پرەزيدەنت قاسىم-جومارت توقاەۆتىڭ اقش-قا ساپارى وسى اپتانىڭ ەڭ كوپ تالقىلانعان حالىقارالىق وقيعالارىنىڭ ءبىرى بولىپ، جەتەكشى الەمدىك بۇقارالىق اقپارات قۇرالدارىنىڭ كەڭ نازارىن اۋدارتتى.

جاپونيانىڭ جەتەكشى اقپارات اگەنتتىگى Kyodo News توقاەۆتىڭ ساپارى C5+1 فورماتىنداعى ءسامميتتىڭ كەڭەيتىلگەن اۋقىمدا وتكەنىن اتاپ ءوتتى. اگەنتتىك ۆاشينگتوننىڭ ورتالىق ازيا ەلدەرىمەن ىنتىماقتاستىقتى نىعايتۋعا باعىتتالعان ءوسىپ كەلە جاتقان نازارىن ەرەكشە اتاپ كورسەتتى. اۆتورلاردىڭ پىكىرىنشە، قازاقستان اقش-تىڭ ماڭىزدى سەرىكتەسى ءارى وڭىرلىك ديپلوماتيانىڭ نەگىزگى بۋىنى رەتىندە ءوز ۇستانىمىن نىعايتىپ كەلەدى.

Financial Times باسىلىمى ساپاردىڭ ونەركاسىپتىك جانە تەحنولوگيالىق كۇن تارتىبىنە باسىمدىق بەردى. باسىلىمنىڭ جازۋىنشا، قازاقستان – ۋران ءوندىرىسى بويىنشا الەمدەگى جەتەكشى مەملەكەت، سونداي-اق ۆاشينگتوندا ستراتەگيالىق ماڭىزدى مينەرالدار سالاسىنداعى ىنتىماقتاستىق تۋرالى مەموراندۋمعا جانە قۇنى 2 ملرد اقش دوللارىنا دەيىن باعالانعان جاساندى ينتەللەكتكە ارنالعان چيپتەردى جەتكىزۋ جونىندەگى Nvidia كومپانياسىمەن كەلىسىمگە قول قويىلعانىن حابارلادى.

ساپاردىڭ ماڭىزدى ناتيجەلەرىنىڭ ءبىرى – قازاقستاننىڭ اۆراام كەلىسىمدەرىنە قوسىلاتىنى تۋرالى مالىمدەمە بولدى. بۇل باستاما يزرايلمەن قارىم-قاتىناستى قالىپقا كەلتىرۋگە باعىتتالعان حالىقارالىق ىنتىماقتاستىقتىڭ ءبىر بولىگى بولىپ تابىلادى.

CNN تەلەارناسى بۇل شەشىمدى تاريحي دەپ اتاپ، دونالد ترامپتىڭ ءسوزىن كەلتىردى:

«مەن يزرايل پرەمەر-ءمينيسترى بينيامين نەتانياحۋمەن جانە قازاقستان پرەزيدەنتى قاسىم-جومارت توقاەۆپەن وتە جاقسى اڭگىمەلەستىم. مەنىڭ ەكىنشى پرەزيدەنتتىك مەرزىمىم كەزىندە اۆراام كەلىسىمدەرىنە قوسىلعان العاشقى ەل – قازاقستان بولدى. بۇل حالىقارالىق سەرىكتەستىكتىڭ جاڭا كەزەڭىنىڭ باستاۋى»، — دەدى ترامپ.

The Washington Post باسىلىمى قازاقستاننىڭ بۇل شەشىمىن «نەگىزىنەن سيمۆولدىق ماڭىزعا يە» دەپ باعالاپ، استانا مەن تەل-اۆيۆ اراسىنداعى 30 جىلدان استام ۋاقىتقا سوزىلعان ديپلوماتيالىق قاتىناستاردى ەسكە سالدى.

Axios پورتالى بۇل قادامنىڭ «قازاقستاننىڭ مۇسىلمان الەمى مەن باتىس اراسىنداعى كوپىر رەتىندەگى ءرولىن كۇشەيتىپ، ەكونوميكالىق جانە گۋمانيتارلىق ىنتىماقتاستىقتىڭ جاڭا مۇمكىندىكتەرىن اشاتىنىن» اتاپ ءوتتى.

The New York Times ساراپشىلارىنىڭ پىكىرىنشە، توقاەۆتىڭ بۇل ساپارى بۇكىل ورتالىق ازيا ءوڭىرى ءۇشىن ماڭىزدى وقيعاعا اينالىپ، قازاقستاننىڭ ديپلوماتيالىق ىقپالىنىڭ ارتىپ كەلە جاتقانىن جانە ونىڭ اقش ءۇشىن ستراتەگيالىق سەرىكتەس رەتىندەگى مارتەبەسىن راستادى.

The Straits Times باسىلىمى كەلىسسوزدەردەگى نەگىزگى تاقىرىپتاردىڭ ءبىرى ەنەرگەتيكالىق قاۋىپسىزدىك بولعانىن حابارلادى. اقش تاراپى قازاقستاننان ۋران مەن وزگە دە ستراتەگيالىق ماڭىزدى مينەرالداردى جەتكىزۋدى كەڭەيتۋگە مۇددەلىلىك تانىتقان.

Reuters حالىقارالىق اگەنتتىگى پرەزيدەنت توقاەۆ پەن پرەزيدەنت ترامپتىڭ اق ۇيدەگى كەزدەسۋىن سىندارلى جانە ىسكەرلىك احۋالدا ءوتتى دەپ سيپاتتاپ، كەلىسسوزدەردىڭ ساۋدا، ەنەرگەتيكا جانە تەحنولوگيالار سالالارىن قامتىعانىن جەتكىزدى.

وسىلايشا، پرەزيدەنت توقاەۆتىڭ ۆاشينگتونعا ساپارى قازاقستاننىڭ كوپۆەكتورلى ديپلوماتياسىنىڭ سيمۆولى عانا ەمەس، سونىمەن قاتار جاھاندىق جەتەكشى سەرىكتەستەردىڭ بىرىمەن ستراتەگيالىق ىنتىماقتاستىقتى نىعايتۋعا باعىتتالعان ناقتى قادام بولدى.

Abai.kz