مەملەكەت باسشىسى حالىقارالىق بەيبىتشىلىك جانە سەنىم جىلىنا، حالىقارالىق بەيتاراپتىق كۇنى مەن تۇرىكمەنستاننىڭ تۇراقتى بەيتاراپتىعىنىڭ 30 جىلدىعىنا ارنالعان فورۋمعا قاتىستى.

وسى ورايدا قاسىم-جومارت توقاەۆ تۇرىكمەن حالقىنىڭ ۇلت كوشباسشىسى گۋربانگۋلى بەردىمۇحامەدوۆ پەن پرەزيدەنت سەردار بەردىمۇحامەدوۆتى تۇرىكمەنستاننىڭ تۇراقتى بەيتاراپتىعىنىڭ 30 جىلدىعىمەن قۇتتىقتادى. سونداي-اق مەملەكەت باسشىسى تۇرىكمەنستاننىڭ ساياسي ۇستانىمى تۇتاس ەۋرازيا قۇرلىعىنىڭ تۇراقتىلىعى مەن ورنىقتى دامۋىنا ەلەۋلى ۇلەس قوسقانىن اتاپ ءوتتى.

اتالعان فورۋمدا كوتەرىلگەن باستامالار ءححى عاسىرداعى بەيتاراپتىقتىڭ ءمان-ماڭىزىنا جاڭاشا كوزقاراس قالىپتاستىرادى. قازاقستان پرەزيدەنتى تۇرىكمەنستاننىڭ بەيتاراپ ساياسي ۇستانىمى تۇرىكمەن حالقىنىڭ سان عاسىرلىق مادەني داستۇرىمەن جانە رۋحاني قۇندىلىقتارىمەن ۇيلەسەتىنىن ايتتى. «تۇرىكمەن كلاسسيكالىق ادەبيەتىنىڭ نەگىزىن قالاۋشى، شىعىستىڭ كورنەكتى ويشىلى ماقتىمقۇلى پىراعى: «تىنىشتىق بولسا ەل وسەدى، ادىلدىك بولسا سەنىم كۇشەيەدى» دەگەن. ۇلى دانىشپاننىڭ دۇنيەنى تەرەڭ تانىعان يدەيالارى قازىرگىدەي الماعايىپ حالىقارالىق جاعدايدا دا وتە وزەكتى بولا تۇسكەنى ءسوزسىز» – دەدى قاسىم-جومارت توقاەۆ ءوز سوزىندە.

تاراپتار ەكىجاقتى قارىم-قاتىناستى دامىتۋ پەرسپەكتيۆاسىن تالقىلادى. سەردار بەردىمۇحامەدوۆتىڭ تاياۋدا استاناعا جاساعان مەملەكەتتىك ساپارى كەزىندە قول جەتكىزىلگەن ۋاعدالاستىقتاردى جۇزەگە اسىرۋ بارىسىنا ايرىقشا ءمان بەرىلدى. مەملەكەت باسشىسى مەرەيلى ساتكە وراي ۇيىمداستىرىلعان حالىقارالىق فورۋمدا كوتەرىلەتىن ماسەلەلەردىڭ ماڭىزىن اتاپ ءوتتى. «اشحاباد سەكىلدى كوركەم شاھارعا شاقىرعانىڭىز ءۇشىن ريزاشىلىعىمدى بىلدىرەمىن. مۇندا كەلگەن سايىن قوناقجاي پەيىلدەرىڭىزدى، تۋىستىق ءارى دوستىق كوڭىلدەرىڭىزدى سەزىنەمىز. ەرتەڭگى فورۋم وزىنە جۇكتەلگەن مىندەتتى تولىق اتقارىپ شىعاتىنىنا جانە حالىقارالىق قاتىناستار تاريحىندا ايتۋلى ۋاقيعا بولاتىنىنا سەنىمدىمىن. ويتكەنى بۇل جيىندا بەيبىتشىلىك، بەيتاراپتىلىق جانە سەنىم سەكىلدى ەڭ وزەكتى تاقىرىپتار قوزعالادى. قازىرگى الەمگە جەتپەي تۇرعانى دا وسى قۇندىلىقتار»، – دەدى قاسىم-جومارت توقاەۆ.

