رەسەي ەاەو-عا مۇشە وزگە ەلدەردىڭ تاۋارلارىنان ىشكى نارىعىن قورعاۋدىڭ تاعى ءبىر امالىن ويلاپ تاپتى. توقپاعى مىقتى بولسا، كيىز قازىق جەرگە كىرەدى دەمەي مە، رەسەيلىك بيلىكتىڭ بۇل امالى قازاقستان، قىرعىزستان، بەلارۋس نەمەسە ارمەنيادان كەلەتىن كەز كەلگەن تاۋاردى ەل نارىعىنا كىرگىزبەۋدىڭ ارام امالى عانا. Ulysmedia.kz رەسەيلىكتەر ءوز نارىعىن قورعاۋ ءۇشىن تاعى قانداي جاڭالىق ويلاپ تاپقانىن باياندايدى.

كەزدەيسوق وق پا، نىساناعا ءدال تيگەن سوققى ما؟

2026 جىلعى 6 اقپاننان باستاپ رف ۇكىمەتىنىڭ باسشىسى ميحايل ميشۋستين قول قويعان رەسەيگە تاۋار اكەلۋ ءتارتىبىن رەتتەيتىن نورماتيۆتىك-قۇقىقتىق اكتىلەرگە وزگەرىستەر ەنگىزۋ تۋرالى قاۋلى كۇشىنە ەندى. ەندى ەلگە كىرگىزىلەتىن ءاربىر تاۋارعا تاۋەلسىز ۇيىمدار بەرەتىن سايكەستىك سەرتيفيكاتى قاجەت.

ەاەو زاڭناماسىنا سايكەس، مۇنداي سەرتيفيكاتتى وداققا مۇشە كەز كەلگەن ەلدە الۋعا بولادى، ويتكەنى وداقتى قۇرۋداعى ماقسات تا وسى – تەڭ قولجەتىمدىلىك پەن تاۋارلاردىڭ نارىققا ەركىن كىرۋى ەاەو شارتتارىنداناقتى بەكىتىلگەن. الايدا رەسەي ەاەو ەلدەرىنەن ءوز اۋماعىنا كەلەتىن تاۋارلاردىڭ يمپورتىنا ءوزى جەكە رەتتەۋ ەنگىزۋگە قۇقىلىمىز دەپ شەشكەن.

قابىلدانعان قاۋلىعا سايكەس، ەگەر ءبىر جىل ىشىندە رەسەيدىڭ مەملەكەتتىك ورگانى ءۇش رەت نەمەسە ودان دا كوپ جاعدايدا بەلگىلى ءبىر تاۋارعا بەرىلگەن سايكەستىك سەرتيفيكاتى ءتيىستى تەحنيكالىق رەگلامەنتتەرگە شىن مانىندە كەپىلدىك بەرمەيدى دەپ مالىمدەسە، وندا سول سەرتيفيكاتتى بەرگەن ۇيىمنىڭ بۇرىن راسىمدەگەن بارلىق قۇجاتىنىڭ كۇشى رەسەي اۋماعىندا توقتاتىلادى. ايتا كەتەيىك، تەك قازاقستاننىڭ وزىندە عانا مۇنداي ۇيىمدار سانى 1500-دەن اسادى.

الايدا «تەحنيكالىق رەتتەۋ جانە مەترولوگيا جۇيەسىنە قاتىسۋشىلاردىڭ قازاقستاندىق قاۋىمداستىعى» زتب اتقارۋشى ديرەكتورى دميتري ساۆەلەنكو بۇل شەشىم، ەڭ الدىمەن، اككرەديتتەۋ سۋبەكتىلەرىنە ەمەس، تاۋارىن رەسەيگە ەكسپورتتايتىن ناقتى بيزنەسكە سوققى بولاتىنىن ايتادى.

