شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى «اباي ينستيتۋتى» قازاقتىڭ ۇلى ويشىلى، اقىن اباي قۇنانبايۇلىنىڭ 180 جىلدىعىنا ارنالعان اشىق ساباقتا وتكىزدى.

Cاباق قازاقستاننىڭ ماجارستانداعى توتەنشە جانە وكىلەتتى ەلشىسى ابزال ساپاربەكۇلىنىڭ العى سوزىمەن اشىلدى. ەلشى  اباي شىعارمالارىنىڭ ادامزاتتىق قۇندىلىققا جاتاتىن ايتا وتىرىپ، ەكى ەلدىڭ مادەني بايلانىستارىنا توقتالدى.

سۋرەت: شارا ۇيىمداستىرۋشىلارىنان الىندى.

ادەبيەت سالاسى بويىنشا نوبەل سىيلىعىن يەلەنگەن لاسلو كراسناحوريكايدىڭ جەڭىسىمەن ماجار حالقىن قۇتتىقتاي كەلە، قازاق ءتىلىن ۇيرەنۋشىلەردىڭ ءبىلىم الۋ ۇدەرىسى توقتاپ قالماس ءۇشىن اباي ينستيتۋتىمەن بايلانىستىڭ جالعاسا بەرۋىنە تىلەكتەستىگىن ءبىلدىردى. اباي مۇراسىن ناسيحاتتاۋ ماقساتىندا ۇيىمداستىرىلعان يگى شاراعا مۇرىندىق بولعان شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنا العىسىن ءبىلدىردى.

سۋرەت: شارا ۇيىمداستىرۋشىلارىنان الىندى.

وندان ارى قاراي اشىق ساباق  قازاقستان رەسپۋبليكاسى عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى ەربول تىلەشوۆتىڭ كىرىسپە سوزىمەن جالعاستى.

سونىمەن قاتار، ماجارستانداعى «Barsz» قورىنىڭ پرەزيدەنتى گال اندراش جانە بەلگىلى تۇركولوگ شومفاي قارا ءداۋىت ءسوز سويلەپ، اباي مۇراسىنىڭ الەمدىك مادەنيەت پەن رۋحانياتتاعى ماڭىزىن اتاپ ءوتتى.

اباي ينستيتۋتىنىڭ قازاق ءتىلى كۋرسىن وقىپ جۇرىگەن پاريج، انكارا، ۇلانباتىر، بۋداپەشتەن قوسىلعان ءتىل ۇيرەنۋشىلەر «اسەمپاز بولما ارنەگە»، «عاشىقتىڭ ءتىلى – ءتىلسىز ءتىل»، «كوزىمنىڭ قاراسى»، «جەلسىز تۇندە جارىق اي» ولەڭدەرىن جاتقا وقىپ، قازاقتىڭ ۇلتتىق اسپاپتارىمەن ونەر كورسەتتى.

بۋداپەشتەگى اشىق ساباقتىڭ جوعارى دارەجەدە وتۋىنە جاۋاپتى ۇيىمداستىرۋشىلار: ELTE ۋنيۆەرسيتەتىنىڭ  وقىتۋشىسى، ەتنوگراف  وڭايشا ماندوكي،  اباي ينستيتۋتىنىڭ بۋداپەشتەگى قازاق ءتىلى وقىتۋشىسى بوگلاركا فەحەر بولدى.

سۋرەت: شارا ۇيىمداستىرۋشىلارىنان الىندى.

شارا سوڭىندا قازاقستاننىڭ ماجارستانداعى توتەنشە جانە وكىلەتتى ەلشىسى ابزال ساپاربەكۇلى اباي ينستيتۋتىنىڭ بۋداپەشت قالاسىنداعى اشىق ساباعىن ۇيىمداستىرعان باستاماشىل توپتى العىس حاتپەن ماراپاتتادى.

اينۇر تولەۋ، اباي ينستيتۋتىنىڭ جەتەكشىسى

Abai.kz