2026 جىلعى 1 قاڭتارداعى جاعداي بويىنشا 2024 جىلعى 1 اقپاننان باستاپ ماقساتتى جيناقتاردى الۋ ءۇشىن 205 505 ءوتىنىش ورىندالعان.

جالپى سوماسى 31,61 ملن اقش دوللارىنان استام قاراجات ۋاكىلەتتى وپەراتورلارعا اۋدارىلىپ، 18 جاسقا تولعان ازاماتتاردىڭ بانك شوتتارىنا كەيىننەن ەسەپتەلدى.

بجزق مالىمەتىنشە، ورىندالعان وتىنىشتەردىڭ 127 445-ءى تۇرعىن ءۇي جاعدايىن جاقسارتۋ ماقساتىندا راسىمدەلىپ، جالپى سوماسى 19,69 ملن اقش دوللار بولعان. ال 78 060 ءوتىنىش ءبىلىم بەرۋ اقىسىن تولەۋگە باعىتتالىپ، جالپى كولەمى 11,92 ملن اقش دوللارىنا جەتكەن.

قوردىڭ ءباسپاسوز قىزمەتى ماقساتتى جيناقتاردىڭ الۋشىلارى قاراجاتتى تولىق نەمەسە ءىشىنارا پايدالانا الاتىنىن، ال پايدالانىلماعان قالدىق ماقساتتى جيناقتاۋ شوتىندا (مجش) ساقتالاتىنىن ەسكە سالدى.

تۇرعىن ۇيگە قاتىستى ەڭ سۇرانىسقا يە باعىتتار

بجزق دەرەگىنشە، تۇرعىن ءۇي جاعدايىن جاقسارتۋ اياسىندا ەڭ كوپ ءوتىنىش كەلەسى قوسالقى ماقساتتار بويىنشا تىركەلگەن:

• تۇرعىن ءۇي قۇرىلىس جيناقتارىنداعى سالىمدى تولىقتىرۋ (بولاشاقتا جيناقتاۋدى جالعاستىرۋ ءۇشىن) – 124 490 ءوتىنىش، جالپى سوماسى 19,27 ملن اقش دوللارى;
• يپوتەكالىق تۇرعىن ءۇي قارىزىن الۋ ءۇشىن باستاپقى جارنانى تولەۋ – 999 ءوتىنىش، 145,39 مىڭ اقش دوللارى;
• ازاماتتىق-قۇقىقتىق مامىلەلەر ارقىلى تۇرعىن ءۇيدى مەنشىككە ساتىپ الۋ – 757 ءوتىنىش، 108,64 مىڭ اقش دوللارى.

ءبىلىم بەرۋ اقىسىن تولەۋدەگى نەگىزگى ماقساتتار

ءبىلىم بەرۋ باعىتىندا ەڭ تانىمال قوسالقى ماقساتتار:

• قازاقستان رەسپۋبليكاسىنىڭ اۋماعىنداعى ءبىلىم بەرۋ ۇيىمدارىنىڭ قىزمەتتەرىنە اقى تولەۋ – 71 025 ءوتىنىش، 11,03 ملن اقش دوللارى;
• ءبىلىم بەرۋ جيناقتاۋ سالىمىن تولىقتىرۋ – 4 933 ءوتىنىش، 608,47 مىڭ اقش دوللارى;
• شەتەلدىك ءبىلىم بەرۋ ۇيىمدارىنىڭ قىزمەتتەرىنە اقى تولەۋ – 1 706 ءوتىنىش، 228,32 مىڭ اقش دوللارى.

بجزق دەرەگىنشە، ماقساتتى تالاپتاردىڭ قاتىسۋشىلارى – ماقساتتى تالاپتارعا قۇقىعى بار، 18 جاسقا تولماعان قازاقستان رەسپۋبليكاسىنىڭ ازاماتتارى.

ۇلتتىق بانك جىل سايىن 1 قازانعا دەيىن بجزق-عا ماقساتتى تالاپتاردىڭ جالپى سوماسى مەن ينۆەستيتسيالىق تابىس تۋرالى ەسەپ جولدايدى. ال بجزق جىل سايىن 20 قاڭتاردان كەشىكتىرمەي ماقساتتى تالاپتار قاتىسۋشىلارىنىڭ ەلەكتروندىق ءتىزىمىن قالىپتاستىرادى.

2025 جىلعى ەسەپتى جىلعا ارنالعان ماقساتتى تالاپتار مەن ينۆەستيتسيالىق تابىس 2026 جىلعى 1 اقپاننان كەشىكتىرمەي قاتىسۋشىلارعا ەسەپتەلەدى. سونداي-اق، 2008 جىلى تۋعان، 2026 جىلى 18 جاسقا تولاتىن قازاقستاندىقتاردىڭ ماقساتتى جيناقتارى دا 2026 جىلعى 1 اقپانعا دەيىن ولاردىڭ ماقساتتى جيناقتاۋ شوتتارىنا اۋدارىلادى، - دەلىنگەن بجزق جاۋابىندا.

Abai.kz