رەسەيگە جۇمىس ىستەۋگە بارىپ، ۋكرايناداعى سوعىسقا تاپ بولعان قازاقستاندىقتار ەلگە ورالدى. ادۆوكات مەيىرمان شەكەەۆ ولاردىڭ تۋعان جەرىنە امان-ەسەن جەتكەنىن حابارلادى.

ادۆوكات الەۋمەتتىك جەلىدەگى جازباسىندا ازاماتتاردىڭ ەلگە ورالۋىنا اتسالىسقان مەملەكەت باسشىسى قاسىم-جومارت توقاەۆقا، سىرتقى ىستەر مينيسترلىگىنىڭ وكىلدەرىنە جانە كومەكتەسكەن بارشا ازاماتقا العىس ءبىلدىردى.

«بۇل — جاي عانا قايتۋ ەمەس. بۇل — اتا-انانىڭ كوز جاسى، وتباسىنىڭ ءۇمىتى، بالانىڭ، قازاقستان ازاماتتارىنىڭ ەلگە ورالۋى. وسى بالالاردىڭ ارقايسىسى بۇگىن ءوز جەرىندە، ءوز ەلىندە، ءوز اتا-اناسىنىڭ جانىندا. اللاعا سانسىز شۇكىر»، — دەپ جازدى مەيىرمان شەكەەۆ.

ول سونداي-اق قازاقستاندىقتاردى ماسكەۋ اۋەجايىنان كۇتىپ الىپ، شىعارىپ سالۋعا كومەكتەسكەن ازاماتتارعا دا ريزاشىلىعىن ءبىلدىردى.

ادۆوكات قۇزىرلى ورگانداردان ازاماتتار ەلگە ورالىپ، ەس جيعانشا ولارعا تىنىشتىق بەرۋدى سۇرادى.

ەسكە سالا كەتەيىك، قازان ايىنىڭ باسىندا ۋكرايناداعى سوعىسقا تاپ بولعان قازاقستاندىقتاردىڭ انالارى مەن تۋىستارى استاناعا كەلىپ، قازاقستاننىڭ سىرتقى ىستەر مينيسترلىگىنەن كومەك سۇراعان بولاتىن.

جاقىندارىنىڭ ايتۋىنشا، جىگىتتەر رەسەيگە كۇزەت اگەنتتىكتەرىنە جۇمىسقا ورنالاسۋ ءۇشىن بارعان. الايدا ولارعا ەڭبەك شارتىنىڭ ورنىنا باسقا قۇجاتتارعا قول قويدىرعان بولۋى مۇمكىن. سونىڭ سالدارىنان قازاقستاندىقتار كەلىسىمشارت بويىنشا اسكەري قىزمەتشىلەرگە اينالىپ، سوعىسقا جىبەرىلگەن.

بۇعان دەيىن مەيىرمان شەكەەۆ ازاماتتاردىڭ اسكەري مىندەتتەمەلەردەن بوساتىلعانىن جانە ولاردىڭ قازاقستانعا ورالۋىنا زاڭ جۇزىندە ەشقانداي كەدەرگى جوق ەكەنىن مالىمدەگەن ەدى.

Abai.kz