تۇرىكمەنستان پرەزيدەنتى مەملەكەت باسشىسىمەن اشحاباد قالاسىندا جۇزدەسكەنىنە قۋانىشتى ەكەنىن جەتكىزدى. «وسى حالىقارالىق دەڭگەيدەگى فورۋمعا قاتىسۋ ارقىلى ءسىز بەيبىتشىلىكتى، سەنىم مەن ءوزارا تۇسىنىستىكتى نىعايتۋعا بەيىل ەكەنىڭىزدى كورسەتىپ وتىرسىز. حالىقارالىق بەيبىتشىلىك جانە سەنىم فورۋمىنا شاقىرۋىمدى قابىل العانىڭىز ءۇشىن سىزگە العىس ايتامىن. وزىڭىزبەن تۇرىكمەن جەرىندە كەزدەسۋ ءبىز ءۇشىن زور مارتەبە» ، – دەدى سەردار بەردىمۇحامەدوۆ. مەملەكەتتەر باسشىلارى ءوزارا ساۋدا كولەمىن ارتتىرۋ، ەكونوميكالىق بايلانىستاردى كۇشەيتۋ، ەنەرگەتيكا، كولىك-لوگيستيكا جانە اۋىل شارۋاشىلىعى سالالارىندا بىرلەسكەن جوبالاردى جۇزەگە اسىرۋ ماسەلەلەرىن قاراستىردى.

قازاقستان مەن تۇركىمەنستان اراسىنداعى قارىم-قاتىناس تاريحي ورتاق تامىرلار مەن رۋحاني جاقىندىققا سۇيەنەدى. ەكى مەملەكەت كوپ جىلدان بەرى دوستىق پەن ءوزارا تۇسىنىستىككە نەگىزدەلگەن بايلانىستى دامىتىپ كەلەدى. قازىرگى ۋاقىتتا ەكى ەلدىڭ ىنتىماقتاستىعىن رەتتەيتىن شامامەن 80 قۇجات بار، ولاردىڭ ىشىندە 1997 جىلعى ىنتىماقتاستىقتى تەرەڭدەتۋ تۋرالى دەكلاراتسيا جانە 2017 جىلعى ستراتەگيالىق ارىپتەستىك تۋرالى كەلىسىم ەرەكشە ورىن الادى.

حالىقارالىق ارەنادا، اسىرەسە بۇۇ، تمد، يىۇ جانە باسقا دا الاڭداردا تاراپتار ءبىر-بىرىنە قولداۋ كورسەتىپ، ۇيلەستىرىلگەن سىرتقى ساياسات جۇرگىزۋدە. قازاقستان تۇركىمەنستاننىڭ بەيتاراپتىق ساياساتىن نىعايتۋعا جانە بەيبىت ىنتىماقتاستىقتى كەڭەيتۋگە ارنالعان باستامالارىن قۇپتايدى، سونىمەن قاتار ەنەرگەتيكا مەن كولىك سالاسىنداعى قاۋىپسىز ءارى ءتيىمدى بايلانىستاردى دامىتۋعا مۇددەلى. ال يادرولىق قارۋسىزدانۋ سالاسىنداعى ورتاق ۇستانىم ەكى ەلدىڭ الەمدىك قاۋىپسىزدىككە جاۋاپكەرشىلىگى زور ەكەنىن ايقىندايدى. قازاقستان مەن تۇركىمەنستان ورتالىق ازيانى يادرولىق قارۋدان ازات ايماق رەتىندە قالىپتاستىرۋ تۋرالى شارتتى ىسكە اسىرۋعا دايىندىق ءبىلدىرىپ وتىر. وڭىرلىك دەڭگەيدە دە ەكى مەملەكەت ينتەگراتسيالىق ۇردىستەردى قولدايدى. تۇركىمەنستان قازاقستان ۇسىنعان «ورتالىق ازيا – 2040» تۇجىرىمداماسىن ماقۇلداپ، ءوڭىردىڭ بولاشاعىنا قاتىستى ورتاق ستراتەگيالىق كوزقاراستى نىعايتتى.

ەكونوميكالىق بايلانىستار سوڭعى جىلدارى ايتارلىقتاي جانداندى. ساۋدا كولەمىنىڭ ءوسىمى، ەنەرگيا، ونەركاسىپ جانە كولىك سالاسىنداعى پەرسپەكتيۆالىق جوبالار ءوزارا سەرىكتەستىكتى تەرەڭدەتۋگە مۇمكىندىك بەرىپ وتىر. كولىك دالىزدەرىن دامىتۋ ترانزيتتىك الەۋەتتى ارتتىرىپ، ەكى ەلدىڭ وڭىرلىك ەكونوميكالىق جۇيەدەگى ءرولىن كۇشەيتۋدە. جالپى العاندا، ەكىجاقتى قاتىناستار تەك دوستىق سيپاتتاعى دەكلاراتسيالارمەن شەكتەلمەي، ناقتى ءارى تۇراقتى تەتىكتەرگە سۇيەنەدى. بۇل ءوز كەزەگىندە ورتالىق ازيادا سەنىم مەن تۇراقتىلىققا نەگىزدەلگەن كەڭىستىكتى قالىپتاستىرۋعا ىقپال ەتەدى.

