قازاقستاننىڭ بىرنەشە وڭىرىندە رەسپۋبليكا كۇنىنە بايلانىستى الەۋمەتتىك وسال ازاماتتارعا بىرجولعى تولەم قاراستىرىلعان. تولەم مولشەرى مەن الۋشىلار ساناتى جەرگىلىكتى ءماسليحاتتار مەن الەۋمەتتىك قورعاۋ ورگاندارىنىڭ شەشىمىمەن بەلگىلەنەدى.

استانا
ەلوردادا رەسپۋبليكا كۇنىنە وراي اتاۋلى الەۋمەتتىك كومەك (ااك) الۋشى وتباسىلارعا 17 694 تەڭگە كولەمىندە بىرجولعى تولەم بەرىلەدى. ءتىزىمدى ەڭبەكپەن قامتۋ جانە الەۋمەتتىك قورعاۋ باسقارماسى جاساقتايدى.

شىمكەنت
شىمكەنتتە رەسپۋبليكا كۇنىنە ارنالعان بولەك ماتەريالدىق كومەك قاراستىرىلماعان. بۇعان دەيىن، 30 تامىز – كونستيتۋتسيا كۇنىنە وراي، 18 جاسقا دەيىنگى مۇمكىندىگى شەكتەۋلى بالالار مەن اتا-اناسىنىڭ قامقورلىعىنسىز قالعان بالالار بىرجولعى تولەم العان بولاتىن.

قىزىلوردا وبلىسى
قىزىلوردا وبلىسىندا 2024 جىلدان باستاپ بارلىق ساناتتاعى (I, II, III توپ) مۇمكىندىگى شەكتەۋلى جاندار مەن مۇمكىندىگى شەكتەۋلى بالالارعا رەسپۋبليكا كۇنىنە جىل سايىنعى تولەم ەنگىزىلگەن. تولەم مولشەرى – 11 796 تەڭگە.

اتىراۋ وبلىسى
اتىراۋ وبلىسىندا 2023 جىلدان بەرى مۇمكىندىگى شەكتەۋلى ادامدارعا جەرگىلىكتى بيۋدجەت ەسەبىنەن جىل سايىن ماتەريالدىق كومەك كورسەتىلەدى.

بيىل رەسپۋبليكا كۇنىنە وراي 27 300 مۇگەدەك ازامات، سونىڭ ىشىندە 4 800 بالا تولەم الادى. تولەم مولشەرى – 29 490 تەڭگە.

ماڭعىستاۋ وبلىسى
رەسپۋبليكا كۇنىنە وراي وڭىردە وبلىس اۋماعىندا تۇراتىن مۇمكىندىگى شەكتەۋلى ادامدارعا الەۋمەتتىك كومەك كورسەتىلەدى. تولەم مولشەرى – 19 660 تەڭگە. 2025 جىلدىڭ 1 قازانىنا دەيىن وبلىستا 34 510 مۇگەدەك ازامات تىركەلگەن.

اباي وبلىسى
اباي وبلىسىندا 25 قازانعا ارنالعان تولەمدەر كوزدەلمەگەن. ولار 16 جەلتوقسان – تاۋەلسىزدىك كۇنىنە وراي جوسپارلانىپ وتىر.

پاۆلودار وبلىسى
پاۆلودار وبلىسىندا جەرگىلىكتى وكىلدىك ورگانداردىڭ شەشىمىمەن I جانە II توپتاعى مۇگەدەكتەرگە، سونداي-اق 18 جاسقا دەيىنگى مۇمكىندىگى شەكتەۋلى بالالارعا بىرجولعى الەۋمەتتىك كومەك قاراستىرىلعان. تولەم مولشەرى – 19 660 تەڭگە.

الماتى، قوستاناي، اقمولا، ۇلىتاۋ، جەتىسۋ جانە تۇركىستان وبلىستارىندا رەسپۋبليكا كۇنىنە ارنالعان بىرجولعى تولەمدەر قاراستىرىلماعان.

ەسكە سالايىق، بيىل بەس كۇندىك جۇمىس اپتاسى بويىنشا ەڭبەك ەتەتىن قازاقستاندىقتار ءۇش كۇن – 25, 26 جانە 27 قازان كۇندەرى دەمالادى.

رەسپۋبليكا كۇنى العاش رەت 1995 جىلى بەلگىلەنگەن، الايدا 2009 جىلدان باستاپ اتالىپ وتپەي كەلگەن.

2022 جىلدىڭ قىركۇيەگىندە پرەزيدەنت قاسىم-جومارت توقاەۆتىڭ قول قويۋىمەن 25 قازان ۇلتتىق مەرەكە – رەسپۋبليكا كۇنى مارتەبەسىن قايتا يەلەندى.

Abai.kz