بۇگىن جەتىسۋ وبلىسىندا «تازا قازاقستان» ەكولوگيالىق باعدارلاماسى اياسىندا سانيتارلىق تازالىق جانە كوگالداندىرۋ شارالارى وتكىزىلدى. بۇل ءىس-شارالارعا 7300-گە جۋىق  ادام قاتىسىپ، سونىڭ ناتيجەسىندە 450 گەكتار اۋماق تازارتىلىپ، 2,2 مىڭ اعاش كوشەتى وتىرعىزىلدى. بۇل رەتتە «7 OZEN» ەكولوگيالىق اكتسياسى كوكسۋ، ەسكەلدى، كەربۇلاق اۋداندارىن قامتىپ، كوكسۋ وزەنىنىڭ ارناسى تازالاندى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ەكولوگيالىق اكتسياعا قاتىسقان وبلىس اكىمىنىڭ ورىنباسارى مارلەن كولباەۆتىڭ ايتۋىنشا، «7 OZEN» اكتسياسى اياسىندا ءار سەنبى سايىن وڭىردەگى ءبىر وزەننىڭ ارناسى تازالانادى.

- وتكەن سەنبىدە ەكى اۋدان مەن ەكى قالانىڭ اۋماعىنان اعىپ جاتقان قاراتال وزەنىنىڭ جاعالاۋى تازالاندى. ال بۇگىن كوكسۋ وزەنىنىڭ ارناسىن تازالاۋ جۇمىستارىن كوكسۋ اۋدانىنان باستاپ، ودان ءارى ەسكەلدى، كەربۇلاق اۋداندارىندا جالعاستىردىق، 700-دەن استام اعاش ەكتىك. وسى تازالىق شارالارىنا قاتىسقانداردىڭ بارىنە العىس ايتامىن. ءبىز ەڭ الدىمەن ءوزىمىز ماڭايىمىزدى تازا ۇستاۋىمىز كەرەك. سوندا جەتىسۋدىڭ ەرەكشە تابيعاتى مەن ونىڭ سۇلۋلىعىن ساقتاپ قالا الامىز، - دەدى م. كولباەۆ.

ەكولوگيالىق اكتسياعا قاتىسۋشىلار دا ءوز پىكىرىن ءبىلدىردى.

- تابيعاتىمىزدى تازا ۇستاۋ – بارشامىزدىڭ ورتاق مىندەتىمىز. بۇل رەتتە بۇگىن كوكسۋ وزەنىنىڭ بويىن تازالاۋ مەن اعاش وتىرعىزۋ جۇمىستارىنا ريزاشىلىقپەن قاتىستىم. وسىنداي يگى شارالار ءجيى وتكىزىلىپ تۇرسا، بۇل كەلەشەك ۇرپاققا ۇلگى بولىپ، تابيعاتقا قامقورلىق جاساۋ مادەنيەتى قالىپتاسادى دەپ سەنەمىن، - دەدى كوكسۋلىق تۇرعىن ەرلان شالقىبەكوۆ.

وسى كۇنى سانيتارلىق تازالىق شارالارىنا بەلسەنە قاتىسقان ەسكەلدى اۋدانىنىڭ تۇرعىنى اسەت وزەنباەۆ تا وي قوستى:

- ۆولونتەرلىك جۇمىستىڭ ماڭىزدى باعىتىنىڭ ءبىرى – تازالاۋ مەن كوگالداندىرۋعا اتسالىسۋ. سوندىقتان وسىنداي شارالارعا تۇراقتى قاتىسامىن. مۇنىڭ ءبارى جالپى العاندا ەكولوگيالىق جاعدايعا وڭ اسەرىن تيگىزەدى. سونىمەن قاتار ءبىز حالىق اراسىندا ءوز ۇلگىمىزبەن ەكولوگيالىق ءومىر سالتىن دامىتۋعا ءوز ۇلەسىمىزدى قوسىپ كەلەمىز، - دەدى ول.

جالپى وسى كۇنى «7 OZEN» ەكولوگيالىق اكتسياسى اياسىندا وڭىردەگى 1100-دەن استام ادام، 26 تەحنيكا تارتىلدى، 85 توننا قوقىس شىعارىلىپ، 720 ءتۇپ اعاش وتىرعىزىلدى.

جەتىسۋ وبلىسى اكىمىنىڭ ءباسپاسوز قىزمەتى.

Abai.kz