ەكونوميكالىق سەرىكتەستىكتىڭ جاڭا كەزەڭى

تۇركىمەنستان پرەزيدەنتىنىڭ قازاقستانعا ساپارى  ەكى ەل اراسىنداعى سەرىكتەستىكتىڭ ستراتەگيالىق دەڭگەيدە نىعايعانىن كورسەتەتىن ماڭىزدى وقيعا. تاراپتار ەنەرگەتيكا، كولىك جانە لوگيستيكا سياقتى نەگىزگى سالالارداعى ىنتىماقتاستىقتى كەڭەيتۋگە مۇددەلى. وسىنداي جوعارى دەڭگەيدەگى كەزدەسۋلەر ەكونوميكالىق ءوزارا ارەكەتتەسۋدى ساپالى جاڭا ساتىعا كوتەرەدى. الماتىدا جانە اشحابادتا ساۋدا ۇيلەرىن قۇرۋ يدەياسى قاراستىرىلىپ جاتىر. بۇل باستاما تاۋار اينالىمىن ۇلعايتۋعا، ۇلتتىق ونىمدەردى تانىتۋعا جانە بيزنەس بايلانىستاردى دامىتۋعا كوپ مۇمكىندىك بەرەدى. سونىمەن قاتار اگرارلىق سەكتور، ونەركاسىپ، ەنەرگەتيكا جانە كولىك سالالارىنداعى ارىپتەستىكتى كۇشەيتۋ ماسەلەلەرى دە تالقىلانۋدا.

كولىك ينفراقۇرىلىمىن جەتىلدىرۋ جوبالارى بەلسەندى ىسكە اسۋدا. قازاقستان-تۇركىمەنستان شەكاراسىنداعى اۆتوموبيل جولدارىن قيىستىرۋ جۇمىستارى جۇك جانە ترانزيتتىك تاسىمالداردىڭ تيىمدىلىگىن ارتتىرۋعا باعىتتالعان. اۋە قاتىناسىن قايتا قالپىنا كەلتىرۋ ماسەلەسى دە كۇن تارتىبىندە، بۇل ازاماتتاردىڭ ساپارلاۋ مۇمكىندىكتەرىن كەڭەيتەدى. بۇل شارالاردىڭ بارلىعى ۇزاق مەرزىمدى سەرىكتەستىكتى دامىتۋعا باعىتتالعان. قازاقستاننىڭ وڭىردەگى لوگيستيكالىق ورتالىق رەتىندەگى ءرولى نىعايىپ كەلەدى. بۇعان قوسا، قازاقستان-تۇركىمەنستان ىسكەرلىك كەڭەسىنىڭ جۇمىسىنىڭ جاندانۋى مەملەكەتتىك ورگاندار مەن بيزنەس وكىلدەرى اراسىنداعى بايلانىستاردى كۇشەيتۋگە ىقپال ەتەدى. بارلىق وسى قادامدار ينۆەستيتسيالار مەن كاسىپكەرلىك ءۇشىن بولجامدى، سەنىمدى جانە تۇراقتى ورتا قالىپتاستىرادى. دەمەك، مۇنداي ساپارلار ديپلوماتيالىق راسىمنەن گورى ەكىجاقتى ەكونوميكالىق دامۋدى قولداۋعا باعىتتالعان ناقتى ستراتەگيالىق قادام رەتىندە باعالانادى.

