الماتىداعى ءال فارابي داڭعىلى بويىنداعى جولدا ءۇش ادامنىڭ قازاسىنا سەبەپ بولعان كولىك اپاتى قوعامدا رەزونانس تۋدىرعاننان كەيىن ىشكى ىستەر ءمينيسترى ەرجان سادەنوۆتىڭ بۇيرىعىمەن الماتى قالاسى پوليتسيا دەپارتامەنتىنىڭ بىرنەشە لاۋازىمدى شەنەۋنىگى قىزمەتتەن الىندى. مۇنى ىشكى ىستەر مينيسترلىگى اقپاراتتىق ساياسات دەپارتامەنتىنىڭ باسشىسى شىڭعىس الەكەشەۆ حابارلادى.

ء"مينيستردىڭ بۇيرىعىمەن الماتى قالالىق پوليتسيا دەپارتامەنتى باستىعىنىڭ سىرتقى قىزمەتتەر مەن جول قاۋىپسىزدىگىن قاداعالايتىن ورىنباسارى، سونداي-اق اكىمشىلىك پوليتسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتتەن بوساتىلدى", - دەدى الەكەشەۆ.

بۇعان قوسا، ونىڭ سوزىنشە، كولىككە مەملەكەتتىك ءنومىر بەلگىسىن زاڭسىز بەرگەن بولۋى مۇمكىن دەگەن كۇدىككە بايلانىستى ىشكى قاۋىپسىزدىك قىزمەتى قىلمىستىق ءىس قوزعاعان. ارەكەتسىزدىگى ءۇشىن پوليتسيانىڭ جوعارى لاۋازىمدى قىزمەتكەرىنە قاتىستى قىلمىستىق ءىس قوزعالدى، ول ۋاقىتشا ۇستاۋ يزولياتورىنا قامالدى، دەپ حابارلادى ىشكى ىستەر مينيسترلىگى.

سوت اپاتقا ۇشىراعان ZEEKR اۆتوكولىگى جۇرگىزۋشىسىن قاماۋعا الۋ تۋرالى شەشىم شىعارعان. پوليتسيا جۇرگىزۋشىنىڭ قانىنان الكوگول ءىزى تابىلعانىن ايتتى. ول قازىر اۋرۋحاناداەم قابىلداپ جاتىر، جاعدايى وڭالعان سوڭ ونى ۋاقىتشا قاماۋ يزولياتورىنا اۋىستىرماق.

الدىن الا اقپارات بويىنشا، 21 ناۋرىزدا تاڭعى ساعات 3.30 شاماسىندا ءال فارابي داڭعىلىمەن جىلدامدىعىن شەكتى شامادان اسىرعان Zeekr كولىگى جولدىڭ قارسى بەتىنە شىعىپ كەتىپ، Mercedes كولىگىمەن سوقتىعىسقان. اپات سالدارىنان Mercedes جۇرگىزۋشىسى مەن ونىڭ ەكى جولاۋشىسى سول جەردە مەرت بولعان.

Abai.kz