كەشە تاجىك استاناسى دۋشانبەدە ورتالىق ازيا ەلدەرى باسشىلارى مەن رەسەيدىڭ بىرلەسكەن ءسامميتى ءوتتى. ونىڭ ءىزىن الا، تمد ەلدەرى باسشىلارىنىڭ كەزەكتى باسقوسۋى دا وسى قالادا ءوتىپ جاتىر.

اتالعان باسقوسۋعا رەسەي پرەزيدەنتى ۆلەديمير پۋتين بار. كاسپيدىڭ ەكىنشى بەتىنەن ءازىربايجان پرەزيدەنتى يلحام اليەۆ تە ۇشىپ بارعان.

كوپتەن بەرى جۇرت الدىندا ءبىر-بىرىنە سالقىن سويلەپ، قاباق شىتىپ قاراپ كەلگەن اليەۆ پەن پۋتين دۋشانبەدە جەكە جولىقتى. بۇل كەزدەسۋ ۇزىن-ىرعاسى 40 مينۋتقا سوزىلدى. ەكەۋارا اڭگىمەنىڭ باستى تالقىسى – 2024 جىلدىڭ جەلتوقسانىندا اقتاۋ ماڭىندا اپاتقا ۇشىراعان ءازىربايجان ۇشاعى.

دەرەك: 2024 جىلدىڭ 25 جەلتوقسانى. ءازىربايجاننىڭ «AZAL» اۋەكومپانياسىنا تيەسىلى Embraer E190 جولىشاۋلىر تاسىمالدايتىن ۇشاعى باكۋدەن ۇشىپ شىعىپ گروزنىيعا جەتە بەرگەندە رف اۋە قورعانىس كەشەنىنىڭ شابۋىلىنا ۇشىراپ، اقتاۋعا قاراي كەرى بۇرىلعان. اقك (پۆو) زىمىرانىنان بولعان زاقىمنان ۇشاق اقتاۋعا جەتەر-جەتپەس جەرگە قۇلاپ، اپاتقا ۇشىرادى. بورتتاعى 38 ادام قازا تاپتى. ءتىرى قالعاندار سانى – 29 ادام.

ءازىربايجان تارابى ۇشاقتىڭ اپاتقا ۇشىراۋىنا رەسەيدى كىنالادى. پرەزيدەنت اليەۆ العاشقى اپتالاردان-اق، رەسەيدى ايىپتاپ، وتاماقى تالاپ ەتتى. بىراق، رەسەي تانالعان جوق. باكۋ مەن ماسكەۋ اراسى وسىدان باستاپ سۋي ءتۇستى.

ال كەشە رەسەي پرەزيدەنتى پۋتين اقتاۋدا اپاتقا ۇشىراعان ازەربايجان اۋە كومپانياسىنىڭ ۇشاعىن رەسەيلىك اۋە قورعانىس جۇيەسى اتىپ تۇسىرگەنىن اقىر سوڭىندا مويىندادى. مويىنداپ قانا قويعان جوق، وتاماقى تولەيتىنىن ايتتى.

پۋتين نە دەدى؟

«AZAL» ۇشاعى اپاتقا ۇشىرايتىن كۇنى، رەسەي اۋماعىنا ءۇش ۋكراين درونى كىرىپ كەتتى. رەسەي كەلىسىم بويىنشا بولعان جايتتى تولىق انىقتاۋعا قاتىستى تەرگەۋ-تەكسەرۋگە تولىق قاتىسۋدا. رەسەيدىڭ اۋە قورعانىس جۇيەسى اتقان ەكى زىمىران ۇشاققا تيگەن جوق، ۇشاقتىڭ جانىندا بىرنەشە مەتر قاشىقتىقتا جارىلسا كەرەك. ۇشاققا ناقتى سوققى ەمەس، جارقىنشاقتار تيسە كەرەك»، - دەدى پۋتين.

پۋتين ۇشاقتىڭ قۇلاۋىنا قاتىسى بار ازاماتتاردىڭ ارەكەتىنە قۇقىقتىق تۇرعىدان باعا بەرىلەتىنىن ايتتى.

Abai.kz