وزبەكستان ءبىر الاڭعا ەكى اتوم ەلەكتر ستانتسياسىن ورنالاستىرۋدى جوسپارلاپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ءتيىستى كەلىسىمگە وزبەك دەلەگاتسياسىنىڭ رەسەيگە ساپارى بارىسىندا قول قويىلدى. قۇجاتقا ساي، «روساتوم» مەملەكەتتىك كورپوراتسياسى دجيزاك وبلىسىندا انىقتالعان الاڭدا ءبىر از قۋاتتى جانە ءبىر ءىرى اەس قۇرىلىسىن باستاماق.

«Uzatom» اگەنتتىگى وكىلدەرىنىڭ مالىمەتىنشە، ارقايسىسىنىڭ قۋاتى 55مۆت بولاتىن ەكى «ريتم-200ن» رەكاكتورى جانە جالپى ەنەگريا ءوندىرۋ قاۋقارى 2000مۆت-قا تەڭ قوس «ۆۆەر-1000» رەاكتورى بوي كوتەرەدى.

توقتالا كەتەيىك، بۇعان دەيىنگى وزبەك اەس-ىنە 55مۆت 6 رەاكتوردى (جالپى قۋاتى 330مۆت) ورنالاستىرۋ جوسپارى بولعان. ەندى ولاردىڭ سانى ەكەۋگە دەيىن قىسقارادى، تيىسىنشە ونىڭ قۋاتى 110مۆت-پەن شەكتەلەدى. سونىمەن قاتار، بەلگىلەنگەن الاڭعا، ياعني تۋزكان كولىنە تاعى ءبىر ءىرى اتوم ستانتسياسى سالىنادى.

ەسكە سالايىق، بۇعان دەيىن رەسمي تاشكەنت پەن بۋداپەشت وزبەك اەس-ىنە سالقىنداتۋ جۇيەسىن ەنگىزۋ مۇمكىندىگىن تالقىلاپ جاتقانىن جازىپ ەدىك.

قوسا كەتسەك، تاياۋدا قازاقستان حالقىنا جولداۋىن جاريالاعان پرەزيدەنت قاسىم-جومارت توقاەۆ ەلدە بىرنەشە اەس سالۋ باستاماسىن كوتەرگەن بولاتىن. تيىسىنشە، 25 قىركۇيەكتە العاشقى اەس-كە ۇزدىك اتاۋ بەرۋ كونكۋرسى باستالدى.

Abai.kz