Financial Times باسىلىمى ترامپ پەن زەلەنسكيدىڭ جابىق ەسىك جاعدايىندا وتكىزگەن كەزدەسۋى جايلى ماقالا جازىپتى. وندا ترامپتىڭ زەلەنسكيگە جاساعان قىسىمى جايلى باياندالعان.

قىسقاشا ايتساق، بىلاي:

ترامپ پەن زەلەنسكيدىڭ جابىق فورماتتاعى كەزدەسۋى اسا شيەلەنىستى كۇيدە ءوتتى. زەلەنسكي ترامپتىڭ كوزقاراسى كۇرت وزگەرەرىن بىلگەن جوق. ۋكراينا باسشىسى مايدان شەبىندەگى جاعداي جايلى اقپاراتتاردى جيناقتاپ، رەسەيدى كەلىسسوز ۇستەلىنە وتىرعىزۋ امالدارى جايلى سويلەسۋگە كەلگەن ەدى. زەلەنسكي مايدان شەبىنە قاتىستى انىق كارتالاردى دا الا كەلدى.

الايدا ترامپ كارتالارعا اسا نازار اۋدارعان جوق. اقش باسشىسى زەلەنسكيگە بىردەن ءپۋتيننىڭ شارتىن قابىلداۋدى ۇسىندى. «ولاي بولماعان جاعدايدا پۋتين ۋكراينانى جويادى» دەپ مالىمدەدى ترامپ. ترامپتىڭ وكىلى ۋيتكوفف دونباسستى رەسەيگە بەرۋگە شاقىرعان، ال ترامپ باس يزەپ، كەلىسەتىندەي ىڭعاي تانىتتى.

ترامپ ۇستەل ۇستىندەگى زەلەنسكي اكەلگەن كارتانى ىسىرىپ تاستاپ، ءپۋتيننىڭ تەلەفون ارقىلى ايتقان كەي سوزدەرىن قايتالاۋمەن بولدى. ول ءسوز اراسىندا جەكە باسقا ءوتىپ، زەلەنسكيدى تىلدەپ تە الدى.

كەزدەسۋدىڭ سوڭىندا زەلەنسكي ترامپتىڭ ويىن وزگەرتكەندەي بولدى. ول ترامپتى سوعىستى مايدان شەبى بويىنشا توقتاتۋ كەرەكتىگىنە كوندىردى. ترامپ كەلىستى. الايدا ونىڭ كوزقاراسى وزگەرىپ كەتۋى مۇمكىن.

Abai.kz