قازاقستانعا العاش رەت دۇنيەجۇزىلىك دوپينگكە قارسى اگەنتتىك (WADA) پرەزيدەنتى كەلدى.

بۇگىن دۇنيەجۇزىلىك دوپينگكە قارسى اگەنتتىكتىڭ (WADA) پرەزيدەنتى ۆيتولد بانكا باستاعان دەلەگاتسيا استاناعا كەلدى. قوناقتاردى تۋريزم جانە سپورت ءمينيسترى ەربول مىرزابوسىنوۆ، قازاقستاننىڭ ۇلتتىق دوپينگكە قارسى ورتالىعىنىڭ ديرەكتورى مايرا باقاشەۆا جانە مينيسترلىك وكىلدەرى قارسى الدى.

ساپار بارىسىندا دەلەگاتسيا سپورت فەدەراتسيالارىنىڭ، ۇلتتىق وليمپيادا كوميتەتىنىڭ وكىلدەرىمەن، سپورتشىلارمەن جانە ستۋدەنتتەرمەن كەزدەسۋ وتكىزىپ، ەلورداداعى بىرقاتار سپورت نىساندارىن ارالايدى. نەگىزگى ماقسات – قازاقستانداعى دوپينگكە قارسى ساياسات ماسەلەلەرىن تالقىلاۋ.

دۇنيەجۇزىلىك دوپينگكە قارسى اگەنتتىك (WADA) — سپورتتاعى دوپينگكە قارسى كۇرەستى ۇيلەستىرەتىن تاۋەلسىز ۇيىم. ول حالىقارالىق وليمپيادا كوميتەتىنىڭ قولداۋىمەن قۇرىلعان.

WADA-نىڭ نەگىزگى قۇجاتى – دۇنيەجۇزىلىك دوپينگكە قارسى كودەكس جانە وعان قوسىمشا سەگىز حالىقارالىق ستاندارت. اگەنتتىكتىڭ باستى مىندەتى – دوپينگكە قارسى كۇرەستى ناسيحاتتاۋ، ۇيلەستىرۋ جانە باقىلاۋ.

ۇيىم ءوز قىزمەتىن ايماقتىق جانە ۇلتتىق دوپينگكە قارسى ورتالىقتار ارقىلى جۇزەگە اسىرادى جانە بۇل ورتالىقتار كودەكس تالاپتارىن ساقتاۋعا مىندەتتى.

سونىمەن قاتار WADA زەرتحانالاردى اككرەديتتەپ، دوپينگ-باقىلاۋعا ارنالعان عىلىمي تالداۋلاردىڭ ساپالى بولۋىن قامتاماسىز ەتەدى.

Abai.kz