كەشە كەشتە مەملەكەت باسشىسى قاسىم-جومارت توقاەۆ جاپونياعا رەسمي ساپارمەن باردى. قازاقستان پرەزيدەنتىن توكيو قالاسىنىڭ حانەدا حالىقارالىق اۋەجايىندا جاپونيانىڭ مەملەكەتتىك سىرتقى ىستەر ءمينيسترى ايانو كۋنيميتسۋ قارسى الدى.

مەملەكەت باسشىسى جاپونيا يمپەراتورى نارۋحيتومەن جانە پرەمەر-مينيستر ساناە تاكايچيمەن كەلىسسوزدەر جۇرگىزەدى دەپ جوسپارلانعان.

يمپەراتورمەن كەزدەسۋ

قاسىم-جومارت توقاەۆتىڭ جاپونياعا العاشقى رەسمي ساپارى يمپەراتور نارۋحيتومەن كەزدەسۋدەن باستالدى. پرەزيدەنت قوناقجايلىق تانىتقانى ءۇشىن جاپونيا يمپەراتورىنا ريزاشىلىعىن ءبىلدىردى.

مەملەكەت باسشىسى قازاقستان حالقى كۇنشىعىس ەلىنىڭ ءتارتىبى مەن تاباندىلىعىن اۋەلدەن ۇلگى تۇتاتىنىن اتاپ ءوتتى. سونداي-اق ەكى ەلدى ءوزارا قۇرمەت پەن ءتۇرلى سالاداعى تابىستى ىقپالداستىققا نەگىزدەلگەن بايىرعى دوستىق قاتىناستار بىرىكتىرەتىنىن جەتكىزدى.

يمپەراتور نارۋحيتو پرەزيدەنت قاسىم-جومارت توقاەۆتىڭ ساپارى جاپونيا مەن قازاقستان اراسىنداعى بايلانىس تاريحىندا ەلەۋلى ۋاقيعا رەتىندە قالاتىنىن جانە ەكىجاقتى قارىم-قاتىناستى جاڭا دەڭگەيگە شىعاراتىنىن ايتتى.

مەملەكەت باسشىسى مەن يمپەراتور ءوزارا ىنتىماقتاستىق ماسەلەلەرى جانە حالىقارالىق كۇن ءتارتىبى جونىندە پىكىر الماستى.

وسىدان سوڭ، پرەزيدەنت قاسىم-جومارت توقاەۆتىڭ قۇرمەتىنە يمپەراتور نارۋحيتونىڭ اتىنان رەسمي قابىلداۋ ءوتتى. پرەزيدەنت قاسىم-جومارت توقاەۆ پەن يمپەراتور نارۋحيتو ەمەن-جارقىن كەزدەسۋدەن كەيىن جىلى قوشتاستى.

عيباداتحانانى ارالاۋ

مەملەكەت باسشىسى جاپونياعا رەسمي ساپارى بارىسىندا توكيوداعى مەيدجي دجينگۋ سينتو عيباداتحاناسىنا باردى.

1920 جىلى سالىنعان كەشەن يمپەراتورلىق كيەلى ورىن سانالادى. ونىڭ اۋماعىندا 120 مىڭعا جۋىق اعاش پەن جاسىل جەلەگى بار ساياباق ورنالاسقان. عيباداتحانا تۇبەگەيلى ساياسي جانە الەۋمەتتىك-ەكونوميكالىق رەفورمالار جۇرگىزۋ ارقىلى جاپونيانى الەمنىڭ دامىعان ەلدەرىنىڭ بىرىنە اينالدىرعان يمپەراتور مەيدجيگە ارنالعان. كەشەنمەن تانىسقان سوڭ مەملەكەت باسشىسى قۇرمەتتى قوناقتار كىتابىنا جازبا قالدىردى.

«مەيدجي دجينگۋ – بەرەكەلى بىرلىك پەن ۇلتتىق سانا-سەزىمنىڭ سيمۆولى. جاپون حالقى ءۇشىن وسى قاسيەتتى عيباداتحانانىڭ تاريحي ءمان-ماڭىزى ەرەكشە. كۇنشىعىس ەلى ءوسىپ-وركەندەي بەرسىن!» – دەپ جازدى قاسىم-جومارت توقاەۆ.

بۇگىن قازاقستان پرەزيدەنتى جاپونيا پرەمەر-ءمينيسترى ساناە تاكايچيمەن، سونداي-اق جاپونيانىڭ ىسكەر توپتارىنىڭ وكىلدەرىمەن كەزدەسەدى. سونىمەن قاتار، قازاقستان پرەزيدەنتى ورتالىق ازيا-جاپونيا ءسامميتىنىڭ جۇمىسىنا قاتىسادى.

جاپونيانىڭ ورتالىق ازياعا قىزىعۋشىلىعى قىسىم كورسەتۋ ساياساتى ەمەس، كەرىسىنشە تۇراقتىلىق ەكونوميكاسى: ەنەرگەتيكا، كولىك، ەكولوگيا جانە تاۋەكەلدەردى باسقارۋ.

Abai.kz