– ەلەستەتىپ كورىڭىز، سىزدە قازاقستاندا بەرىلگەن جۇرگىزۋشى كۋالىگى بار. ول زاڭدى، بارلىق ەمتيحان مەن تەكسەرۋدەن ءوتتىڭىز. ەاەو ەرەجەسىنە ساي، مۇنداي كۋالىك وداقتىڭ بارلىق ەلىندە مويىندالۋى ءتيىس. بىراق ءبىر كۇنى رەسەيدە جاڭا تالاپ ەنگىزىلەدى: ەگەر ءسىز ەمتيحان تاپسىرعان اۆتومەكتەپ بىر جىل ىشىندە ءۇش رەت باسقا وقۋشىلاردى دايارلاۋ كەزىندە قاتەلىك جىبەرسە، سول مەكتەپ بەرگەن بارلىق جۇرگىزۋشى كۋالىگى، ونىڭ ىشىندە سىزدىكى دە بار، اۆتوماتتى تۇردە جارامسىز دەپ تانىلادى. ءسىز ەرەجەنى بۇزباساڭىز دا، ادال تاپسىرساڭىز دا، رەسەيدە كولىك جۇرگىزۋ قۇقىعىنان ايىرىلاسىز. رەسەيدىڭ بۇل امالى دا وسىعان سايادى، – دەيدى ول بۇل شەشىمنىڭ قازاقستاندىق بيزنەسكە قانداي قاۋىپ توندىرەتىنىن ءتۇسىندىرىپ جاتىپ.

ساۆەلەنكونىڭ ايتۋىنشا، بۇل شارا ادال كاسىپكەرلەر ءۇشىن دە «كەزدەيسوق وق» بولۋى مۇمكىن، سونداي-اق «قالامايتىنداردى دالدەپ اتۋدىڭ» قۇرالىنا اينالۋى ىقتيمال. تەوريالىق تۇرعىدا ءبىر عانا تاۋارعا قاتىستى شەشىم سول ۇيىم بەرگەن تاعى ءۇش سەرتيفيكاتتىڭ كۇشىن جويۋعا نەگىز بولا الادى.

– ءبىزدىڭ قاۋىمداستىق مۇنداي ارەكەتتەردى ەاەو اياسىندا تاۋارلاردىڭ ەركىن قوزعالىسىنا كەدەرگى دەپ سانايدى. ءبىز قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگىمەن بىرلەسىپ، بۇل ماسەلەنى ەۋرازيالىق ەكونوميكالىق كوميسسيادا قاراۋ باستاماسىن كوتەرىپ، اتالعان پراكتيكانى توسقاۋىل رەتىندە تانۋعا جانە ونى جويۋعا كۇش سالامىز، – دەيدى دميتري ساۆەلەنكو.

ادال بيزنەسكە ارامزا توسقاۋىل

ەكونوميست ازيز يسكاكوۆ تا رەسەي قابىلداعان قاۋلى قازاقستاندىق بيزنەس ءۇشىن ەلەۋلى كەدەرگىگە اينالۋى مۇمكىن دەپ ەسەپتەيدى. دەگەنمەن ول رەسەيلىك شەشىمنىڭ بەلگىلى ءبىر ناقتى كۇماندەرگە نەگىزدەلگەنىن دە اتاپ وتەدى.

– ەاەو شەڭبەرىندە بارىنە ورتاق تەحنيكالىق رەتتەۋ جۇيەسى بار جانە وداق اۋماعىنا وسى تالاپتارعا ساي كەلمەيتىن تاۋارلاردى كىرگىزۋگە تىيىم سالىنعان. بۇل تالاپتارعا سايكەستىكتى راستايتىن سەرتيفيكاتتاردى ءار ەلدەگى تەحنيكالىق رەتتەۋ سالاسىنداعى ۋاكىلەتتى ورگاندار اككرەديتتەگەن ارنايى ۇيىمدار بەرەدى. وداقتىڭ جەكەلەگەن ەلدەرىندەگى اككرەديتتەلگەن ۇيىمداردىڭ ساپاسى مەن ادالدىعىنا قاتىستى پىكىرتالاس بار، بىراق ول ەشقاشان قازاقستاندىق ۇيىمدارعا قاتىستى بولعان ەمەس، – دەيدى ازيز يسكاكوۆ.