ساۋدا سالاسىنداعى بايلانىستاردىڭ نىعايۋى

قازاقستان مەن تۇركىمەنستان تاۋار اينالىمىن ارتتىرۋعا باسا ءمان بەرىپ وتىر. جاقىن پەرسپەكتيۆادا ءوزارا ساۋدا كولەمىن 1 ملرد اقش دوللارىنا جەتكىزۋ ماقساتى قويىلعان، بۇل ەكى ەكونوميكانىڭ ءوزارا بايلانىسىنىڭ ارتىپ كەلە جاتقانىن كورسەتەدى. سوڭعى جىلدارى ساۋدا كولەمى تۇراقتى ءوسىمدى كورسەتىپ، ەكى جىل قاتارىنان 500 ملن دوللاردان جوعارى دەڭگەيدە ساقتالدى. ەڭ الەۋەتتى سالالارعا مۇناي-گاز حيمياسى، مەتاللۋرگيا، اۋىل شارۋاشىلىعى ونىمدەرى، قۇرىلىس يندۋسترياسى جانە ماشينا جاساۋ كىرەدى. قازاقستان ساۋدا جانە ينتەگراتسيا مينيسترلىگى ساۋدا قاتىناستارىن ءارى قاراي دامىتۋعا ارنالعان جوبانى ازىرلەدى. بۇل جوبا اياسىندا الماتى مەن اشحابادتا ارنايى ساۋدا ۇيلەرىن اشۋ جوسپاردا بار. ولار كاسىپكەرلەر ءۇشىن جاڭا مۇمكىندىكتەر ۇسىناتىن كوممۋنيكاتسيالىق جانە ماركەتينگتىك الاڭعا اينالماق. ناتيجەسىندە ەكى ەل اراسىنداعى ەكونوميكالىق ىقپالداستىق ناقتى ءارى تۇراقتى سەرپىن الادى.

ەنەرگەتيكالىق ىنتىماقتاستىق

ەنەرگەتيكا سالاسى ەكىجاقتى ىنتىماقتاستىقتىڭ باستى باعىتتارىنىڭ ءبىرى بولىپ قالا بەرەدى. تۇركىمەنستان تابيعي گاز قورىنىڭ مولدىعىنا سۇيەنىپ، ەكسپورت اۋقىمىن كەڭەيتۋگە مۇددەلى بولسا، قازاقستاننىڭ دامىعان كولىك ينفراقۇرىلىمى ەنەرگورەسۋرستار ءترانزيتىن ءتيىمدى ۇيىمداستىرۋعا مۇمكىندىك بەرەدى. ۇكىمەتارالىق باعدارلامالار ەنەرگەتيكالىق ينفراقۇرىلىمدى جاڭارتۋ جانە ورتاق جوبالاردى ىسكە اسىرۋعا باعىتتالعان. قازاقستان تۇركىمەنستانداعى بىرقاتار گازكوندەنساتتى كەن ورىندارىن يگەرۋ مەن قۇبىر جەلىلەرىن كەڭەيتۋگە قاتىسۋعا دايىن. «QazaqGaz» بەن «تۇركمەنگاز» اراسىنداعى كەلىسىم – وسى سالانىڭ دامۋىنا نەگىز بولاتىن ماڭىزدى قۇجات. سونداي-اق كاسپي ايماعىندا قازاقستاندىق مۇناي-سەرۆيس كومپانيالارى ءۇشىن ىنتىماقتاستىق مۇمكىندىكتەرىن قاراستىرۋ ءجۇرىپ جاتىر. ەنەرگەتيكالىق بايلانىستار ترانزيتتىك باعىتتاردى ءارتاراپتاندىرىپ، ايماقتىڭ ەنەرگەتيكالىق قاۋىپسىزدىگىن كۇشەيتەدى.

مەملەكەت باسشىسى قاسىم-جومارت توقاەۆ كوتەرگەن ماسەلەلەر: 

قازاقستان پرەزيدەنتى قاسىم-جومارت توقاەۆ وسى كەزدەسۋدە جاھاندىق قاۋىپسىزدىك، سۋ رەسۋرستارىن باسقارۋ، ەكولوگيالىق سىن-قاتەرلەر، ايماقتىق ىنتىماقتاستىق، دىندەر اراسىنداعى ديالوگ جانە جاھاندىق قاقتىعىستاردى رەتتەۋ ماسەلەلەرىن تۇراقتى تۇردە نازارعا الدى. اشحابادتاعى فورۋم مەن باسقا دا حالىقارالىق الاڭدار بارىسىندا مەملەكەت باسشىسى بىرنەشە ستراتەگيالىق ماڭىزى بار باستامالاردى جاريالادى.

