بارلىق تابىستىڭ تەك 30,2%-ى عانا حالىقتىڭ وسى شارتتى جارتىسىنا تيەدى. "

قازاقستاندا كىرىستىڭ كوپ بولىگى ازعانتاي توپقا تيەسىلى. مىسالى، ەڭ اۋقاتتى 10% قازاقستاندىق ەلدەگى جالپى تابىستىڭ بىردەن تورتتەن ءبىرىن (24,1%) الادى. ۇسب دەرەكتەرىنە سۇيەنسەك، حالىقتىڭ وسى 10%-ىنا ايلىعى 181,3 مىڭ تەڭگەدەن 1,6 ميلليون تەڭگەگە دەيىن جەتەتىن جاندار كىرەدى. ايىرماشىلىق وتە ۇلكەن. شىنىمەن دە، 181,3 مىڭ تەڭگە الاتىن ادامدى «اۋقاتتى» دەۋگە بولا ما؟ وسى 10%-دىڭ ىشىندە ناعىز داۋلەتتىلەردىڭ ۇلەسى ۇلكەن ەمەس. اۋقاتتى ازاماتتاردىڭ شامامەن قانشا ەكەنىن انىقتاۋدىڭ تاعى ءبىر ءتاسىلى – بارلىق جالدامالى جۇمىسشىلاردى ايلىق كولەمىنە قاراي ءبولۋ. ماماندار جاساعان ەسەپ تەك جالدامالى جۇمىسشىلار اراسىنداعى ەكونوميكالىق ايىرماشىلىقتى كورسەتەدى. بۇل ستاتيستيكادا ءوزىن-ءوزى جۇمىسپەن قامتىعاندار مەن شاعىن كاسىپورىنداردا (قىزمەتكەرلەرى 100 ادامعا دەيىن) جۇمىس ىستەيتىندەر ەسكەرىلمەگەن", دەيدى ساراپشىلار.

ولاردىڭ پايىمداۋىنشا، ەڭ اۋقاتتى 10%-دىڭ ىشىندە ورتا تاپتىڭ ۇلەسى كوپ بولعاندىقتان، ولاردىڭ شىعىنى از قامتىلعانداردان اسا قاتتى ەرەكشەلەنبەيدى. مىسالى، ءبىرىنشى توقساندا ەكى توپ تا تۇتىنۋشىلىق شىعىندارىنىڭ كوپ بولىگىن ازىق-تۇلىككە جۇمساعان. از قامتىلعان وتباسىلار ءوز بيۋدجەتىنىڭ 60,6%-ىن تاماققا جاراتسا، ەڭ اۋقاتتى 10% بۇل ماقساتقا 51,7%-ىن جۇمساعان. ال ءومىر ءسۇرۋ دەڭگەيى الدەقايدا جوعارى ەۋروپا ەلدەرىندە ازىق-تۇلىككە جۇمسالاتىن شىعىن ۇلەسى نەبارى 8-12%-دى قۇرايدى. وسىدان-اق جاعدايىمىزدىڭ قانداي ەكەنىن شامالاي بەرۋگە بولاتىن سياقتى.

Abai.kz