قاراعاندى وبلىسىندا جاساندى ينتەللەكت تەحنولوگيالارى جولدارداعى اقاۋلاردى انىقتاۋعا، كولىك كەپتەلىسىن ازايتۋعا جانە قىزمەت كورسەتۋ سالاسىندا تيىمدىلىكتى ارتتىرۋعا كومەكتەسۋدە. بۇل تۋرالى وبلىس اكىمى ەرماعانبەت بولەكپاەۆ پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە ايتتى.

– ءبىزدىڭ ءوڭىر IT سالاسىنداعى بازاسى مىقتى جانە بۇل باعىتتا ناقتى ناتيجەلەر كورسەتىپ كەلەدى. JoLScan اتتى پيلوتتىق جوبا ىسكە قوسىلدى. ول جەدەل جاردەم كولىكتەرىنىڭ كامەرالارىنان الىنعان دەرەكتەر ارقىلى جول جابىنىنداعى اقاۋلاردى انىقتاۋعا مۇمكىندىك بەرەدى. سونىمەن قاتار، «ياندەكس» كومپانياسىمەن بىرلەسىپ «اقىلدى باعدارشامدار» جۇيەسىن ەنگىزدىك – جۇرگىزۋشىلەرگە باعدارشامنىڭ اۋىسۋ ۋاقىتى تۋرالى اقپارات ناقتى ۋاقىت رەجيمىندە بەرىلەدى. ال اقىلدى اۆتوتۇراق جۇيەسى بەينەباقىلاۋ مەن جاساندى ينتەللەكتتى بىرىكتىرىپ، بوس ورىنداردى ونلاين كورسەتەدى، – دەدى ايماق باسشىسى.

اكىم ءبىر ستارتاپتى مىسال رەتىندە كەلتىردى. جوبا 200 مىڭ اقش دوللارى كولەمىندە ينۆەستيتسيا تارتقان. ول ءدامحانالار مەن مەيرامحانالارعا ارنالعان اۆتوماتتاندىرىلعان باقىلاۋ جۇيەسىن ۇسىنادى، بۇل قىزمەت ساپاسىن ارتتىرۋعا، قىزمەتكەرلەردى ىنتالاندىرۋعا جانە ورتاشا چەك كولەمىن ۇلعايتۋعا مۇمكىندىك بەرەدى.

ەرماعانبەت بولەكپاەۆتىڭ ايتۋىنشا، وڭىردە IT-كومپانيالاردان تۇسەتىن سالىق كولەمى جىل سايىن 35 پايىزعا ءوسىپ كەلەدى.

Abai.kz