وسى كۇنى نەكەلەسۋ كەزىندە ءماحىر سۇراۋ دەگەن ءۇردىس ءورىس الىپ بارادى. قازاق سالتىندا جوق بۇل كورىنىس شاريعات زاڭى بويىنشا ايەلدىڭ قۇقىن قورعاۋ ءۇشىن ويلاستىرىلعان شارت دەيدى. ءماحىر ايەلدىڭ بولىسكە تۇسپەيتىن جەكە مەنشىگى كورىنەدى. ءوزى تابىس تاپپايتىن مۇسىلمان ايەلدەرى زايىبىنان اجىراسا قالعان كۇندە ماحىرگە العان مۇلىگىن وزىمەن الا كەتەدى ەكەن.

ايەل ەركىندىگى شەكتەلمەگەن قازىرگى زاماندا بۇل قانشالىقتى وزەكتى؟ تەك جامان پيعىلعا، اشكوزدىككە جول اشپاي ما؟

قازاق وتاۋ قۇرۋدىڭ ءمانى سىيلاستىق پەن ىنتىماق، ءوزارا سۇيىسپەنشىلىك، ۇرپاق ءوربىتۋ دەپ ۇققان. ۇيلەنۋ - ەكى جاستىڭ باقىتىنا جول اشاتىن قۋانىش. ال ءماحىردى جەلەۋ ەتىپ، قالىڭدىقتىڭ ارتىق-اۋىس سىيلىق تالاپ ەتۋى بەلەڭ الىپ بارادى. كەيبىر قىزدار مەن اتا-انالار ءماحىردى الەۋمەتتىك مارتەبە مەن بايلىقتىڭ ولشەمىنە اينالدىرىپ جىبەرۋدە. ماسەلەن پالەن مىڭ دوللار، قىمبات كولىك، التىن اشەكەي دەگەندەي. وسىلايشا قالىڭدىق ەرتەڭگى كۇننىڭ باقىتسىزدىعىنان الدىن-الا ساقتانعانداي وي تۋدىراتىنىن وزدەرى دە بايقامايتىن بولۋلارى كەرەك.

ءماحىر كۇيەۋ جىگىتكە ارتىق ماتەريالدىق سالماق تۇسىرەدى.

جاس وتباسىنىڭ العاشقى قادامى قارىز، قيىندىق، وكپە-نازبەن باستالۋى مۇمكىن.

قالىڭدىقتىڭ "دۇنيەقۇمار" دەگەن جامان اتى شىعىپ، ابىرويىنا نۇقسان كەلەدى.

نەكەنىڭ رۋحاني ءمانى السىرەپ، ساۋداعا ۇقساپ كەتەدى.

قازاققى دۇنيەتانىم بويىنشا وتباسىنىڭ باقىتى دۇنيە-مۇلىكتە ەمەس، تاتۋلىقتا. ءماحىر - قازاق دۇنيەتانىمىن بۇرمالاۋ عانا ەمەس، جاس وتاۋدىڭ ىرگەسىنە سىزات تۇسىرەتىن قاۋىپتى ءۇردىس. شاڭىراقتىڭ رۋحاني تۇتاستىعىن شايقالتاتىن ارەكەت.

گۇلماريا بارمانبەكوۆا

Abai.kz