قازاقستان ءماجىلىسى قازاقستان مەن ۇلىبريتانيام اراسىنداعى ستراتەگيالىق ارىپتەستىك تۋرالى كەلىسىمدى راتيفيكاتسيالاعانىن حابارلادى.

«ءماجىلىس قازاقستان رەسپۋبليكاسى مەن ۇلىبريتانيا جانە سولتۇستىك يرلانديا بىرىككەن كورولدىگى اراسىنداعى ستراتەگيالىق ارىپتەستىك پەن ىنتىماقتاستىق تۋرالى كەلىسىمدى راتيفيكاتسيالادى. قۇجاتقا 2024 جىلعى 24 ساۋىردە استانا قالاسىندا قول قويىلعان بولاتىن»، — دەلىنگەن سارسەنبى كۇنگى حابارلامادا.

بۇل كەلىسىمدى جاساسۋ قاجەتتىلىگى ۇلىبريتانيانىڭ 2020 جىلدىڭ باسىندا ەۋروپالىق وداقتان شىعۋىنا بايلانىستى تۋىنداعان.

كەلىسىمنىڭ نەگىزگى باعىتتارى:

• ىنتىماقتاستىقتى نىعايتۋ: قۇجات ەكى ەل اراسىنداعى ساياسي، ەكونوميكالىق، مادەني جانە وزگە دە سالالارداعى حالىقارالىق ءىس-قيمىلدى نىعايتۋعا باعىتتالعان.

• ەكونوميكا جانە ينۆەستيتسيا: ساۋدا-ەكونوميكالىق جانە ينۆەستيتسيالىق بايلانىستاردى كەڭەيتۋ كوزدەلەدى.

• قاۋىپسىزدىك جانە عىلىم: قاۋىپسىزدىك سالاسىنداعى ءىس-قيمىلدى تەرەڭدەتۋ، عىلىمي-تەحنيكالىق جانە مادەني-گۋمانيتارلىق سالالارداعى ءوزارا بايلانىستى دامىتۋ قاراستىرىلعان.

پارلامەنتتىڭ مالىمەتىنشە، تاراپتار حالىقارالىق بەيبىتشىلىك پەن قاۋىپسىزدىكتى ساقتاۋ ماقساتىندا حالىقارالىق قۇقىق پەن ورتاق قۇندىلىقتار نەگىزىندە ءتيىمدى ساياسي ديالوگتى دامىتاتىن بولادى.

«بۇدان بولەك، كەلىسىم كاسىپكەرلىك، كەدەندىك قاتىناستار، ەڭبەك قۇقىعى، سوت تورەلىگى، زياتكەرلىك مەنشىك، ەنەرگەتيكا، ينۆەستيتسيا، دەنساۋلىق ساقتاۋ جانە ءبىلىم بەرۋ سالالارىنداعى ستراتەگيالىق ارىپتەستىكتى ىسكە اسىرۋدىڭ قۇقىقتىق نەگىزدەرىن ايقىندايدى»، — دەپ تولىقتىردى ماجىلىستەگىلەر.

Abai.kz