رەسەي بودانىنداعى شەشەنستاننىڭ اۋىسپايتىن باسشىسى رامزان قادىروۆ كوپتەن بەرى كورىنبەي ءجۇر. دەنساۋلىعى سىر بەرگەن. بىردە ءىسىنىپ-كەۋىپ، بىردە شوپتەي سولىپ جۇرگەن قادىروۆ تامىرىن تەرەڭگە جايىپ العان ەكەن.

شەشەنباسى رامزان قادىروۆتىڭ تۋعان-تۋىستارى تۇگەل دەرلىك بيلىكتىڭ مايلى جىلىگىن ۇستاعانىن باق جازىپ جاتىر. بالا-شاعاسى، كۇيەۋبالالارى، قۇدا-جەگجاتى، بارلىعى 96 ادام ەكەن.

ونشاقتىسى شەشەنستاننىڭ باسشى-قوسشىلىعىندا ءجۇر. شەشەنستان ۇكىمەتىندەگى 20 ورىننىڭ 9-ى قادىروۆتىڭ جانۇياسىنداعىلار. ۇلكەن ۇلى احمات قادىروۆ – سپورت ءمينيسترى، جيەنى ادام چەرحيگوۆ – ترانسپورت ءمينيسترى. 3 كۇيەۋبالاسى –جاستار ءىسى، اۋىل شارۋاشىلىق جانە دەنساۋلىق مينيسترلىكتەرىن باسقارادى.

قادىروۆتىڭ ەكىنشى ۇلى زەلىمحان «احمات» جەكپە-جەك كلۋبىنىڭ ديرەكتورى. سونىمەن بىرگە شەشەنستاننىڭ بوكس فەدەراتسياسىنىڭ پرەزيدەنتى. قىزى ايشات قادىروۆا باستاپقىدا مادەنيەت ءمينيسترىنىڭ ورىنباسارى بولدى، ارتىنشا مينيستر بولىپ تاعايىندالدى. 2023 جىلى شەشەنستان ۇكىمەتىنىڭ توراعا ورىنباسارى قىزمەتىنە تاعايىندالىپ، بيۋدجەتتىڭ باسىم بولىگىن باسقارۋ مۇمكىندىگىنە يە بولدى.

رەسمي اقپارات كوزدەرى رامزان قادىروۆتىڭ 14 بالاسى بارىن ايتادى. ولاردىڭ 7-ەۋى كامەلەتتىك جاسقا تولماعاندار. 6 بالاسى شەشەنستانداعى ساياسي ومىرگە بەلسەندى تۇردە ارالاسۋدا.

رامزاننىڭ ۇلكەن قىزى حاديجات قادىروۆا شەشەنستان پرەزيدەنتى اكىمشىلىگىنىڭ باسشى ورىنباسارى قىزمەتىندە وتىر.

قادىروۆتىڭ 8 جاقىنى فەدەرالدىق دەڭگەيدە لاۋازىمدار العان. قۇدالارى – ادام دەليمحانوۆ پەن سۇلەيمەن گەرەمەەۆتەر دۋما مەن فەدەرالدى كەڭەستە. قادىروۆتىڭ تۋىستارى پۋتين كەڭسەسىندە، رەسەيدىڭ سپورت مينيسترلىگى مەن وقۋ مينيسترلىكتەرىندە ءداۋ كرەسلولارعا جايعاسقان.

Abai.kz