1990 جىلدىڭ 25 قازانى كۇنى قازاق كسر جوعارعى كەڭەسىنىڭ شەشىمىمەن «قاز سسر-ءنىڭ مەملەكەتتىك ەگەمەندىگى تۋرالى» دەكلاراتسيا قابىلداندى.

سول كەزدەن باستاپ قازاقستان ەگەمەندى ەلگە اينالۋىنىڭ العىشارتىن باستاپ كەتتى. ەلىمىزدىڭ جەكە تەرريتورياسى، ازاماتتىعى، مەملەكەتتىك بيۋدجەتى، حالىقارالىق قاتىناستارداعى دەربەستىگى، مەملەكەتتىك رامىزدەرى بەكىتىلدى. 1990 جىلعى دەكلاراتسيادا قازاق كسر-ءىنىڭ مەملەكەتتىك ەگەمەندىگى جاريالانىپ، ەلدىڭ ساياسي-قۇقىقتىق تاۋەلسىزدىگىنىڭ باعدارلاماسى باياندالدى. ەل اۋماعىنىڭ تۇتاستىعى، وعان قول سۇعىلمايتىندىعى، قازاق حالقىنىڭ جانە قازاقستانداعى  باسقا دا ەتنوس وكىلدەرىنىڭ ءتول مادەنيەتىن، ءداستۇرىن، ءتىلىن قايتا تۇلەتۋ مەن دامىتۋ، ۇلتتىق قادىر-قاسيەتتى نىعايتۋ مەملەكەتتىڭ اسا ماڭىزدى مىندەتتەرىنىڭ ءبىرى رەتىندە ايتىلدى.

مەملەكەت باسشىسى قاسىم-جومارت توقاەۆتىڭ رەسپۋبليكا كۇنىمەن قۇتتىقتاۋى

سۋرەت: اقوردا تەلەگرام ارناسىنان الىندى.

قاسىم-جومارت توقاەۆ، قازقاستان پرەزيدەنتى:

قىمباتتى وتانداستار!

رەسپۋبليكا كۇنى قۇتتى بولسىن!

قازاقستان وسىدان 35 جىل بۇرىن ەگەمەندىك دەكلاراتسياسىن قابىلداپ، جاڭا داۋىرگە قادام باستى. تاريحي قۇجاتتا حالقىمىزدىڭ ءوز بولاشاعىن دەربەس ايقىنداۋ قۇقىعى ناقتى كورىنىس تاپتى. سول ارقىلى بوستاندىقتىڭ بايراعىن كوتەرىپ، زاماناۋي مەملەكەت قۇرۋىمىزعا جول اشىلدى.

سودان بەرى ەلىمىز قيىن دا كۇردەلى جولدان ءوتتى. ءبىز تاۋەلسىزدىگىمىزدىڭ ساياسي-ەكونوميكالىق تۇعىرىن بەكىتتىك، شەكارامىزدى ايقىنداپ، ونى بۇكىل الەمگە تانىتتىق، جاڭا استانامىزدى سالدىق. سونداي-اق جالپىۇلتتىق بىرەگەيلىگىمىزدى نىعايتۋ، ازاماتتارىمىزدىڭ ءال-اۋقاتىن ارتتىرۋ جولىندا زور جەتىستىككە قول جەتكىزدىك. قازاقستان ساليقالى ءارى سىندارلى سىرتقى ساياساتىنىڭ ارقاسىندا ءوزىنىڭ ۇلتتىق مۇددەسىنە ادال، حالىقارالىق ابىروي-بەدەلى جوعارى مەملەكەت رەتىندە قالىپتاستى.

دەگەنمەن الدىمىزدا بۇدان دا زور مىندەتتەر تۇر. ءبىز قازىرگى الماعايىپ زامانداعى وراسان سىن-قاتەرلەرگە قاراماستان، بارلىق ازاماتقا بىردەي مۇمكىندىك بەرەتىن ادىلەتتى قازاقستاندى قۇرىپ جاتىرمىز. ساياساتتاعى، ەكونوميكا مەن الەۋمەتتىك سالاداعى رەفورمالار وتانىمىزدىڭ ءوسىپ-وركەندەۋىن قامتاماسىز ەتىپ، حالقىمىزدىڭ تۇرمىس ساپاسىن ارتتىرۋدى كوزدەيدى.

ءبىز «زاڭ جانە ءتارتىپ» قاعيداتىن، «تازا قازاقستان» يدەولوگياسىن، وتانشىلدىق پەن تىلەۋلەستىك، ەڭبەكقورلىق پەن جاۋاپكەرشىلىك، بىلىمپازدىق پەن كاسىبيلىك قۇندىلىقتارىن قوعامدا بارىنشا ورنىقتىرىپ، كەلەشەگىنە سەنىممەن قارايتىن وزىق ويلى ۇلت رەتىندە قالىپتاسىپ كەلەمىز.

ءار بۋىننىڭ ءوز ميسسياسى بار. وسى ورايدا، بابالار وسيەتىن ۇمىتپاي، قاستەرلى تاۋەلسىزدىگىمىزدى نىعايتا ءتۇسۋ، قازاقستاندى دامىعان، جاسامپاز ءارى ادىلەتتى ەل ەتۋ – بارىمىزگە ورتاق پارىز.

ءبىز ەسەلى ەڭبەكتىڭ، ءوزارا قولداۋدىڭ جانە ەڭ باستىسى، مىزعىماس بىرلىكتىڭ ارقاسىندا بارلىق جوسپارىمىزدى تابىستى جۇزەگە اسىرىپ، جاڭا بەلەستەردى باعىندىرا بەرەتىنىمىزگە سەنىمدىمىن. ەلىمىزدىڭ كەلەشەگى – ارقايسىمىزدىڭ قولىمىزدا. قازاقستاننىڭ كوك تۋى ءاردايىم بيىكتە جەلبىرەسىن! بارشاڭىزعا زور دەنساۋلىق، باق-بەرەكە جانە مول تابىس تىلەيمىن!

Abai.kz