2025 جىلى قازاقستاننىڭ سىرتقى ساۋداسى 143,9 ملرد دوللاردى قۇرادى. بۇل 2024 جىلمەن سالىستىرعاندا 1,3%-عا ارتىق. دەگەنمەن، ساۋدا بالانسىندا قۇرىلىمدىق وزگەرىستەر بايقالدى. بۇل تۋرالى قازاقستان قارجىگەرلەر قاۋىمداستىعى ەلدىڭ سىرتقى ساۋداسى بويىنشا جىلدىق شولۋ اياسىندا حابارلادى.

ەكسپورت 3,2%-عا ازايىپ، 79,0 ملرد دوللارعا جەتسە، يمپورت 7,4%-عا وسكەنىن اتاپ ءوتۋ قاجەت – 64,8 ملرد دوللار. ناتيجەسىندە ساۋدا ءپروفيتسيتى 21,3 ملرد-تان 14,2 ملرد دوللارعا قىسقاردى. بۇل ءجىو-گە شاققاندا 7,3%-دان 4,6%-عا دەيىن تومەندەگەنىن كورسەتەدى.

– ەكسپورتتاعى تومەندەۋدىڭ نەگىزگى سەبەبى مينەرالدىق سەكتور (-3,3 ملرد دوللار), اسىرەسە Brent مۇناي باعاسىنىڭ 2025 جىلى شامامەن 20%-عا تومەندەۋىمەن بايلانىستى. كولىك قۇرالدارىنىڭ ەكسپورتى دا 968,7 ملن دوللارعا ازايىپ، سىرتقى نارىقتاعى سۇرانىستىڭ تومەندەگەنىن كورسەتتى، – دەلىنگەن اناليتيكالىق ورتالىقتىڭ ماتەريالىندا.

قاۋىمداستىق دەرەكتەرىنە سايكەس، شيكىزاتتىق ەمەس ەكسپورتتىڭ ۇلەسى 35,2%-دان 36,4%-عا ارتتى. بۇل قۇرىلىمدىق وزگەرىستەن تۋىنداعان ستاتيستيكالىق ءوسىم. جانۋارلار مەن وسىمدىك ونىمدەرىنىڭ ەكسپورتى (+2,0 ملرد دوللار: ءداندى داقىلدار، مايلى تۇقىمدار، دارىلىك وسىمدىكتەر، مال ازىعى) جالپى تومەندەۋدى ءبىرشاما وتەدى.

– يمپورت ءوسىمىنىڭ نەگىزگى درايۆەرلەرى: كولىك قۇرالدارى (+3,0 ملرد دوللار), جانۋارلار مەن وسىمدىك ونىمدەرى (+695,4 ملن دوللار: كاكاو، مايلار، ءسۇت ونىمدەرى، سۋسىندار) جانە حيميا ونىمدەرى (+652,7 ملن دوللار). سونداي-اق كولىك قۇرالدارىن ساتىپ الۋ اۆتو باعاسىنىڭ تومەندەۋىمەن (7,2 ملن. تەڭگەدەن 6,2 ملن. تەڭگەگە دەيىن) بايلانىستى ارتىپ وتىر، – دەپ اتاپ وتىلگەن ماتەريالدا.

وسىلايشا ورتالىقتىڭ ماماندارى، 2025 جىلى تازا ەكسپورتتىڭ قىسقارۋى جالپى ءجىو-گە تەرىس اسەرىن تيگىزىپ، ۆاليۋتالىق ءتۇسىمنىڭ تومەندەۋىنە، اعىمداعى ەسەپكە قوسىمشا قىسىمنىڭ كۇشەيۋىنە جانە سىرتقى كونيۋنكتۋراعا بايلانىستى ۆاليۋتالىق كۋرسقا قاتىستى كۇتۋلەردىڭ سەزىمتالدىعىنىڭ ارتۋىنا اكەپ سوقتىردى دەپ قورىتىندىلاعان.

دەرەككوزى: kaz.inform.kz

Abai.kz