قازىر اكىمدەردىڭ الەۋەتى ينۆەستيتسيا تارتۋمەن ولشەنەتىن بولدى. باياعىداي رەسپۋبليكا قازىناسىنا قول جايىپ وتىراتىن زامان كەلمەسكە كەتتى. بۇل ءبىر جاعىنان، ۋاقىت تالابى.

جاھاندىق گەوساياسي جاعداي قىسپاققا الىپ، ازىق-تۇلىك قىمباتتاپ، مەملەكەت قاتاڭ ەكونوميكالىق شارالارعا بارىپ جاتقان كەزدە باتىل قيمىلداماسا بولمايدى. وسى ورايدا، باتىس قازاقستان وبلىسى اكىمدىگى قولعا العان ىلكىمدى ىستەردى اتاپ وتكەن ورىندى.

2025 جىلدىڭ ءبىرىنشى جارتىجىلدىعىنىڭ قورىتىندىسى بويىنشا وڭىرگە تارتىلعان تىكەلەي شەتەلدىك ينۆەستيتسيا كولەمى 1 093 ملن دوللاردى قۇراپ، وتكەن جىلدىڭ سايكەس كەزەڭىمەن سالىستىرعاندا 1,7 ەسەگە ارتقان. بۇگىندە باتىس قازاقستان وبلىسى تىكەلەي شەتەلدىك ينۆەستيتسيا كولەمى بويىنشا الماتى جانە استانا قالالارىنان كەيىن رەسپۋبليكادا 3-ورىندا تۇر. بۇل ارينە، ۇلكەن جەتىستىك.

قازىر بۇل ايماققا قىتايلىق ينۆەستورلار كەلىپ، 14 جوبانى قولعا الىپتى. كورشى ەلدىڭ ينۆەستورلارى ەنەرگەتيكا، اۋىل شارۋاشىلىعى، دەنساۋلىق ساقتاۋ سياقتى بىرقاتار ماڭىزدى سالاعا جالپى قۇنى 134 ملرد تەڭگەدەن استام قارجى سالۋعا نيەتتى. بۇل باعىتتا ەكى جاقتى ناقتى كەلىسىم بار. ساناۋلى كۇندەردەن كەيىن ەكى زاۋىتتىڭ قۇرىلىسى باستالادى. وعان قاجەتتى قۇرال-جابدىق تيەلگەن كونتەينەرلەردىڭ العاشقى لەگى قىتايدىڭ ۆەيفان قالاسىنان ەلىمىزگە قاراي جونەلتىلىپ تە قويعان.

الدىمەن يندۋستريالدى ايماقتا قۋاتى 34 مەگاۆاتت بولاتىن گاز ەلەكتر ستانتسياسى سالىنادى. بۇل جوبا كەيىنگى ءوندىرىس ورىندارىن تۇراقتى ەنەرگيامەن قامتاماسىز ەتۋگە باعىتتالعان. سونىمەن قاتار مۇناي كاتاليزاتورلارىن قايتا وڭدەۋ زاۋىتىنىڭ قۇرىلىسى باستالادى. زاۋىتقا قاجەتتى قوندىرعى قازاقستانعا جونەلتىلدى. العاشقى جۇكتى تيەۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ باستاعان دەلەگاتسيا ارنايى قاتىستى.

«مەملەكەت باسشىسى اتاپ وتكەندەي، ءبىز شيكىزاتقا تاۋەلدى بولماي، وڭدەۋ ونەركاسىبىن، اۋىل شارۋاشىلىعىن، ءوندىرىستى دامىتۋعا ەرەكشە ءمان بەرىپ وتىرمىز. بۇل جوبالار ءوڭىر ەكونوميكاسىنىڭ دامۋىنا ەلەۋلى سەرپىن بەرەدى»، دەدى باتىس قازاقستان وبلىسىنىڭ اكىمى ناريمان تورەعاليەۆ.

وبلىستا جوسپارلانعان 14 جوبانىڭ ءبارىن ءبىر كونسورتسيۋم اتقارادى. قۇرامىنداعى بىرنەشە كومپانيا تەك ەنەرگەتيكا سالاسىن ەمەس، اگروتەحنيكا، مۇناي، قۇرىلىس، دەنساۋلىق ساقتاۋ سالالارىن دا ينۆەستيتسيالايدى. قىتايلىق «VEGA Power» كومپانياسىنىڭ باس ديرەكتورى گە تسزيان جوبا كەزەڭ-كەزەڭىمەن جۇزەگە اسىرىلىپ، العاشقى كەزەڭدە 30 ملن دوللار كولەمىندە ينۆەستيتسيا سالىناتىنىن اتاپ ءوتتى. بۇگىندە العاشقى 5 كونتەينەر جونەلتىلگەنىن جانە جوبا تولىق جۇزەگە اسقاندا 10-نان استام ءونىم ءتۇرى شىعارىلاتىنىن دا حابارلادى. وبلىس اكىمى ينۆەستورلارمەن كەزدەسۋ بارىسىندا ناقتى تالاپتاردى دا اتادى، ولار:

كومپانيالار وڭىردە تىركەلىپ، سالىق ءتۇسىمى جەرگىلىكتى بيۋدجەتكە باعىتتالۋى ءتيىس;

جەرگىلىكتى كادرلار جۇمىسقا ورنالاستىرىلادى;

بولاشاق مامانداردى وقىتۋ ينۆەستورلاردىڭ قاراجاتى ەسەبىنەن جۇرگىزىلۋى ءتيىس.

Abai.kz