ازەربايجان ورتالىق ازيادان حالىقارالىق نارىقتارعا ەنەرگورەسۋرستار ترانزيتىندە ماڭىزدى ءرول اتقارادى.

ەل اۋماعى ارقىلى تۇرىكمەنستان مەن قازاقستاننان مۇناي تاسىمالدانادى جانە بۇل تاسىمال كولەمى ارتىپ كەلەدى. بۇل تۋرالى تۇركىمەنباشى قالاسىندا وتكەن ازەربايجان مەن ورتالىق ازيا مەملەكەت باسشىلارىنىڭ 8-ءشى كونسۋلتاتيۆتىك كەزدەسۋىندە پرەزيدەنت اليەۆ مالىمدەدى. سونىمەن قاتار ول باكۋدىڭ قازاقستان جانە وزبەكستانمەن بىرلەسىپ، جاسىل ەنەرگەتيكالىق ءدالىز قۇرۋ بويىنشا جۇمىس جۇرگىزىپ جاتقانىن ايتتى.

مەملەكەت باسشىسىنىڭ سوزىنشە، وتكەن جىلى ازەربايجاننىڭ ورتالىق ازيا ەلدەرىمەن تاۋار اينالىمى 50%-دان استام وسكەن. ول ەلدە ورتالىق ازيا كاپيتالى بار 400-دەن استام كومپانيا بەلسەندى جۇمىس ىستەپ جاتقانىن اتاپ ءوتىپ، ازەربايجاننىڭ قازاقستان، وزبەكستان جانە قىرعىزستانمەن بىرلەسكەن ينۆەستيتسيالىق قورلارى بار ەكەنىن ەسكە سالدى.

پرەزيدەنت ورتالىق ازيا مەن ازەربايجان ىنتىماقتاستىعىنىڭ باستى باعىتتارىنىڭ ءبىرى كولىك سالاسى ەكەنىن دە قوسا ايتتى: «بۇگىندە كاسپي تەڭىزى ەلدەرىمىزدىڭ كولىكتىك ءوزارا ىقپالداستىعىندا بارعان سايىن ماڭىزدى ءرول اتقارىپ كەلەدى. كاسپيدىڭ قوس جاعالاۋىنداعى كولىك ينفراقۇرىلىمى ورتالىق ازيانى ازەربايجانمەن، ارى قاراي حالىقارالىق نارىقتارمەن بايلانىستىرۋدا ايرىقشا مانگە يە». ول قازىرگى تاڭدا كاسپي ارقىلى تاسىمالداۋ كولەمىنىڭ ايتارلىقتاي وسكەنى بايقالاتىنىن اتاپ ءوتتى.

سونداي-اق اليەۆ بەيبىتشىلىك، قاۋىپسىزدىك، ساياسي ءارى ەكونوميكالىق تۇراقتىلىق ورتالىق ازيا ەلدەرى مەن ازەربايجاننىڭ تابىستى دامۋىنىڭ نەگىزى بولىپ تابىلاتىنىن باسا ايتتى.

Abai.kz