«قازاقستان تەمىرجولى» ۇلتتىق كومپانياسى Kazinform ساۋالىنا جولداعان جاۋاپتا Wabtec كومپانياسىمەن اراداعى 4,2 ملرد دوللاردىڭ كەلىسىمى تۋرالى كەڭىرەك مالىمەت بەردى.

قازاقستان مينوريتارلىق اكتسيونەرلەر قاۋىمداستىعىنىڭ (QAMS) تەلەگرام-ارناسى قتج مەن Wabtec كومپانياسىنىڭ اراسىنداعى سوڭعى كەلىسىمنىڭ قازاقستان ءۇشىن تىم قىمباتقا تۇسەتىنىن، ءار لوكوموتيۆتىڭ قۇنى نارىقتاعى باعادان 2 ەسە قىمبات ەكەنى تۋرالى ساراپتاما جاريالاعان.

- ايتا كەتۋ كەرەك، الەۋمەتتىك جەلىلەردە 4 ملرد اقش دوللارىنا 300 بىرلىك جاڭا لوكوموتيۆ ساتىپ الىناتىنى تۋرالى اقپارات بەرىلگەن. 4 ملرد اقش دوللارى 300 بىرلىك لوكوموتيۆ ساتىپ الۋدى عانا ەمەس، سونىمەن قاتار قولدانىستاعى سەرۆيستىك شارتتى 2058 جىلعا دەيىنگى 15 جىل مەرزىمگە 405 بىرلىك لوكوموتيۆكە ۇزارتۋدى، سونداي-اق ساتىپ الىناتىن 300 بىرلىك لوكوموتيۆكە 2054 جىلعا دەيىنگى 18 جىل مەرزىمگە تولىق سەرۆيستىك قىزمەت كورسەتۋدى ۇيىمداستىرۋدى قامتيدى، - دەپ جازىلعان رەسمي جاۋاپتا.

اتالعان كەلىسىم اياسىندا Wabtec ەسەبىنەن KinetiX جۇيەسىنىڭ 5 جيىنتىعىن جوندەۋ كوزدەلگەن. ناقتى ايتساق، جىلجىمالى قۇرامدى ەسەپكە الۋ، باقىلاۋ جانە دياگنوستيكالاۋدىڭ تسيفرلىق جۇيەسىن جەتكىزۋ، ءۇش جىل ىشىندە 505 بىرلىك لوكوموتيۆتىڭ تەجەگىش تسيليندرلەرى مەن كومپرەسسورلارىن كۇردەلى جوندەۋ جوسپارلانىپ وتىر.

- سونداي-اق، كوممەرتسيالىق جانە الەۋمەتتىك تۇرعىدا قتج ءۇشىن ۇلكەن ارتىقشىلىقتارعا قول جەتكىزىلدى. سەرۆيستىك ورتالىقتارى بار شالعاي وڭىرلەردە ورنالاسقان قىزمەتكەرلەر ءۇشىن الەۋمەتتىك نىساندار سالۋ كوزدەلگەن، - دەپ جازادى قتج ءباسپاسوز قىزمەتى.

ەسكە سالساق، مەملەكەت باسشىسى قاسىم-جومارت توقاەۆتىڭ نيۋ-يورك قالاسىنا رەسمي ساپارى اياسىندا اقش ساۋدا ءمينيسترى گوۆارد لاتنيكتىڭ قاتىسۋىمەن امەريكالىق Wabtec كومپانياسىمەن جالپى سوماسى 4,2 ميلليارد دوللار بولاتىن كەلىسىمگە قول قويۋ ءراسىمى وتكەن ەدى.

Abai.kz