«بايتەرەك» ۇلتتىق باسقارۋشى حولدينگى ديرەكتورلار كەڭەسىنىڭ قۇرامىندا وزگەرىس بولدى.

قازاقستان قور بيرجاسىنىڭ (KASE) سايتىندا جاريالانعان رەسمي مالىمەتتە 14 قازانداعى جالعىز اكتسيونەردىڭ شەشىمىمەن قانات شارلاپاەۆ ديرەكتورلار كەڭەسىنىڭ قۇرامىنان شىعارىلعانى تۋرالى اقپارات تاراعان.

وسى وزگەرىستەن كەيىن «بايتەرەك» حولدينگىنىڭ ديرەكتورلار كەڭەسى توعىز مۇشەدەن تۇرادى. ايتا كەتەيىك، 29 قىركۇيەكتە قانات شارلاپاەۆ «سامۇرىق-قازىنا» ۇلتتىق ءال-اۋقات قورى ديرەكتورلار كەڭەسىنىڭ قۇرامىنان دا شىعارىلعان ەدى.

قانات شارلاپاەۆ — 1981 جىلى رەسەي فەدەراتسياسىندا تۋعان. ساراتوۆ الەۋمەتتىك-ەكونوميكالىق ۋنيۆەرسيتەتى مەن ۇلىبريتانياداعى كرەنفيلد مەنەدجمەنت مەكتەبىن تامامداعان.

ماماندىعى بويىنشا ەكونوميست، قارجى جانە باسقارۋ ماگيسترى.

ول 2023 جىلعى 4 قىركۇيەكتە توقاەۆتىڭ جارلىعىمەن ونەركاسىپ جانە قۇرىلىس ءمينيسترى بولىپ تاعايىندالعان.

كەيىن 2025 جىلعى 28 اقپاندا مينيستر قىزمەتىنەن بوساتىلىپ، پرەزيدەنتتىڭ كومەكشىسى اتاندى. الايدا وسى جىلدىڭ كۇزىندە كومەكشى قىزمەتىنەن دە بوساتىلعان.

Abai.kz