1. حالىقارالىق سۋ ۇيىمىن قۇرۋ باستاماسى

توقاەۆ جاھاندىق سۋ ديپلوماتياسىنىڭ وزەكتىلىگىن ەرەكشە اتاپ ءوتىپ، بۇۇ قۇرىلىمىندا سۋ پروبلەمالارىمەن تىكەلەي اينالىساتىن ارنايى ورگاننىڭ جوقتىعىنا نازار اۋداردى. وسىعان وراي، بۇۇ قۇرامىندا حالىقارالىق سۋ ۇيىمىن قۇرۋدى ۇسىندى. بۇگىندە كوورديناتسيالىق ءرول اتقارىپ وتىرعان UN-Water تەتىگىن تولىققاندى اگەنتتىككە اينالدىرۋ ءتيىمدى بولاتىنىن ايتتى. استانادا وتەتىن ايماقتىق ەكولوگيالىق سامميتتە جاھاندىق سۋ ۇيىمىن قۇرۋ بويىنشا حالىقارالىق كونسۋلتاتسيانى باستاۋعا دايىن ەكەنىن مالىمدەدى. بۇل ۇسىنىس بۇۇ ورنىقتى دامۋ ماقساتتارىنا جانە حالىقارالىق قاۋىمداستىقتىڭ ورتاق مۇددەلەرىنە ساي كەلەتىنى اتاپ ءوتىلدى.

2. سۋ قاۋىپسىزدىگى جانە ترانسشەكارالىق رەسۋرستار

پرەزيدەنت سۋ تاپشىلىعىنىڭ ۋشىعۋىن ايماقتىق قاۋىپسىزدىككە تونگەن ۇلكەن قاتەر رەتىندە سيپاتتادى. ول ترانسشەكارالىق سۋ رەسۋرستارىن ءتيىمدى ءارى ءادىل پايدالانۋ قاجەتتىگىنە توقتالدى. ارال جانە كاسپي تەڭىزدەرىندەگى ەكولوگيالىق احۋالدىڭ ناشارلاۋىن دەرەۋ شەشۋدى تالاپ ەتەتىن ماسەلە رەتىندە كورسەتتى. حالىقارالىق ارالدى قۇتقارۋ قورىنىڭ جۇمىسىن ورتاق مامىلەگە نەگىزدەلگەن ءىس-قيمىلدار ارقىلى كۇشەيتۋگە شاقىردى.  كاسپيدىڭ تارتىلۋىنىڭ قاۋىپىن ەسكەرتىپ، ارنايى مەملەكەتارالىق باعدارلاما ازىرلەۋ باستاماسىن كوتەردى. پرەزيدەنت الەمدىك قاۋىمداستىقتى كاسپيدى ساقتاپ قالۋ جولىندا كۇش بىرىكتىرۋگە ۇندەدى.

3. «بەيبىتشىلىك قوزعالىسى» باستاماسىنىڭ ءمانى

VIII الەمدىك جانە ءداستۇرلى دىندەر كوشباسشىلارىنىڭ سەزىندە قازاقستان كوتەرگەن «بەيبىتشىلىك قوزعالىسى» باستاماسىنىڭ ماڭىزىن توقاەۆ كەڭىنەن ءتۇسىندىردى. بۇل  ادامزاتقا قاۋىپ ءتوندىرىپ وتىرعان قانتوگىس پەن جانجالداردى توقتاتۋعا شاقىراتىن ۇندەۋ; دىنارالىق، ەتنوسارالىق جانە مادەنيەتارالىق ديالوگقا قازاقستاننىڭ تۇراقتى ۇلەسى; جاھاندىق كەلىسىمگە كەلۋدىڭ ورتاق جاۋاپكەرشىلىگىن سەزىندىرۋ ماقساتىندا جاسالعان قادام. پرەزيدەنت شىۇ-نىڭ ءتيىمدى جۇمىسىنا دا توقتالىپ، بۇل ۇيىمنىڭ ەۋرازيا قاۋىپسىزدىگى ءۇشىن ماڭىزى زور ەكەنىن ايتتى.

4. ەكونوميكالىق سىن-قاتەرلەر جانە ايماقتىق دامۋ

ق.توقاەۆ قازىرگى گەوساياسي احۋالدىڭ الەم ەكونوميكاسىنا تيگىزگەن اسەرىن اتاپ ءوتتى. گەوساياسي تەكەتىرەس، سانكتسيالار جانە تەحنولوگيالىق باسەكەنىڭ كۇشەيۋى الەمدىك ءوسىمدى باياۋلاتقانى ايتىلدى. ورتالىق ازيا ەلدەرىنىڭ ەكونوميكاسى، سونىڭ ىشىندە قازاقستاننىڭ، وڭ ديناميكا ساقتاپ وتىرعانىنا نازار اۋداردى. قازاقستاننىڭ ەكونوميكاسى بيىل 6 پايىزدان اسقانىن، ءىجو 300 ملرد دوللارعا جەتكەنىن جانە جان باسىنا شاققاندا ءىجو 15 مىڭ دوللاردان جوعارىلاعانىن باياندادى. سونىمەن قاتار پرەزيدەنت ءوڭىردىڭ كولىك-ترانزيت الەۋەتىن كۇشەيتۋگە باعىتتالعان ءىرى جوبالاردى اتاپ ءوتتى.  ترانسكاسپي حالىقارالىق كولىك باعدارى (تحكب) كەڭەيىپ جاتىر; تەمىرجول، پورت جانە اۆتوجول ينفراقۇرىلىمى جاڭعىرتىلۋدا; ورتالىق ازيا كولىك جۇيەسىن دامىتۋ ستراتەگياسى ازىرلەنۋدە.

