قازاقستان رەسپۋبليكاسىنىڭ جاڭا كونستيتۋتسياسىن قابىلداۋ قاجەتتىگى كونستيتۋتسيالىق رەفورما جونىندەگى كوميسسيانىڭ بەسىنشى وتىرىسىندا تالقىلاندى. ءماجىلىس دەپۋتاتى سنەجاننا يماشەۆا جاڭا تۇزەتۋلەر كونستيتۋتسيانىڭ 77 بابىنا ەنگىزىلىپ، نەگىزگى زاڭ ءماتىنىنىڭ 84 پايىزىن جاڭارتاتىنىن، ءىس جۇزىندە بارلىق ءبولىم قامتىلاتىنىن ايتتى.

يماشەۆا بايانداماسىندا جوبانىڭ پرەامبۋلاسىن تولىق جاڭا رەداكتسيادا قابىلداۋ، جاڭارتىلعان جالپىۇلتتىق قۇندىلىقتار، مەملەكەتتىڭ ميسسياسى، تاريحي كونتەكست پەن ەلدىڭ ودان ءارى دامۋ باعىتتارىن كورسەتۋ كوزدەلەتىنىن اتاپ ءوتتى. سونىمەن قاتار «حالىق كەڭەسى» جانە «كونستيتۋتسياعا وزگەرىستەر مەن تولىقتىرۋلار ەنگىزۋ» اتتى ەكى جاڭا ءبولىم ەنگىزىلىپ، ءتورت ءبولىمنىڭ اتاۋى مەن مازمۇنىنا وزگەرىستەر ەنگىزىلمەك.

«كونستيتۋتسيالىق قۇرىلىمنىڭ نەگىزدەرى ەلەۋلى تۇردە قايتا قارالىپ، پرەزيدەنتتىك باسقارۋ نىسانى ساقتالا وتىرىپ، بىرىڭعاي مەملەكەتتىك بيلىك جۇيەسىنىڭ ۇيىمداستىرىلۋى وزگەرەدى. ازاماتتاردىڭ مەملەكەت ءىسىن باسقارۋعا قاتىسۋ نىساندارى كەڭەيتىلىپ، ادام مەن ازاماتتىڭ قۇقىقتارى مەن بوستاندىقتارىن قورعاۋ كەپىلدىكتەرى كۇشەيتىلەدى، كونستيتۋتسيالىق سوتتىڭ كونستيتۋتسيانىڭ ۇستەمدىگىن قامتاماسىز ەتۋدەگى ءرولى ارتا تۇسەدى. وسىلايشا، ءسوز جەكەلەگەن تۇزەتۋلەر تۋرالى ەمەس، نەگىزگى زاڭنىڭ مازمۇنى مەن تۇجىرىمدامالىق تاسىلدەرىن تۇبەگەيلى وزگەرتەتىن تەرەڭ كونستيتۋتسيالىق جاڭعىرتۋ تۋرالى بولىپ وتىر»،- دەدى دەپۋتات.

دەپۋتات سونىمەن قاتار «قۇقىقتىق اكتىلەر تۋرالى» زاڭنىڭ 26-بابىنىڭ 9-تارماعىن ەسكە سالىپ، نورماتيۆتىك اكتىنىڭ جارتىسىنان استامى وزگەرسە، ونىڭ جاڭا رەداكتسياسى قابىلداناتىنىن اتاپ ءوتتى. وسىعان سۇيەنە وتىرىپ، جاڭا كونستيتۋتسيا قازىرگى زامان تالاپتارىنا، قوعام سۇرانىسىنا جانە مەملەكەتتىڭ ستراتەگيالىق دامۋ ماقساتتارىنا ساي كەلەتىنى، تەك قۇقىقتىق نەگىزدى عانا ەمەس، سونىمەن بىرگە ازاماتتىق قۇندىلىقتار مەن مەملەكەتتىڭ ستراتەگيالىق باعىتىن كورسەتەتىن قۇجات ەكەنى كورسەتىلدى.

Abai.kz