سەناتور نۇرتورە ءجۇسىپ 2009 جىلدان بەرى جۇمىس ىستەپ تۇرعان "ديپلوممەن – اۋىلعا" باعدارلاماسىن جان-جاقتى تالداۋدى ۇسىندى. ونىڭ ايتۋىنشا، اۋىلدىق جەرلەردەگى كادر تاپشىلىعىن شەشۋگە باعدارلاما ءتيىمدى بولدى ما دەگەن سۇراق بار، دەپ حابارلايدى inbusiness.kz سايتى.

"قازاقستاندا 2009 جىلدان بەرى "ديپلوممەن – اۋىلعا" مەملەكەتتىك باعدارلاماسى جۇزەگە اسىرىلىپ كەلەدى. باعدارلاما دەنساۋلىق ساقتاۋ، ءبىلىم بەرۋ، الەۋمەتتىك قورعاۋ، مادەنيەت، سپورت، اگروونەركاسىپتىك كەشەن، سونداي-اق جەرگىلىكتى مەملەكەتتىك باسقارۋ ورگاندارىنا ديپلومدى مامانداردى تارتۋدى كوزدەيدى. 2025 جىلى اۋىلعا جىبەرىلەتىن ماماندارعا بيۋدجەتتىك كرەديتتەرگە 25 ملرد تەڭگە قاراستىرىلعان. "ديپلوممەن – اۋىلعا" باعدارلاماسىنا قاتىسۋشىلارعا 100 اەك مولشەرىندە بىرجولعى كوتەرمە جاردەماقى، تۇرعىن ءۇي ساتىپ الۋعا نەمەسە سالۋعا 2 مىڭنان 2,5 مىڭعا دەيىنگى اەك كورسەتكىشتە 15 جىلعا نەسيە بەرىلەدى جانە مىندەتتى شارت اۋىلدىق جەردە كەمىندە 3 جىل جۇمىس ىستەۋ كەرەك", – دەدى سەناتور.

نۇرتورە ءجۇسىپ كەلتىرگەن دەرەكتەرگە سۇيەنسەك، 2009-2024 جىلدار ارالىعىندا 114 مىڭنان استام مامان 23,6 ملرد تەڭگەگە جاردەماقى العان.

"52 مىڭعا جۋىق مامان 189,5 ملرد تەڭگە كولەمىندە بيۋدجەتتىك كرەديتتەردى پايدالانعان. سوڭعى ءۇش جىلدا مىندەتتەمەلەرىن ورىنداماعان 166 ادام، جالپى سوماسى – 784,2 ملن تەڭگە. مەملەكەت قاراجات ءبولىپ كەلەدى، بىراق اۋىلدىق جەرلەردەگى كادر تاپشىلىعىن شەشۋگە باعدارلاما ءتيىمدى بولدى ما دەگەن سۇراق بار. بۇگىندە حالىقتىڭ 37 پايىزى، ياعني 4 ملن-عا جۋىق ادام اۋىلدا تۇرادى. تەك سولتۇستىك قازاقستان وبلىسىنىڭ وزىندە 2025-2027 جىلدار ارالىعىندا كادردىڭ قاجەتتىلىگى 3043 اۆدامدى قۇرايدى. 114 مىڭ ادام كوتەرمە اقى العانىمەن، تەك 52 مىڭى عانا تۇرعىن ۇيمەن قامتاماسىز ەتىلگەن", – دەپ اتاپ ءوتتى ول.

سەنات دەپۋتاتى اۋىلدا قانشا ماماننىڭ تۇراقتاپ قالعانى بويىنشا ناقتى كورسەتكىشتەر اشىق ەمەس ەكەنىن جەتكىزدى.

"اقشانى الادى، قالتاعا سالادى. ۋاقىت وتەدى، اۋىلدان كەتەدى. جاردەماقىلار ماماندى تارتۋعا كومەكتەسەدى، بىراق تۇراقتى قامتۋعا جەتكىلىكتى موتيۆاتسيا بەرمەيدى. باعدارلاماعا قاتىسۋشىلاردىڭ ءومىر ءسۇرۋ ساپاسى، جالاقىسى، الەۋمەتتىك ينفراقۇرىلىمدارعا قولجەتىمدىلىگىنە قاتىستى تولىققاندى تالداۋ جوق. (...) باعدارلاما ماڭىزدى بولعانىمەن، ونى ىسكە اسىرۋدا بىرقاتار جۇيەلى ماسەلەلەر بار. ءبىرىنشى – بىرجولعى تولەم العانىنا قاراماستان، جاس مامان اۋىلداعى جۇمىستى ۇزاقمەرزىمدى ستراتەگيا ەمەس، ۋاقىتشا شارا رەتىندە قاراستىرادى. ناتيجەسىندە مىندەتتى مەرزىم اياقتالعاننان كەيىن، اۋىلدا قالمايدى. ەكىنشى – ساپالى تۇرعىن ۇيگە قولجەتىمدىلىك جەتكىلىكسىز. ءۇشىنشى – اكىمشىلىك كەدەرگىلەر، وڭىردە باعدارلاما شارتتارى ءارتۇرلى تۇسىندىرىلەدى. وتىنىمدەر ۇزاق قارالادى، كوپ انىقتامالار سۇرالادى. ءتورتىنشى – وڭىرلەر اراسىندا قاتىسۋ دەڭگەيى ءارتۇرلى. بەسىنشى – باعدارلاما مونوقالالاردى قامتىمايدى. وندا دا كادر تاپشىلىعى وتكىر تۇر. سوندىقتان "ديپلوممەن – مونوقالاعا" دەگەن باعدارلامانى قۇرۋ دا وزەكتى دەپ ەسەپتەيمىز", – دەدى نورتورە ءجۇسىپ.

سەناتور باعدارلامانىڭ الەۋەتى جوعارى، بىراق تيىمدىلىگى تومەن ەكەنىن باسا ايتتى. ونىڭ سوزىنشە، اۋىلداعى ينفراقۇرىلىمدى، ەڭبەك جاعدايلارىن جانە الەۋمەتتىك ورتانى كەشەندى جاقسارتۋ قاجەت. سونىمەن قاتار باعدارلامانى جان-جاقتى قاراۋ دا ۇسىنىلىپ وتىر.

Abai.kz