قازاقستان رەسپۋبليكاسىنىڭ ۇكىمەتى 2026–2030 جىلدارعا ارنالعان مەديتسينالىق كومەكتىڭ ساپاسىن باسقارۋدى جەتىلدىرۋ جونىندەگى كەشەندى جوسپاردى بەكىتتى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.

قۇجات مەملەكەت باسشىسىنىڭ "جاساندى ينتەللەكت داۋىرىندەگى قازاقستان: تسيفرلىق ترانسفورماتسيا ارقىلى وزەكتى ماسەلەلەردى شەشۋ" اتتى جولداۋىندا بەرىلگەن تاپسىرمالاردى ىسكە اسىرۋعا باعىتتالعان.

كەشەندى جوسپار مەديتسينالىق قىزمەتتەردىڭ ساپاسىن باقىلاۋ مەن باسقارۋدىڭ دەرەكتەرگە، تسيفرلىق تەحنولوگيالارعا جانە جاساندى ينتەللەكتكە نەگىزدەلگەن جاڭا مودەلىنە كوشۋگە باعىتتالعان.

جوسپاردا جۇيەنى دامىتۋدىڭ ءتورت ستراتەگيالىق باعىتى ايقىندالعان:

• مەديتسينالىق قىزمەت كورسەتۋ سالاسىنداعى رەتتەۋشى قۇرالداردى جاڭعىرتۋ;
• جاساندى ينتەللەكت تەحنولوگيالارىن قولدانۋ ارقىلى ساپا ساراپتاماسىنىڭ جاڭا مودەلىن قالىپتاستىرۋ جانە ۇلتتىق ساپا ينستيتۋتىن قۇرۋ;
• كاسىبي مەديتسينالىق قوعامداستىق پەن پاتسيەنتتەردىڭ ءرولىن كۇشەيتۋ;
• ساپانى باسقارۋ جۇيەسىن تولىق تسيفرلىق ترانسفورماتسيالاۋ.

جوسپار اياسىندا:

• مەديتسينالىق ۇيىمداردىڭ 70%-ى ليتسەنزيادان كەيىنگى مونيتورينگپەن قامتىلادى;
• مەديتسينالىق ۇيىمداردىڭ كەمىندە 80%-ى جاڭا ستاندارتتار بويىنشا اككرەديتتەلەدى;

2028 جىلعا قاراي مەديتسينالىق كومەكتىڭ ساپاسى مەن كولەمىن مونيتورينگتەۋدىڭ كەمىندە 20%-ى جاساندى ينتەللەكت ارقىلى جۇرگىزىلەدى.

سونىمەن قاتار دەنساۋلىق ساقتاۋدى دامىتۋدىڭ ۇلتتىق عىلىمي ورتالىعىنىڭ بازاسىندا ۇلتتىق ساپا ينستيتۋتىن قۇرۋ جوسپارلانۋدا. ينستيتۋت مەديتسينالىق كومەكتىڭ ساپاسىن باعالاۋ مەن تالداۋدىڭ ادىسنامالىق ورتالىعى بولادى جانە ونىڭ قىزمەتى دۇنيەجۇزىلىك دەنساۋلىق ساقتاۋ ۇيىمىنىڭ تەحنيكالىق قولداۋىمەن جۇزەگە اسىرىلادى.

كەشەندى جوسپاردى ىسكە اسىرۋ مەديتسينالىق ۇيىمدار جۇمىسىنىڭ اشىقتىعىن ارتتىرۋعا، باسقارۋشىلىق شەشىمدەردى وبەكتيۆتى دەرەكتەر نەگىزىندە قابىلداۋعا جانە كورسەتىلەتىن مەديتسينالىق قىزمەتتەردىڭ ساپاسىن جۇيەلى تۇردە جاقسارتۋعا مۇمكىندىك بەرەدى.

Abai.kz