5. تاياۋ شىعىس جانە كاۆكازداعى جاعداي

مەملەكەت باسشىسى الەمدەگى قاۋىپسىزدىك ماسەلەلەرى بويىنشا قازاقستاننىڭ ۇستانىمدارىن ءبىلدىردى. قازاقستان يبراھيم كەلىسىمدەرىنە قوسىلۋ ارقىلى وڭىردەگى تۇراقتىلىقتى قولداۋعا نيەتتى. دەگەنمەن، تولىق بەيبىتشىلىك تەك تاۋەلسىز پالەستينا مەملەكەتىنىڭ قۇرىلۋىمەن مۇمكىن بولاتىنىن ايتتى. ازەربايجان مەن ارمەنيانىڭ بەيبىتشىلىك تۋرالى دەكلاراتسياسىن تاريحي شەشىم دەپ اتادى. تاعى دا كەڭ اۋقىمدى ىنتىماقتاستىققا جول اشاتىن تولىق فورماتتى بەيبىت كەلىسىمگە ءۇمىت ءبىلدىردى.

6. ۋكرايناداعى قاقتىعىستى رەتتەۋ

پرەزيدەنت جاھاندىق دەرجاۆالاردىڭ ديالوگ جۇرگىزۋىنىڭ ماڭىزىنا توقتالدى. قازاقستان ۋكرايناداعى قاقتىعىستى رەتتەۋ بويىنشا كەلىسسوزدەردىڭ جاندانۋىن قولدايدى. انكوريدجدەگى رەسەي مەن اقش پرەزيدەنتتەرى كەزدەسۋىنەن كەيىن بەيبىتشىلىك پاكتىسىنىڭ نەگىزگى ەرەجەلەرىن تالقىلاۋ باستالعانىن وڭ قۇبىلىس دەپ باعالايدى.

7. بۇۇ بەيبىتشىلىك جانە بەيتاراپتىق ۋنيۆەرسيتەتىنە قولداۋ

توقاەۆ تۇرىكمەنستان پرەزيدەنتىنىڭ بۇۇ اياسىندا بەيبىتشىلىك جانە بەيتاراپتىق ۋنيۆەرسيتەتىن قۇرۋ ۇسىنىسىن قولدايتىنىن مالىمدەدى. بۇل باستاما ءبىلىم، بەيبىتشىلىك جانە ديپلوماتيا سالاسىنداعى حالىقارالىق ارىپتەستىكتى كۇشەيتۋگە باعىتتالعان.

قاسىم-جومارت توقاەۆ كوتەرگەن ماسەلەلەردىڭ اۋقىمى وتە كەڭ جانە ستراتەگيالىق مانگە يە. پرەزيدەنتتىڭ ۇسىنىستارى تومەندەگى نەگىزگى باعىتتارعا توپتاسادى:

• سۋ قاۋىپسىزدىگى جانە ەكولوگيالىق تۇراقتىلىق;
• ديالوگ، بىتىمگەرشىلىك جانە دىندەر اراسىنداعى كەلىسىم;
• ايماقتىق ەكونوميكالىق دامۋ جانە كولىك-ترانزيت ينتەگراتسياسى;
• عالامدىق قاقتىعىستاردى ءادىل جانە ديپلوماتيالىق جولمەن رەتتەۋ;
• بۇۇ اياسىندا جاڭا ينستيتۋتتار قۇرۋ ارقىلى حالىقارالىق باسقارۋدى جەتىلدىرۋ.

بۇل باستامالار قازاقستاننىڭ بەيبىتشىلىككە، كوپجاقتى سەرىكتەستىككە جانە ورنىقتى دامۋعا نەگىزدەلگەن سىرتقى ساياساتىنىڭ جۇيەلى جالعاسى بولىپ تابىلادى.

Abai.kz