رەسەي پرەزيدەنتى ۆلاديمير پۋتين سارسەنبى كۇنى ماسكەۋدە كۋبانىڭ سىرتقى ىستەر ءمينيسترى برۋنو رودريگەسپەن كەزدەسكەندە، كرەملدىڭ «ماڭگى» كۋبا جاعىندا ەكەنىن قايتالاپ، قازىرگى ۋاقىتتا اقش-تىڭ كەشەندى سانكتسيالارىنا ۇشىراعان كاريب ارالدارى ەلىنە قولشداۋ ءبىلدىردى. دەگەنمەن، كۋباعا ەشقانداي ناقتى ماتەريالدىق كومەك كورسەتۋگە ۋادە بەرگەن جوق.

جانارماي داعدارىسىنا تاپ بولعان كۋبا ەلشىسى رودريگەس ءداستۇرلى وداقتاسى رەسەيدەن كومەك سۇراپ كەلگەن ەدى..

ۆەنەسۋەلا پرەزيدەنتى نيكولاس مادۋرونى بيلىكتەن تايدىرعاننان كەيىن اقش پرەزيدەنتى ترامپ ۆەنەسۋەلانىڭ كۋباعا ماڭىزدى مۇناي جەتكىزۋىن توقتاتىپ، گاۆاناعا مۇناي ساتاتىن ەلدەرگە قارسى سانكتسيالار سالىپ، قورقىتتى.

پۋتين كەزدەسۋدە: «بۇل ەرەكشە ۋاقىت، جاڭا سانكتسيالار بىرىنەن سوڭ ءبىرى ەنگىزىلىپ جاتىر. ءبىزدىڭ بۇعان قالاي قارايتىنىمىزدى بىلەسىزدەر. ءبىز مۇندايدى ەشقاشان قابىلدامايمىز» دەپ قوسقان. كرەملدىڭ ءباسپاسوز حاتشىسى دميتري پەسكوۆ سارسەنبىدە پۋتين مەن رودريگەس گاۆاناعا قولداۋ كورسەتۋ شارالارىن تالقىلاعانىن ايتتى.

دەگەنمەن، ماسكەۋ جانارماي نەمەسە باسقا دا قاجەتتى كومەك كورسەتۋگە جاريا تۇردە مىندەتتەمە العان جوق.

سونىمەن قاتار، ۆاشينگتوننىڭ دەلدالدىعىمەن ۋكرايناداعى ءتورت جىلدىق سوعىستى توقتاتۋ بويىنشا كەلىسسوزدەر جالعاسۋدا، ال سوڭعى اپتالاردا پۋتين امەريكا قۇراما شتاتتارىنا قاتال سىن ايتۋدان اۋلاق بولدى.

الەمدىك باق اقش مەملەكەتتىك حاتشىسى ماركو رۋبيو كۋبا كوممۋنيستىك پارتياسىنىڭ جەتەكشىسى فيدەل كاسترونىڭ نەمەرەسىمەن قۇپيا كەلىسسوز وتكىزگەنىن جارىسا جازۋدا. وندا "بولاشاق ماسەلەلەر تالقىلاندى" دەلىنۋدە.

AFP اگەنتتىگىنىڭ حابارلاۋىنشا، رۋبيو كۋبانىڭ بۇرىنعى كوشباسشىسى راۋل كاسترونىڭ نەمەرەسى راۋل گيلەرمو رودريگەسپەن سويلەسىپ جۇرگەن. 41 جاستاعى رودريگەس امەريكا قۇراما شتاتتارىمەن جاقسى قارىم-قاتىناستى باعالايتىن رەفورماتور رەتىندە قاراستىرىلادى.

اقش پرەزيدەنتى ترامپ دۇيسەنبىدە كۋبانىڭ «ءساتسىز مەملەكەتكە» اينالعانىن ايتىپ، گاۆانانى اقش-پەن كەلىسىمگە كەلۋگە شاقىردى.

ترامپ ۆەنەسۋەلا پرەزيدەنتى نيكولاس مادۋرونى بيلىكتەن تايدىرعاننان كەيىن كۋبا ەكونوميكالىق قىسىمعا تاپ بولدى.

اقش ىقپالىمەن ۆەنەسۋەلا كۋباعا ماڭىزدى مۇناي جەتكىزۋدى توقتاتتى.

Abai.kz