بۇگىن استانادا كونستيتۋتسيالىق كوميسسيانىڭ ەكىنشى وتىرىسى وتۋدە. ءىس-شارا كونستيتۋتسيالىق رەفورماعا بايلانىستى كەلىپ تۇسكەن ۇسىنىستاردى تالقىلاۋعا ارنالدى.

كوميسسيا جۇمىسى اشىقتىق پەن جاريالىلىق قاعيداتتارىنا نەگىزدەلگەن، ال تالقىلاۋدىڭ بارلىق كەزەڭدەرى جۇرتشىلىق ءۇشىن تىكەلەي ەفيردە كورسەتىلۋدە. وتىرىستىڭ مودەراتورى، قازاقستان رەسپۋبليكاسى كونستيتۋتسيالىق سوتىنىڭ ءتورايىمى ەلۆيرا ازيموۆا كوميسسياعا ەكى مىڭنان استام ۇسىنىس كەلىپ تۇسكەنىن، ولاردىڭ بارلىعى ءبىرتۇتاس جيناقتالعان كەستەگە توپتاستىرىلعانىن اتاپ ءوتتى. ونىڭ ايتۋىنشا، ازاماتتار مەن ساراپشىلاردىڭ بەلسەندى قاتىسۋى كونستيتۋتسيالىق وزگەرىستەردىڭ قوعامدىق ماڭىزىن جانە رەفورماعا دەگەن جوعارى قىزىعۋشىلىقتى ايقىن كورسەتەدى.

«مۇنداي ديالوگ فورماتى رەفورمانىڭ نەگىزگى قاعيداتىن كورسەتەدى: كونستيتۋتسيالىق رەفورما ەڭ الدىمەن حالىقتىڭ مۇددەسى ءۇشىن جانە ونىڭ تىكەلەي قاتىسۋىمەن جۇرگىزىلەدى»، - دەدى ەلۆيرا ازيموۆا.

ال قر ادىلەت ءمينيسترى ەرلان سارسەمباەۆ پرەزيدەنت وكىلەتتىگى مەرزىمىنەن بۇرىن توقتاتىلعان جاعدايدا سايلاۋ وتكىزۋدىڭ ءتارتىبى تۋرالى ايتتى.

ۇسىنىسقا سايكەس، پرەزيدەنتتىڭ قىزمەتتەن مەرزىمىنەن بۇرىن بوساتىلعان، وتستاۆكاعا كەتكەن نەمەسە قايتىس بولعان كۇنىنەن باستاپ 7 كۇن ىشىندە قۇرىلتاي پرەزيدەنت سايلاۋىن وتكىزۋدى جاريالايدى. ول قۇرىلتايدىڭ ءتيىستى شەشىم قابىلداعان كۇنىنەن باستاپ ەكى اي ىشىندە وتكىزىلۋى ءتيىس.

«پرەزيدەنت وكىلەتتىگىنىڭ مەرزىمىنەن بۇرىن توقتاتىلۋى – ساياسي جۇيە ءۇشىن ەڭ سەزىمتال ساتتەردىڭ ءبىرى. قۇرىلتاي شەشىم قابىلداۋدىڭ ناقتى مەرزىمىن بەلگىلەگەندە مەملەكەت ارەكەتتەرىنىڭ جىلدامدىعى مەن بولجامدىلىعى قامتاماسىز ەتىلەدى. جەتى كۇندىك مەرزىم سايلاۋدى جاريالاۋ ءۇشىن مەملەكەتتىك كونستيتۋتسيالىق كەپىلدىك فۋنكتسياسىن اتقارادى، ۇدەرىستىڭ سوزىلىپ كەتۋىنە جانە پايدا بولعان ءۇزىلىستى ساياسي ماقساتتا پايدالانۋعا جول بەرمەيدى»، - دەدى سارسەمباەۆ.

ادىلەت ءمينيسترىنىڭ ايتۋىنشا، قۇرىلتايدىڭ پرەزيدەنتتىك سايلاۋدى جاريالاۋداعى جەتەكشى ءرولىن بەكىتۋ بيلىك تارماقتارىن ءبولۋ جانە ينستيتۋتتىق تەڭگەرىم ءپرينتسيپىن كورسەتەدى.

قازىرگى كونستيتۋتسياسىنىڭ 48-بابىنا سايكەس، پرەزيدەنت قايتىس بولعان جاعدايدا وكىلەتتىكتەر سەنات توراعاسىنا، ءماجىلىس توراعاسىنا نەمەسە پرەمەر-مينيسترگە كوشەدى، ال مەرزىمىنەن بۇرىن سايلاۋ ەكى اي ىشىندە پارلامەنت ارقىلى تاعايىندالادى.

Abai.kz