«ادام – جەگەن اسىنا ساي» دەگەن حالىق دانالىعى بار. بۇل ناقىلدىڭ شىندىق ەكەنىنە كاسىبي سپورتشىلاردىڭ ومىرىنەن كوز جەتكىزۋگە بولادى. الەمدىك فۋتبولدىڭ جارىق جۇلدىزى كيليان مباپپە دۇرىس تاماقتانۋدىڭ ارقاسىندا سپورتتاعى بيىك جەتىستىككە قول جەتكىزىپ وتىر.

مباپپە رونالدۋ مەن مەسسيدىڭ تاجىريبەسىن ۇلگى تۇتىپ، كۇنىنە التى رەت تاماقتانۋدى ادەتكە اينالدىرعان. ونىڭ اس ءمازىرى سالاۋاتتى ءارى ءتۇرلى دارۋمەندەر مەن مينەرالدارعا باي تاعامدارعا نەگىزدەلگەن. بۇل – فۋتبولشىعا جاتتىعۋ كەزىندە قاجەتتى ەنەرگيانى ساقتاپ، بۇلشىق ەت قىزمەتىن قولداۋعا جانە تەز قالپىنا كەلۋگە كومەكتەسەدى.

پسج ويىنشىسى ءجيى پاستا جەيدى. كومىرسۋ مەن دارۋمەنگە باي بۇل تاعام ونىڭ اس قورىتۋىن جاقسارتىپ، الاڭداعى قيمىل-قوزعالىسىن جەڭىلدەتەدى. بۇدان بولەك، ول بيداي، قانتسىز بوتقا، تۇتاس ءداندى داقىلدار، كوكونىس پەن جەمىس ارقىلى ەنەرگيا الادى. ال اقۋىزدى بۇرشاق تۇقىمداستاردان، بالىقتان، تاۋىق ەتى مەن جۇمىرتقادان تولىقتىرادى. مايدى ءزايتۇن مايىنان، اۆوكادو مەن جاڭعاقتان الادى. كۇنى بويى جەتكىلىكتى مولشەردە سۋ ءىشۋ دە – ونىڭ باستى قاعيدالارىنىڭ ءبىرى.

مباپپە شەكتەن تىس زياندى تاعامداردان قاتاڭ باس تارتقان. ەت، گازدى سۋسىندار، تازارتىلعان ۇن ونىمدەر مەن قانتتى تۇتىنبايدى. ونىڭ ورنىنا كومىرسۋلار مەن اقۋىزعا نەگىزدەلگەن تاعامداردى تاڭدايدى.

الەمدىك فۋتبول جۇلدىزىنىڭ سۇيىكتى اسى – پاستا كاربونارا. يتالياندىق بۇل تاعامدى ول مەيرامحانالاردا ءجيى تاپسىرىس بەرىپ جەيدى. سونىمەن قاتار، سپاگەتتي بولونەزە مەن پەستو پاستاسىن دا ۇناتادى.

كوپتەگەن فۋتبولشىلار وزدەرىنە كەيدە «چيت-ميل» (رۇقساتسىز اس ءمازىرى) جاساپ، ءتاتتى نەمەسە زياندى تاعام تۇتىنادى. مباپپە مۇندايعا دا اسا قىزىقپايتىن سپورتشى. ول ءۇشىن ەڭ باستىسى پايدالى اس ءمازىرىن ساقتاۋ.
ءبىر قاراعاندا قاراپايىم كورىنەتىن بۇل قاعيدالار مباپپەنىڭ الاڭداعى ەرەكشە جىلدامدىعى مەن توزىمدىلىگىنىڭ سىرى بولسا كەرەك.

دۇيسەنالى الىماقىن

Abai.kz