باتىس قازاقستان وبلىسىنىڭ اقجايىق اۋدانىندا 58 جىلدان كەيىن العاش رەت قولعا الىنعان كيروۆ سۋ قويماسىن كۇردەلى رەكونسترۋكتسيالاۋ جۇمىستارى اياقتالۋعا جاقىن.

جوبا اياسىندا ۇزىندىعى 8 شاقىرىمنان اساتىن «كوشىم» كانالى، ۇزىندىعى 3 شاقىرىمنان اساتىن سۋ قويماسىنىڭ بوگەتى، سونداي-اق پەرۆوماي، بۋدارين جانە كيروۆ-چيجين كانالدارى جوندەلىپ جاتىر.

بۇدان بولەك، ۇزىندىعى 2,2 شاقىرىمنان اساتىن ەكى ەلەكتر جەلىسى مەن 3,77 شاقىرىمدىق سىرتقى جارىقتاندىرۋ جۇيەسى سالىنىپ، بەينەباقىلاۋ، اۆتوماتتاندىرىلعان ەسكەرتۋ جۇيەلەرى مەن باقىلاۋ-وتكىزۋ پۋنكتتەرى ورناتىلۋدا.

«جوبا جۇزەگە اسقان سوڭ كيروۆ سۋ قويماسىنىڭ بەرىكتىگى ارتىپ، تۇتىنۋشىلارعا سۋارمالى سۋ ۇزدىكسىز بەرىلەدى. رەكونسترۋكتسيا نىساننىڭ سىيىمدىلىعىن ۇلعايتىپ، ونىڭ فۋنكتسيونالدىق مۇمكىندىكتەرىن جاقسارتادى. ناتيجەسىندە باتىس قازاقستان وبلىسىنىڭ 12 مىڭ گەكتاردان استام ەگىستىك القاپتارى سۋمەن قامتاماسىز ەتىلەدى»، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

كيروۆ سۋ قويماسى 1967 جىلى پايدالانۋعا بەرىلگەن، جالپى سىيىمدىلىعى – 62,9 ملن تەكشە مەتر. بۇل نىسان – ورال-كوشىم سۋارۋ جانە سۋلاندىرۋ جۇيەسىنىڭ ماڭىزدى بولىگى.

Abai.kz