قوعامدىق كەلىسىمنىڭ باستى كەپىلى
كونستيتۋتسيا – كەز كەلگەن مەملەكەتتىڭ ساياسي-قۇقىقتىق تۇعىرى، قوعامدىق كەلىسىمنىڭ باستى كەپىلى. سوندىقتان جاڭا اتا زاڭ جوباسىنىڭ ۇسىنىلۋى – جاي عانا زاڭنامالىق وزگەرىس ەمەس، ەل دامۋىنىڭ باعىتىن ايقىندايتىن تاريحي كەزەڭ. وسىلاي دەگەن استانا قالاسى زاڭ كونسۋلتاتتار پالاتاسىنىڭ زاڭ كونسۋلتانتى نۇرسۇلتان بايمەنوۆ ەلىمىزدە ءجۇرىپ جاتقان كونستيتۋتسيالىق رەفورمالارعا قاتىستى ءوز ويىن تارقاتتى.
ونىڭ ايتۋىنشا، بۇل قۇجاتتىڭ مازمۇنى مەن رۋحى قوعامنىڭ بولاشاقتاعى بەت-بەينەسىن قالىپتاستىرادى.
«جاڭا جوبا ەڭ الدىمەن قۇقىق ۇستەمدىگىن قامتاماسىز ەتۋگە باعىتتالۋعا ءتيىس. زاڭ بارىنە بىردەي قىزمەت ەتكەندە عانا مەملەكەت ادىلەتتى بولا الادى. كونستيتۋتسيالىق نورمالاردىڭ ناقتى ءارى تۇسىنىكتى جازىلۋى – ولاردىڭ ءتيىمدى ورىندالۋىنىڭ باستى شارتى. ەكىۇشتى تۇجىرىمدار قۇقىق قولدانۋ تاجىريبەسىندە قايشىلىقتار تۋعىزۋى مۇمكىن. سوندىقتان ءاربىر باپ ايقىن ءارى ناقتى بولۋى قاجەت»، - دەدى ول.
ءوز ويىن بيلىك تارماقتارىنىڭ تەپە-تەڭدىگى تۋرالى جالعاعان زاڭگەر دەموكراتيالىق مەملەكەتتە زاڭ شىعارۋشى، اتقارۋشى جانە سوت بيلىگىنىڭ اراسىنداعى تەڭدىك – تۇراقتىلىقتىڭ نەگىزى ەكەنىن ەسكە سالدى.
«ەگەر جاڭا كونستيتۋتسيا جوباسى بيلىك تارماقتارىنىڭ ءوزارا باقىلاۋى مەن تەڭگەرىمىن كۇشەيتسە، بۇل ساياسي جۇيەنىڭ ساپاسىن ارتتىرادى. پارلامەنتتىڭ ءرولىن نىعايتۋ، سوت تاۋەلسىزدىگىن ناقتى كەپىلدەندىرۋ – قۇقىقتىق مەملەكەتتىڭ باستى بەلگىلەرى»، - دەدى.
سونداي-اق ول ادام قۇقىقتارى مەن بوستاندىقتارىنىڭ كەڭىنەن ءارى ناقتى بەكىتىلۋى – زاماناۋي قوعامنىڭ تالابى ەكەنىن جەتكىزدى.
«الەۋمەتتىك كەپىلدىكتەر قاعاز جۇزىندە ەمەس، ناقتى ىسكە اساتىن تەتىكتەرمەن قامتاماسىز ەتىلۋى كەرەك. اسىرەسە ەڭبەك، ءبىلىم، دەنساۋلىق ساقتاۋ سالالارىنداعى قۇقىقتار ناقتى ورىندالۋ تەتىكتەرىمەن بەكىتىلگەنى ءجون»، - دەدى ساراپشى.
نۇرسۇلتان بايمەنوۆ مەملەكەتتىك ءتىل مەن قوعامدىق تالقىلاۋدىڭ ماڭىزىنا دا توقتالا كەلە، كونستيتۋتسيا – ۇلتتىق بىرەگەيلىكتىڭ ايناسى ەكەنىن اتاپ ءوتتى.
«مەملەكەتتىك ءتىلدىڭ مارتەبەسى تەك دەكلاراتيۆتى سيپاتتا قالماي، ناقتى قوعامدىق قاتىناستاردا تولىق قولدانىلۋىن قامتاماسىز ەتۋگە ءتيىس. ءتىل – تەك قاتىناس قۇرالى ەمەس، مەملەكەتشىلدىكتىڭ تىرەگى. ال كونستيتۋتسيا حالىقتىڭ كەلىسىمىمەن قابىلدانۋى كەرەك. اشىق پىكىرتالاس، ساراپشىلار مەن ازاماتتىق قوعام وكىلدەرىنىڭ ۇسىنىستارى – قۇجاتتىڭ ساپاسىن ارتتىرادى. ءاربىر ازامات ءوز پىكىرىن بىلدىرۋگە قۇقىلى ءارى جاۋاپتى»، - دەپ ويىن تۇيىندەدى.
Abai.kz
