كوكتەمنىڭ شۋاعىنا بولەنگەن قاراعاندى ءوڭىرى ناۋرىز مەيرامىن ايرىقشا ءسان-سالتاناتپەن، كەڭ تىنىسپەن جانە شىنايى ىقىلاسپەن قارسى الۋدا. 

حالىقتىق جانە زاماناۋي اۋەندەر ۇندەسىپ، شات-شادىمان كوڭىل كۇي مەن اقجارقىن جۇزدەر مەرەكەنىڭ ەرەكشە رۋحىن ايشىقتاي تۇسۋدە. ءوڭىردىڭ بارلىق قالا-اۋداندارىندا ۇيىمداستىرىلعان دۋماندى شارالار ءداستۇر مەن جاڭاشىلدىقتى ساباقتاستىرىپ، ءاربىر تۇرعىن مەن قوناقتى جاڭارۋ مەن ۇيلەسىم مەرەكەسىنىڭ اجىراماس بولىگىنە اينالدىردى.

قالالاردىڭ ورتالىق الاڭدارىندا ەتنواۋىلدار بوي كوتەرىپ، تاقىرىپتىق كيىز ۇيلەر تىگىلىپ، تەاترلاندىرىلعان قويىلىمدار، ايتىس پەن كونتسەرتتىك باعدارلامالار ۇسىنىلۋدا.

بارشا جەردە ۇلىستىڭ ۇلى كۇنىنە ءتان كوكتەمگى سەرپىلىس پەن ۇلتتىق رۋح ايقىن سەزىلەدى.

مەرەكەنىڭ ەڭ اۋقىمدى الاڭدارىنىڭ ءبىرى قاراعاندى قالاسىنىڭ ورتالىق مادەنيەت جانە دەمالىس ساياباعىندا ۇيىمداستىرىلدى.

مۇنداعى مەرەكەلىك اتموسفەرا كىرەبەرىستەن-اق ايقىن اڭعارىلادى: ۇلتتىق ناقىشتاعى ءساندى اركا، تۋلارمەن كومكەرىلگەن كەڭىستىك — بارلىعى ۇيلەسىمدى بەزەندىرىلگەن.

كاسكادتى الاڭ اق شاڭقان كيىز ۇيلەر قونىس تەپكەن كوركەم ەتنواۋىلعا اينالدى. ۇلتتىق ويۋ-ورنەكتەرمەن بەزەندىرىلگەن ءاربىر كيىز ءۇي بەلگىلى ءبىر تاقىرىپتى ارقاۋ ەتەدى — ءداستۇرلى تۇرمىس، قولونەر، ۇلتتىق تاعامدار.

مۇندا قولونەر شەبەرلەرىنىڭ جارمەڭكەسى، ساۋدا قاتارلارى، ارت جانە فوتو ايماقتار،

سونداي-اق كوپشىلىك سۇيەتىن التىباقان ورنالاسقان.

مەرەكەنىڭ شىمىلدىعى «قوش كەلدىڭ، ءاز-ناۋرىز» اتتى تەاترلاندىرىلعان قويىلىممەن ءتۇرىلدى.

— ناۋرىز — جاي عانا مەرەكە ەمەس، بۇل — رۋحاني جاڭعىرۋ مەن ىشكى تۇلەۋدىڭ كەزەڭى. ول بىزگە ادامگەرشىلىك پەن ىزگىلىككە نەگىزدەلگەن قاراپايىم، بىراق ومىرلىك ماڭىزدى قۇندىلىقتاردى ەسكە سالادى: ۇيلەسىمدە ءومىر ءسۇرۋ، ءبىر-ءبىرىمىزدى قۇرمەتتەۋ، ەڭبەكتى قادىرلەۋ جانە شۇكىرشىلىك ەتۋ. ەڭ باستىسى — ۋاقىتىندا ايالداپ، ومىرگە جاڭاشا كوزقاراسپەن قاراۋ. ويتكەنى ءدال وسىدان ءوزارا تۇسىنىستىك پەن سىيلاستىق باستاۋ الادى. بۇل — سان عاسىرلىق دالا وركەنيەتىنە ءتان قاسيەت. حالىقتى ۇيىستىراتىن وسى مەيرامدا بىرلىگىمىز بەكي ءتۇسىپ، جاسامپاز، وزىق قوعام قالىپتاسسىن! مەملەكەت باسشىسى قاسىم-جومارت توقاەۆ اتاپ وتكەندەي، بارلىعى ىزگى ويدان، جىلى سوزدەن جانە دۇرىس ارەكەتتەن باستالادى. سوندا عانا جاڭعىرۋ ناقتى ىسپەن كورىنىس تابادى، — دەدى قاراعاندى وبلىسىنىڭ اكىمى ەرماعانبەت بولەكپاەۆ.

مەرەكەلىك شارالار كونتسەرتتىك باعدارلامامەن جالعاسىن تاپتى.

ساحنادا شىعارماشىلىق ۇجىمدارمەن بىرگە بەلگىلى ونەر مايتالماندارى — نۇرلان ونەرباەۆ، مارجان اراپباەۆا جانە «جىگىتتەر» توبى ونەر كورسەتتى.

