ءبىر كۇنى اۋىلدىڭ قاراپايىم بوزبالاسى ۇيىندە وتىرىپ ءان شىرقايدى. اعاسى ونى بەينەجازباعا ءتۇسىرىپ، الەۋمەتتىك جەلىگە جۇكتەپ جىبەرەدى.

مىنە، وسى ساتتەن باستاپ اتالعان جاس بالانىڭ ءومىرى 180 گرادۋسقا وزگەرەدى. تەلەفونىنا ەلورداسى - استانا قالاسىنان قوڭىراۋ ءتۇسىپ، قازىرگى ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ مۋزىكالىق تەاتر اكتەرى ماماندىعىنا شاقىرتۋ تۇسەدى. جاس جىگىت وعان قۋانعانىمەن اياق-استىنان اياۋلى اناسى دۇنيەدەن ءوتىپ، وتباسىنىڭ باسىنا ۇلكەن قايعى كەلەدى. بىراق، اسقار تاۋ اكە بالاسىنا اق باتاسىن بەرىپ، اتا جۇرتىنا شىعارىپ سالادى. مەيىرىمدى اكەنىڭ باتاسىن العان ول ازامات بۇگىنگى استانا مۋزىكالىق جاس كورەرمەندەر تەاترىنىڭ اكتەرى نۇرجاس سادىرباەۆ بولاتىن.

سونىمەن، اكە باتاسىمەن، ونەرگە دەگەن جالىنمەن، ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ مۋزىكالىق تەاتر اكتەرى ماماندىعىنا وقۋعا قابىلدانادى.

اكتەر جانى – ساحنادا ادام وبرازىن شىنايى جاساۋ ءۇشىن اكتەردىڭ ءوز ىشىندە جۇرەتىن سەزىم، تولعانىس، وي، ەموتسيا جيىنتىعى. ال نۇرجاس تەاتر الاڭىندا وسى قاسيەتتى جاقسى ۇعىنادى. ونەرسۇيەر قاۋىم نۇرجاستى ع.مۇسىرەپوۆتىڭ "قىز جىبەك" ميۋزيكلىندەگى تولەگەن، م.اۋەزوۆتىڭ "اباي-توعجان" دراماسىنداعى اباي، د.يسابەكوۆتىڭ "گاۋحارتاس" مۋزىكالىق دراماسىنداعى قايىركەن ارقىلى جاقسى تانيدى.

"تولەگەن-نۇرجاس" كوزىندەگى جالىنداعان وتى بار، تەك قانا جىبەكتى عانا ەمەس، وزگە دە، ارۋلاردى كوزقاراسىمەن عاشىق ەتەر كەيىپكەر. نۇرجاس تولەگەندى رۋحاني تازا، ادىلەتتى، ءمارت كەيىپكەر رەتىندە كورسەتەدى. سونداي-اق، تولەگەن اكتەر ورىنداۋىندا تەك جەكە كەيىپكەر رەتىندە ەمەس، ماحاببات جولىندا كۇرەسكەن، ەرلىك پەن ادالدىقتى تۋ ەتكەن حالىقتىق سيپاتتاعى تۇلعا ەتىپ بەينەلەنەدى. ونىڭ تراگەديالىق تاعدىرى ارقىلى نۇرجاس سۇيىسپەنشىلىك قۇرباندىعىن، ادامدىق مۇراتتىڭ جوعارىلىعىن كورسەتەدى.

نۇرجاستىڭ ەرەكشە كەيىپكەرلەرىنىڭ ءبىرى - اباي بەينەسى. "نۇرجاس-اباي" البىرت سەزىم مەن ادالدىقتى قاتار ۇستانعان، ءوزىنىڭ اينالاسىن جاقسىلىققا بولەيتىن جاس اقىننىڭ بەينەسى. "اباي-نۇرجاس" ۇلى اقىننىڭ جاستىق كەزىندەگى سەرىلىك داۋرەنىڭ، ەركەلىگىن ۇتىمدى كورسەتە الدى. نۇرجاس ويىنىنان توعجانعا دەگەن قاتىناسىن، ەربولعا دەگەن سىيلاستىعىن، قۇنانبايعا دەگەن قۇرمەتىن جەتە تۇسىنگەن ابايدى كورەمىز. دراماداعى اباي – رۋحاني بيىك، ادامدىق مۇراتى مىقتى، جۇرەگى نازىك، اقىلى وزىق تۇلعا. ونىڭ بەينەسى قازاق ادەبيەتىندەگى ەڭ اسەم رومانتيكالىق جانە فيلوسوفيالىق كەيىپكەرلەردىڭ ءبىرى رەتىندە كورىنەدى.

دۋلات يسابەكوۆتىڭ "گاۋحارتاس" مۋزىكالىق دراماسى كوپشىلىكتىڭ جۇرەگىنەن ورىن تاپقان قويىلىم ەكەنى داۋسىز. نۇرجاس اتالمىش تۋىندى دا، قايىركەندى نۇسقالايدى. "قايىركەن-نۇرجاس" ەنەرگياعا تولى ءاردايىم ومىرگە وپتيميزممەن قارايتىن جان. "قايىركەن-نۇرجاس" اقىلدى ەركەلىكتىڭ سيمۆولى. ونىڭ اكەسىنە، اناسىنا، اعاسى مەن جەڭگەسىنە دەگەن اق پەيىلى كورەرمەندى سۇيسىنتەدى.

قر ەڭبەك سىڭىرگەن قايراتكەرى، ءا.سىعاي: «اكتەر - جۇرەك، باس، جۇرەك»، - دەيدى. ياعني، ءرولدى جۇرەگىمەن قابىلداپ، ميعا سالىپ ويلانىپ، جۇرەگىمەن كورەرمەنگە جەتكىزەدى. داڭقتى سىنشىنىڭ ۇلاعاتتى ءسوزى، "نۇرجاس-قايىركەننىڭ" سالتاناتپەن قوشتاساتىن ساحناسىنا ايتىلعانداي. ويتكەنى، "قايىركەن-نۇرجاس" سالتاناتتىڭ زياراتىمەن قوشتاسىپ جاتقاندا، وسىدان بىرنەشە جىل بۇرىن ءوزىنىڭ اناسىنىڭ بەيىتىمەن قوشتاسقان ءساتى ەسىنە تۇسەدى. مىنە، جۇرەكپەن جەتكىزۋ دەگەن وسى. نۇرجاستىڭ باعىندىرار بيىگى الدا!

باحتيار تۇرسىن

تەاترتانۋشى

Abai.kz