«The New York Times» گازەتى: «2 جەلتوقساندا اقش پرەزيدەنتى ترامپ يرانعا سوققى جاساۋ مۇمكىندىگى تۋرالى مالىمدەمە جاساعان. وسىدان سوڭ يران بيلىگى، ۇلتتىق قاۋىپسىزدىك بويىنشا جوعارعى كەڭەس شۇعىل جيىن وتكىزدى»، - دەپ حابارلايدى.

اتالعان جيىندا: يران بيلىگى قوعامدىق نارازىلىقتاردى از عانا كۇشپەن تىنىشتاندىرۋدى اقىلداسقان. بۇل – ەل ىشىندە ونسىز دا ۋشىعىپ تۇرعان نارازىلىقتاردى كۇشەيتپەۋگە باعىتتالعان. سونداي-اق، يران اۋماعىنا جاسالۋى مۇمكىن ىقتيمال سوققىلاردىڭ ستسەناريى دە پىسىقتالعان. يران يسلام رەسپۋبليكاسىنىڭ جوعارعى لاۋازىمدى شەندىلەرى قۇپيا جيىندا مەملەكەتتىڭ سىرتقى قىسپاققا ءتۇسىپ پەن ىشكى تىعىرىققا تىرەلگەنىن مويىنداعان.

باسىلىم دەرەككوزىنشە: يران بيلىگىنىڭدال قازىر ىشكى نارازىلىقتاردىڭ ورشۋىنە باستى سەبەپ بولىپ وتىرعان ەكونوميكالىق داعدارىستى ءوز بەتىنشە رەتتەۋگە مۇمكىندىگى شەكتەۋلى. سونىمەن قاتار، اقش پەن يزرايل تاراپىنان جاسالىپ جاتقان قىسىمعا دا جاۋاپ بەرۋگە دارمەنسىز.

بۇگىن «The Times» باسىلىمى: «ۇلىبريتانيا بارلاۋىنىڭ انىقتاۋىنشا، يراننىڭ جوعارعى كوسەمى ءالي حامەنەي ەلدەگى نارازىلىقتار ۋشىعىپ، باسقارۋدان شىعىپ كەتكەن جاعدايدا ماسكەۋگە قاشىپ بارىپ پانالاۋدىڭ جوسپارىن ازىرلەپ قويعان»، - دەپ جازدى.

باسىلىم دەرەگىنشە: حامەنەي ماسكەۋگە ءوزىنىڭ اينالاسىنداعى ەڭ جاقىن دەگەن 20 كەڭەسشىسى مەن ولاردىڭ وتباسىلارىن الىپ ۇشپاق نيەتتە.

ال اقش مەملەكەتتىك دەپارتامەنتى الەۋمەتتىك جەلىدەگى پاراقشاسىندا پارسىشا جازبا جاريالادى. وندا: «پرەزيدەنت ترامپ ءىستىڭ ادامى. ەگەر بىلمەسەڭدەر، ەندى ءبىلىپ جۇرىڭدەر»، - دەپ جازىلعان. مادۋرونى تۇتقىنداۋ ساتىندە تۇسىرىلگەن سۋرەت پەن پارسىشا جازۋ - يرانعا باعىتتالعان سيگنال!

يراندا نارازىلىقتار ءورشىپ تۇر: 35 ادام قازا تاپتى، مىڭنان استام تۇتقىندالدى

يراندا ءبىر اپتادان استام ۋاقىتقا سوزىلعان نارازىلىق كەزىندە كەم دەگەندە 35 ادام قازا تاۋىپ، 1,2 مىڭنان استام ادام ۇستالدى. بۇل تۋرالى اقش-تا ورنالاسقان Human Rights Activists News Agency (HRANA) اگەنتتىگى حابارلادى.

HRANA مالىمەتىنشە، قازا تاپقاندار اراسىندا نارازىلىق اكتسيالارىنىڭ 29 قاتىسۋشىسى، ءتورت بالا جانە قاۋىپسىزدىك كۇشتەرىنىڭ ەكى قىزمەتكەرى بار. اگەنتتىكتىڭ حابارلاۋىنشا، نارازىلىق اكتسيالارى 88 قالادا ءوتىپ، ەلدىڭ 31 پروۆينتسياسىنىڭ 27-ءسىن قامتىدى.

يران Fars اگەنتتىگى ءوز كەزەگىندە كۇش قۇرىلىمدارى وكىلدەرىنىڭ اراسىندا زارداپ شەككەندەر تۋرالى حابارلادى. ونىڭ ايتۋىنشا، 250-گە جۋىق پوليتسيا قىزمەتكەرى مەن 45 «باسيدج» اسكەريلەرى جاراقات الدى.

Abai.kz