كەشەلى-بەرى باق-تى شۋلاتقان ماسەلەنىڭ ءبىرى - سولتۇستىك قازاقستان وبلىسى جامبىل اۋدانى پەتروۆكا اۋىلى ماڭىندا مىرجاقىپ دۋلاتۇلىنا ارنالعان مەموريالدىق كەشەننىڭ بۇزىلعان فوتوسۋرەتتەردىڭ جەلىدە تارالۋى بولدى.

اتالعان كەشەندى سالعان كاسىپكەرلەر «بۇل يگى شارۋانى اياقتاۋعا اكىمدىك كەدەرگى كەلتىردى» دەگەن ءۋاج ايتقان. ال وعان قارسى جاۋاپ ەرتىندە وبلىس اكىمىنىڭ ورىنباسارى قۇرىلىس رۇقساتسىز باستالعانىن ايتۋدا. وسى ماسەلەنى الەۋمەتتىك جەلىدە كوتەرگەن الاشتانۋشى زاڭعار كارىمحان بولاتىن. ونىڭ جازباسىندا، پەتروۆكا اۋىلىنىڭ ماڭىندا الاشتىڭ اسا كورنەكتى قايراتكەرى، جازۋشى-جۋرناليست، ۇلت ۇرانىنىڭ اۆتورى مىرجاقىپ دۋلاتۇلىنا قۇرمەتىنە قويىلعان مەموريالدىق كەشەن ادەيى قيراتىلعان.

سۋرەت: Abai.kz سكرينى.

ءبىز, Abai.kz اقپاراتتىق پورتالىنىڭ رەداكتسياسى اتىنان سولتۇستىك قازاقستان وبلىسى اكىمدىگىنە، ىشكى ساياسات بولىمىنە، اكىم ورىنباسارى ءجۇسىپ جۇماعالوۆقا تەلەفون شالىپ بايلانىس ورناتا المادىق. بىراق ءباسپاسوز ءبولىمىنىڭ نۇسقاۋىمەن ولاردىڭ باسشىسىنا تەلەفون شالدىق. اتالعان باسشى: «سالدەن كەيىن جاۋاپ جازىپ جىبەرەمىن»، - دەپ قىسقا قايىردى.

ال وسىعان دەيىن باق بەتىندە بۇل ماسەلەگە قاتىستى سولتۇستىك قازاقستان وبلىسىنىڭ ىشكى ساياسات باسقارماسىنىڭ جاۋابىن جاريا ەتتى. وندا: «ميرنىي اۋىلدىق وكرۋگىنىڭ اۋماعىندا كاسىپكەر بارلىباەۆ ناعاشىباي سابارۇلى الاش قىزمەتىن ەسكە الۋ ماقساتىندا ستەللا ورناتقان بولاتىن. الايدا مونۋمەنت ەكى سەبەپكە بايلانىستى بولشەكتەلىپ، كونسەرۆاتسياعا قويىلدى: ستەللا تۇرعىزۋ كەزىندە ماماندار توپىراقتىڭ وتىرۋىن تىركەپ، سونىڭ سالدارىنان قۇرىلىستىڭ قيسايۋى پايدا بولعان. مۇنداي جىلجۋ ستەللانىڭ ورنىقتىلىعى مەن قاۋىپسىزدىگىنە كەرى اسەر ەتۋى مۇمكىن ەدى. قۇجاتتاردىڭ  (ارحيتەكتۋرالىق-جوسپارلاۋ تاپسىرماسى، بەكىتىلگەن ەسكيزدىك جوبا) بولماۋى. مەملەكەتتىك ساۋلەت-قۇرىلىستى باقىلاۋ ورگانى ن.س. بارلىباەۆقا اكىمشىلىك ايىپپۇل سالدى»، - دەپ جازدى.

ەسكەرتۋ: ءبىز الداعى ۋاقىتتا سولتۇستىك قازاقستان وبلىسى اكىمدىگى مەن ونداعى باسشى-قوسشىلار رەداكتسيامىزعا جاۋاپ بەرسە، اتالعان جاۋاپتى جاريالايتىن بولامىز.

Abai.kz