كورەرمەندەرگە حالىق اندەرى مەن زاماناۋي ەسترادالىق شىعارمالار ۇسىنىلدى.

جاعالاۋدا ورنالاسقان مەرەكەلىك شاتىر بيىلعى دۋماننىڭ باستى ورتالىقتارىنىڭ بىرىنە اينالدى.

مۇندا ساندىك-قولدانبالى ونەر تۋىندىلارىنىڭ كورمەسى، وبلىستىق تاريحي-ولكەتانۋ مۇراجايىنىڭ كوشپەلى ەكسپوزيتسياسى ۇيىمداستىرىلدى. سونىمەن قاتار زاماناۋي تەحنولوگيالارعا ارنالعان الاڭدا روبوتوتەحنيكا مەن جاساندى ينتەللەكت جوبالارى تانىستىرىلدى.

روبوتوتەحنيكا كورمەسىندە حالىقارالىق دەڭگەيدەگى جارىستارعا قاتىسىپ جۇرگەن جاس دارىندار ءوز جەتىستىكتەرىن پاش ەتتى. ولاردىڭ قاتارىندا حالىقارالىق چەمپيوناتتاردىڭ بىرنەشە دۇركىن جۇلدەگەرى — «مۇراگەر» مەكتەبىنىڭ كومانداسى بار.

— قازىرگى جاستاردىڭ باسىم بولىگى باعدارلامالاۋ مەن تسيفرلىق تەحنولوگيالارعا بەت بۇرۋدا. مەنىڭشە، ەلىمىزدىڭ بولاشاعى ءدال وسى باعىتتارمەن تىعىز بايلانىستى. بۇل سالالارعا ينۆەستيتسيا ارتقان سايىن، كەلەشەگىمىز دە نۇرلى بولماق. بارشاڭىزدى ناۋرىز مەيرامىمەن قۇتتىقتايمىن! ماحاببات، باقىت جانە يگىلىك تىلەيمىن، — دەدى كوماندا مۇشەسى دامير ماعجان.

مەرەكەلىك الاڭدا بالالار ويىن ايماقتارى مەن سپورتتىق كەڭىستىكتەر دە جۇمىس ىستەدى. مۇندا قازاق كۇرەسى، اسىق اتۋ، ساداق اتۋ، ارقان تارتۋ جانە وزگە دە ۇلتتىق سپورت تۇرلەرىنەن جارىستار ءوتتى.

ناۋرىز مەيرامى كوپتەگەن قوناقتىڭ باسىن قوسىپ، ولار بۇل شۋاقتى كۇندى جاقىندارىمەن بىرگە قارسى الدى.

استانا قالاسىنان كەلگەن ەلامان قويشىباەۆ تا ءوز اسەرىمەن ءبولىستى.

— بۇگىن — ەرەكشە كۇن. بارشا قازاقستان حالقىنا بەيبىت اسپان، باقىت پەن بەرەكە تىلەيمىن. مەرەكەنىڭ جوعارى دەڭگەيدە ۇيىمداستىرىلعانى قۋانتادى — ءبارى كوركەم ءارى شىنايى، — دەدى ول.

قالا تۇرعىندارى دا ناۋرىزدى زور قۋانىشپەن قارسى الىپ، جۇرەكجاردى تىلەكتەرىن جەتكىزۋدە.

نيكولاي شپيلچەنكو جۇبايى يۋليامەن جانە كىشكەنتاي قىزىمەن بىرگە كەلگەن.

— بارشاڭىزدى ناۋرىزبەن قۇتتىقتايمىز! ءار شاڭىراققا دەنساۋلىق، باقىت، بەيبىتشىلىك پەن بەرەكە تىلەيمىز. ۇيلەرىڭىزدە ءاردايىم جىلىلىق پەن قۋانىش ورناسىن! بيىل كوكتەمنىڭ ءدال وسى مەرەكەمەن قاتار كەلۋى ەرەكشە اسەر قالدىرادى — تابيعاتتىڭ شىنايى جاڭارۋى انىق سەزىلەدى، — دەدى جاس وتباسى.

— مەن ءۇشىن ناۋرىز — جىل سايىن اسىعا كۇتەتىن مەرەكە. ساياباقتاعى دۋمان جىل وتكەن سايىن مازمۇندى ءارى قىزىقتى بولا تۇسۋدە. قاراعاندىلىقتار مەن قالا قوناقتارىن وسى جارقىن مەرەكەمەن قۇتتىقتايمىن! بارشاڭىزعا دەنساۋلىق، جاقسىلىق پەن باقىت تىلەيمىن، — دەيدى «ءسۇيىنشى» بي ءانسامبلىنىڭ قاتىسۋشىسى ايزا مۇحانوۆا.

حالىقتىق سەرۋەندەر ەكى كۇن بويى جالعاسادى.

بيىل قاراعاندى وبلىسىندا ناۋرىزناما ونكۇندىگى اياسىندا ۇلتتىق ءداستۇر مەن مادەنيەتتى ساقتاۋ جانە كەڭىنەن ناسيحاتتاۋعا باعىتتالعان مىڭنان استام ءىس-شارا ۇيىمداستىرىلدى.

فوتو: جانگەلدى ابدىعالىم جانە رۋسلان مازۋنين

Abai.kz