قاراعاندىنىڭ «شاحتيور» فۋتبول كلۋبىن Freedom Holding Corp. توبىنا كىرەتىن، قازاقستاندىق كاسىپكەر تيمۋر تۋرلوۆقا تيەسىلى كومپانيا ساتىپ الدى، دەپ حابارلايدى قاراعاندى وبلىسىنىڭ ءباسپاسوز قىزمەتى.

ساۋدا بۇگىنگى اۋكتسيوندا ءوتتى جانە بۇل قادام مەملەكەت باسشىسىنىڭ بۇقارالىق سپورتتى دامىتۋ جانە فۋتبولدى كوممەرتسيالاندىرۋ جونىندەگى تاپسىرماسىن جۇزەگە اسىرۋ اياسىندا قابىلداندى. جەكەشەلەندىرۋ ءراسىمى زاڭ تالاپتارىنا تولىق سايكەس جۇرگىزىلۋدە.

وسىلايشا «شاحتيور» فۋتبول كلۋبىنىڭ دامۋى مەن ترانسفورماتسياسىنىڭ جاڭا كەزەڭى باستالدى.

قاراعاندى وبلىسىنىڭ اكىمدىگى مەن تانىمال كاسىپكەر تيمۋر تۋرلوۆ وڭىردە جاڭا فۋتبول ەكوجۇيەسىن قۇرۋ جۇمىستارىن باستادى. بۇل ماقساتقا جالپى 18,5 ملرد تەڭگە بولىنگەن: ونىڭ 12 ملرد تەڭگەسى جاڭا فۋتبول اكادەمياسىن سالۋعا، ال 6,5 ملرد تەڭگەسى بالالار-جاسوسپىرىمدەر مەن بۇقارالىق فۋتبولدى دامىتۋعا باعىتتالعان.

قاراعاندى وبلىسىنىڭ فۋتبول قاۋىمداستىعى (QOFA) پرەزيدەنتى تيمۋر تۋرلوۆتىڭ قولداۋىمەن بىرقاتار ءىرى جوبالار ىسكە اسىرىلۋدا: مەكتەپتىك ALGA! جوباسى (2029 جىلعا دەيىن 40 مىڭنان استام مەكتەپ وقۋشىسى مەن 3600 ستۋدەنتتى قامتيدى، فۋتبول باستامالارى 100-دەن استام وقۋ ورنىندا جۇزەگە اسىرىلادى), رەسمي بالالار-جاسوسپىرىمدەر ليگاسى Freedom BFL, زاماناۋي «شاحتيور» فۋتبول اكادەمياسىنىڭ قۇرىلىسى جانە ءوڭىردى كەشەندى دامىتۋ ستراتەگياسى. اكادەميا قاراعاندى وبلىسىنداعى بۇقارالىق جانە كاسىبي فۋتبولدى دامىتۋداعى باستى نىسان بولىپ، ونىڭ ورتالىعىندا بالالار-ءجاسوسپىرىم فۋتبولى، ينفراقۇرىلىمدىق جوبالار مەن الەۋمەتتىك باستامالار ورنالاسادى.

فۋتبول اكادەمياسى شامامەن 10 گەكتار جەردى الادى. جوبا اياسىندا ستاديوننان بولەك جىل بويى دايىندىق جاساۋعا ارنالعان جابىق مانەج، تولىق ولشەمدى جاتتىعۋ الاڭى، ەكى قاباتتى اكىمشىلىك-بولمە كەشەنى، مەديتسينالىق ورتالىق، باسسەين، ساۋنا، اسحانا جانە تاربيەلەنۋشىلەرگە ارنالعان جاتاقحانا قاراستىرىلعان. بارلىق نىساندار جىلى دالىزدەر ارقىلى قوسىلادى، ال اۋماققا ۆوركاۋت-زونا، ترەناجەرلار، ساياباق جانە اۆتوتۇراق ورناتىلادى.

نەگىزگى قۇرىلىس-مونتاج جۇمىستارى 2027 جىلى اياقتالۋى جوسپارلانىپ وتىر.

كادر دايارلاۋ ىسىنە ەرەكشە ءمان بەرىلگەن: جاتتىقتىرۋشىلار ءۇشىن حالىقارالىق تاعىلىمدامالار مەن UEFA ليتسەنزيالارىن الۋ مۇمكىندىگىن قامتيتىن بىلىكتىلىكتى ارتتىرۋ باعدارلامالارى ەنگىزىلگەن.

سپورتتىق ينفراقۇرىلىم تەك قالالاردا عانا ەمەس، اۋىلدىق ەلدى مەكەندەردە دە جۇيەلى تۇردە دامىتىلاتىن بولادى.

Abai.kz