سوڭعى جىلدارى قازاقستان قوعامىندا «جاڭا قازاقستان» ۇعىمى ەل دامۋىنىڭ جاڭا كەزەڭىن بىلدىرەتىن ماڭىزدى يدەياعا اينالدى.

بۇل – مەملەكەت پەن قوعام اراسىنداعى قارىم-قاتىناستىڭ جاڭا فورماتىن قالىپتاستىرۋعا، اشىقتىق پەن ادىلدىككە، جاۋاپكەرشىلىك پەن ازاماتتىق بەلسەندىلىككە نەگىزدەلگەن باعىت. ال مۇنداي وزگەرىستەردىڭ تابىستى جۇزەگە اسۋى ءۇشىن ەڭ باستى شارت – ازاماتتىق قوعامنىڭ قالىپتاسۋى مەن كۇشەيۋى.
ەندەشە وسىندايدا ازاماتتىق قوعام دەگەنىمىز نە دەگەن زاڭدى سۇراق تۋادى.

ءبىزدىڭ بىلۋىمىزشە، ازاماتتىق قوعام – بۇل مەملەكەتتەن تاۋەلسىز، بىراق قوعام مۇددەسى ءۇشىن جۇمىس ىستەيتىن ۇيىمدار مەن جەكە تۇلعالاردىڭ ەركىن قاۋىمداستىعى. بۇعان ۇكىمەتتىك ەمەس ۇيىمدار، ەرىكتىلەر قوزعالىسى، باق، كاسىپوداقتار، قوعامدىق بىرلەستىكتەر جانە الەۋمەتتىك بەلسەندى ازاماتتار كىرەدى. ولار بيلىك پەن حالىق اراسىنداعى كوپىر ءرولىن اتقارىپ، الەۋمەتتىك ماسەلەلەردى شەشۋگە اتسالىسادى.

مىسالى، ەكولوگيالىق قوزعالىستار تابيعاتتى قورعاۋ ماسەلەسىن كوتەرسە، جاستار ۇيىمدارى ءبىلىم مەن يننوۆاتسيا سالاسىندا بەلسەندىلىك تانىتادى، ال قايىرىمدىلىق قورلارى مۇقتاج جاندارعا كومەك كورسەتەدى. مۇنىڭ ءبارى – ازاماتتىق قوعامنىڭ ناقتى كورىنىسى.

جاڭا قازاقستان يدەياسى جانە ونىڭ ءمانى

پرەزيدەنت قاسىم-جومارت توقاەۆ ۇسىنعان «جاڭا قازاقستان» تۇجىرىمداماسى – قوعامنىڭ ساياسي، الەۋمەتتىك جانە ەكونوميكالىق جاڭارۋىن ماقسات ەتەدى. بۇل باعىتتا ادىلەتتى قوعام ورناتۋ، حالىقتىڭ پىكىرىن ەسكەرۋ جانە شەشىم قابىلداۋعا قاتىستىرۋ، جەرگىلىكتى ءوزىن-ءوزى باسقارۋدى كۇشەيتۋ، اشىق ۇكىمەت پەن سىبايلاس جەمقورلىقسىز ورتا قالىپتاستىرۋ – باستى مىندەتتەر رەتىندە بەلگىلەنگەن. مىنە، وسى قاعيداتتاردىڭ بارلىعى ازاماتتىق قوعاممەن تىعىز بايلانىستى. ەگەر قوعام بەلسەندى، سانالى جانە جاۋاپتى بولسا، جاڭا قازاقستان يدەياسى دا ومىرشەڭ بولماق.

اسەت بازارباي، قوعام بەلسەندىسى: «ازاماتتىق قوعامنىڭ ءرولى مەن ماڭىزىن ءتۇسىنۋ وتە ماڭىزدى. بۇل قۇرىلىم بيلىك قىزمەتىنىڭ اشىقتىعىن قامتاماسىز ەتىپ، الەۋمەتتىك ادىلەتتىلىك پەن تەڭدىككە سۇرانىستى ارتتىرادى.  سونىمەن بىرگە، جاستاردىڭ بەلسەندىلىگىن جانە پاتريوتتىق ساناسىن كۇشەيتۋگە ءوز ۇلەسىن قوسا الادى. تاعى ءبىر جاعىنان قوعامدىق باقىلاۋ تەتىكتەرىن دامىتادى.
ماسەلەن، قوعامدىق كەڭەستەر مەن ەرىكتىلەر ۇيىمدارى ءتۇرلى مەملەكەتتىك باعدارلامالاردىڭ تيىمدىلىگىن باعالاپ، حالىقتىڭ شىنايى پىكىرىن جەتكىزە الادى. بۇل ءوز كەزەگىندە رەفورمالاردىڭ ساپاسىن ارتتىرادى.
جاڭا قازاقستان – تەك ساياسي ۇران ەمەس، بۇل – جاڭا ويلاۋ مادەنيەتى مەن ازاماتتىق جاۋاپكەرشىلىك كەزەڭى. ەلدىڭ بولاشاعى بيلىكتىڭ عانا ەمەس، ءاربىر ازاماتتىڭ بەلسەندىلىگىنە دە بايلانىستى. سوندىقتان ارقايسىمىز قوعام ومىرىنە بەيجاي قاراماي، ءوز سالامىزدا ادىلدىك پەن ىزگىلىكتىڭ ۇستانىمىن ورنىقتىرساق، جاڭا قازاقستان شىن مانىندە وركەنيەتتى ەلگە اينالماق».

Abai.kz