پارلامەنت ءماجىلىسىنىڭ دەپۋتاتى باقىتجان بازاربەك الماتىداعى ءال-فارابي داڭعىلىندا ورىن العان جول-كولىك وقيعاسىنا بايلانىستى پىكىر ءبىلدىرىپ، قۇقىق قورعاۋ جۇيەسىن تۇبەگەيلى رەفورمالاۋ قاجەتتىگىن مالىمدەدى.

حالىق قالاۋلىسىنىڭ پايىمداۋىنشا، جوعارى لاۋازىمدى تۇلعالار مەن ءىرى بيزنەس وكىلدەرىنىڭ بالالارىنا كورسەتىلەتىن جەڭىلدىكتەر مەن «قامقورلىق» مەملەكەتتىك ورگانداردىڭ جۇمىسىنا كەدەرگى كەلتىرىپ وتىر. دەپۋتات بۇل ماسەلەنى پارلامەنت كۋلۋارىندا جۋرناليستەرگە بەرگەن سۇحباتىندا اشىق ايتتى.

باقىتجان بازاربەك ءوز سوزىندە الماتى قالاسىنداعى جول قوزعالىسى ەرەجەلەرىنىڭ ساقتالۋىنا قاتىستى ءوز تۇجىرىمدارىمەن ءبولىستى. ول قىمبات سپورتتىق كولىكتەردىڭ قالا كوشەلەرىندە ەمىن-ەركىن ءجۇرۋى جانە ولاردىڭ يەلەرىنىڭ جاۋاپكەرشىلىكتەن قاشىپ قۇتىلۋى جۇيەلى ماسەلەگە اينالعانىن جەتكىزدى. دەپۋتات ىشكى ىستەر ورگاندارىنداعى مۇنداي بەيبەرەكەتسىزدىكتى توقتاتۋ ءۇشىن تەك الماتىمەن شەكتەلمەي، بۇكىل رەسپۋبليكا دەڭگەيىندە تەكسەرىس جۇرگىزۋ كەرەكتىگىن العا تارتتى.

ءماجىلىس دەپۋتاتى لاۋازىمدى تۇلعالاردىڭ بالالارىنا قاتىستى قالىپتاسقان جاعدايدى قاتاڭ سىنعا الدى. ول:

«مۇنداي «ماجوريكتىك» جاعداي، ياعني جوعارى لاۋازىمدى شەنەۋنىكتەردىڭ، لاۋازىمدى تۇلعالاردىڭ، ءىرى بيزنەسمەندەردىڭ بالالارىنا ىشكى ىستەر دەپارتامەنتتەرىندەگى لاۋازىمدى ادامداردىڭ قامقورلىق تانىتۋى – بۇل تەك الماتىدا عانا ەمەس، باسقا ايماقتاردا دا جەتكىلىكتى. سوندىقتان ىشكى ىستەر ورگاندارىندا اۋقىمدى تازارتۋ جۇرگىزۋ قاجەتتىلىگى تۋىنداپ تۇر»، – دەپ مالىمدەدى. بازاربەكتىڭ ايتۋىنشا، زاڭ الدىندا بارلىق ازاماتتىڭ تەڭدىگى ءىس جۇزىندە دالەلدەنۋى ءتيىس.

ءسوز سوڭىندا دەپۋتات قوعامداعى ەسكى تۇسىنىكتەر مەن ارتىقشىلىقتاردىڭ ۋاقىتى وتكەنىن قاداپ ايتتى. ول ءوز سوزىندە:

«مەن ءوزىم الماتىدا ءال-فارابي كوشەسىنىڭ بويىندا تۇرامىن، كۇن سايىن ەليتالىق كولىكتەردىڭ زۋلاپ جۇرگەنىن كورەمىز، بىراق ولاردىڭ جاۋاپقا تارتىلعانىن بايقامايمىز. 90-جىلدارداعىداي «ماجورلاردىڭ» زامانى ءوتتى»، – دەگەن پىكىر ءبىلدىردى.

ونىڭ الدىندا دەپۋتات مۇرات ابەنوۆ تا 3 جاستىڭ ءومىرىن قيعان ءال-فارابيدەگى جول اپاتىنا بايلانىستى تىكەلەي ەفير جۇرگىزگەن ەدى. ول مۇنداي قادامعا بارۋىنا قايتىس بولعان قىزدىڭ جاقىندارىنىڭ وتىنىشىمەن بارعانىن جەتكىزگەن ەدى. قىلمىسكەردىڭ جاقىندارى مەكەنجايىن قايدان العانى بەلگىسىز، قارالى ۇيگە وحرانامەن بارىپ، ء"بىزدىڭ كىم ەكەنىمىزدى كورىڭدەر" دەگەن سىڭايدا قىر كورسەتكەن.

Abai.kz