ونىڭ ايتۋىنشا، قازاقستان ءوز ۇيىمدارىنىڭ جۇمىسىنا قاتاڭ باقىلاۋ جۇرگىزەدى. ۇلتتىق اككرەديتتەۋ ورتالىعى بار، ول جىل سايىن مونيتورينگ جاساپ، قاجەت بولعان جاعدايدا كەيبىر ۇيىمداردىڭ قىزمەتىن توقتاتادى. ال ەندى رەسەيلىك اككرەديتتەۋ جونىندەگى فەدەرالدىق قىزمەت قازاقستاندىق ارىپتەستەردىڭ جۇمىسىن قايتا تەكسەرمەك پە؟ ەكونوميستىڭ پىكىرىنشە، بۇل كەدەرگى، ەڭ الدىمەن، بيزنەسكە قارسى باعىتتالعان.

– اڭگىمە ءارتۇرلى تاۋارلارعا نەمەسە ولاردىڭ پارتيالارىنا، ءارتۇرلى برەندتەرگە، ءار ۋاقىتتا، ءار زاۋىتتا جانە ءار ەلدە وندىرىلگەن ونىمدەرگە بەرىلگەن سەرتيفيكاتتار تۋرالى بولۋى مۇمكىن. ولار ادال وندىرۋشىلەر مەن يمپورتتاۋشىلاردىڭ ساپالى تاۋارىنا بەرىلگەن بە، الدە جوق پا، ماڭىزدى ەمەس. ءتىپتى ءسىز ءوز تاۋارىڭىزدى رەسەيگە زاڭدى تۇردە تاسىپ، سالىق تولەپ، بارلىق تالاپتى ساقتاساڭىز دا، رەسەيدىڭ باسقا وڭىرىندە، مۇلدە وزگە تاۋارعا بەرىلگەن سەرتيفيكات بىرەۋگە كۇماندى كورىنسە، ءسىز بيزنەسىڭىزدەن ايىرىلىپ، قاراجاتىڭىزدى الا الماي قالۋىڭىز مۇمكىن، – دەيدى يسكاكوۆ.

ول بۇل شەشىمنىڭ ىقتيمال تاۋەكەلدەرىن ەاەو-عا مۇشە وزگە ەلدەر دە دۇرىس باعالاپ، ونى ەەك اياسىندا بىرلەسە كوتەرەدى دەپ ۇمىتتەنەدى.

العاشقى قۇربان

جاڭا ەرەجەلەر بويىنشا العاشقى بولىپ كۇشى جويىلعان سەرتيفيكات تا قازاقستاندىق بولىپ شىقتى. بۇل رەتتە ءىرى رەسەيلىك ونلاين-كيىم دۇكەنى مەن رەسەيلىك سانقويلار دا زارداپ شەكتى.

13 اقپاندا، ياعني تاۋار اكەلۋدىڭ جاڭا ءتارتىبى ەنگىزىلگەننەن كەيىن بىرنەشە كۇن وتكەن سوڭ، روساككرەديتاتسيا Adidas برەندىنىڭ كروسسوۆكالارى مەن كيىمىنە بەرىلگەن سايكەستىك سەرتيفيكاتتارىن جويدى. رەسەيگە بۇل برەندتىڭ ونىمدەرىن Adidas Kazakhstan كومپانياسى جەتكىزگەن. اڭگىمە كەمىندە ون شاقتى سەرتيفيكات تۋرالى بولىپ وتىر.

ەگەر ولاردىڭ بارلىعى ءبىر اككرەديتتەۋ ورتالىعىندا راسىمدەلگەن بولسا، سول جەردەن سەرتيفيكات العان وزگە كاسىپكەرلەر دە كەدەندىك باقىلاۋدان وتە الماي قالۋ قاۋپىنە تاپ بولادى. ەڭ سوراقىسى، ولار بۇل تۋرالى تەك كەدەندە تۇرعان كەزدە عانا ءبىلۋى مۇمكىن. ال ءۇش جولاقتى سپورتتىق كوستيۋمدەردەن بولەك، ەاەو ەلدەرى، سونىڭ ىشىندە قازاقستان ارقىلى رەسەيگە تاعى قانشا تاۋار جەتكىزىلەتىنى ازىرگە بەيمالىم.

Abai.kz