بيىل قاراشا ايىندا ۋكراينانىڭ قارۋلى كۇشتەرى رەسەيدىڭ مۇناي وڭدەۋ زاۋىتتارىنا كەمىندە 14 رەت درونمەن شابۋىل جاساعان. بۇل تۋرالى ازاتتىق راديوسى جازدى.

بۇل سوعىس باستالعالى ءبىر ايدا جاسالعان ەڭ كوپ شابۋىل. مۇنداي اقپاراتتى Bloomberg اگەنتىگى سوعىسىپ جاتقان تاراپتاردىڭ جاريا مالىمدەمەلەرىنە سۇيەنىپ جازدى.

29 قاراشاعا قاراعان ءتۇنى نوۆوروسسيسكىدە قازاقستان مۇنايىنىڭ 80 پايىزدان استامىن ەكسپورتقا شىعاراتىن كاسپي قۇبىر جەلىسى كونسورتسيۋمىنىڭ (كقك) تەڭىز تەرمينالىنا ەكيپاجسىز كاتەرلەر شابۋىلى زاقىم كەلتىردى. شابۋىل سالدارىنان تەڭىز تانكەرلەرىنە مۇناي قۇيىلاتىن ءۇش ايلاق قۇرىلعىسىنىڭ ءبىرى ىستەن شىقتى.

قازاقستاننىڭ ەنەرگەتيكا مينيسترلىگى مۇنايدى حالىقارالىق نارىققا بالاما جولدارمەن جىبەرۋ جاعىن قاراستىرىپ جاتقانىن مالىمدەدى. كرەمل كقك مەن تانكەرلەرگە جاسالعان ۋكراين شابۋىلىن "حالىقارالىق ماڭىزى بار ءارى حالىقارالىق قاتىسۋشىلارى بار نىسانعا" قارسى "شەكتەن شىققان" وقيعا دەپ اتادى.

Bloomberg رەسەي اسكەرى ۋكراينانىڭ ەنەرگەتيكا ينفراقۇرىلىمىنا جانە تۇرعىن ۇيلەردى قوسا العاندا، بەيبىت نىساندارىنا ۇنەمى شابۋىل جاساپ كەلە جاتقانىن دا جازعان.

Abai.kz