قازاق ەلى ىقىلىم زاماننان بەرى قاراي تالاي تاريحي تۇلعالاردى تۋدىردى. ولاردىڭ ونەگەلى ءومىرىن ەل جادىنا ساقتادى. بولاشاق ۇرپاقتارىنا ۇلگى-امانات ەتتى. بۇل ءۇردىستىڭ ارقاۋى ۇزىلمەي، جۇلگەسى جوعالماي كۇنى بۇگىنگە دەيىن جالعاسىپ كەلەدى.

اسىرەسە تاۋەلسىزدىك العاننان كەيىن، ساياسي تسەنزۋرانىڭ، يدەولوگيالىق بۇعاۋدىڭ قامىتى الىنعاننان سوڭ ساياسي سەبەپتەرمەن تاسا دا قالعان، اتىن، حاتىن ايتۋعا تىيىم سالىنعان تۇلعالار ەلىمەن قايتا قاۋىشتى. ۇرپاق ساناسىندا قايتا جاڭعىردى.

قازاق ءۇشىن قاسيەتتى بولىپ تابىلاتىن جىلقى جىلى دا ەل ءۇشىن تۋعان ەرلەردىڭ مەرەيتويلارىنا تولى بولىپ وتىر. ەل كولەمىندە اتالىپ ءوتىپ، ولگەنىمىز ءتىرىلىپ، وشكەنىمىز قايتا جانعانداي كۇي كەشىپ جۇرگەن جايىمىز بار.

بۇل يگى شارالاردىڭ ماڭىزى وتە زور ەكەنىن باسا ايتۋىمىز كەرەك.

ايتۋلى تۇلعالاردىڭ ىشىندە ەلىمىزگە ەسىمى اياۋلى ساياسي، مەملەكەتتىك قايراتكەر دە، عىلىم شىراعىن جاققان عالىمدار دا، ءسوز كيەسى دارىعان اقىن-جازۋشىلاردا بار. وعان ايقىن مىسال رەتىندە

الاش قوزعالىسىنىڭ كوشباسشىسى، مەملەكەت جانە قوعام قايراتكەرى ءاليحان بوكەيحاننىڭ تۋعانىنا 160 جىل، قازاق تاريح عىلىمىنىڭ شامشىراعى، عالىم ءارى اعارتۋشى شوقان ءۋاليحانوۆتىڭ تۋعانىنا 190 جىل، سونىمەن قاتار، «ءتىرى گومەر» اتانعان  جامبىل جاباەۆتىڭ تۋعانىنا 180 جىل، اقيىق اقىن مۇقاعالي ماقاتاەۆتىڭ تۋعانىنا 95 جىل تولعانىن تىلگە تيەك ەتسەك تە،

قازاق ادەبيەتىنىڭ كلاسسيگى، جازۋشى قابدەش ءجۇمادىلوۆتىڭ تۋعانىنا 90 جىل، ال قازاق كاسىبي مۋزىكاسىنىڭ نەگىزىن قالاۋشىلاردىڭ ءبىرى – احمەت جۇبانوۆتىڭ تۋعانىنا 120 جىل تولاعانىن، ول كىسىنىڭ ءىزىن باسقان دريجەر كومپوزيتور كەڭەس دۇيسەكەەۆتىڭ تۋعانىنا 80, ال  قازاق كينوسىنىڭ جارىق جۇلدىزى مەرۋەرت وتەكەشوۆا   75 جاسقا تولعانىن ماقتانىشپەن اتاساق تا كوپتىك ەتپەيدى.

سونداي-اق بيىل اقىن، سازگەر، تەلەجۇرگىزۋشى تىنىشباي راحىموۆتىڭ (1946-1999) تۋىلعانىنا دا 80 جىل تولادى.

قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگى تىنىشباي راحىموۆ بۇرىنعى قازاق ونەرپازدارى سياقتى اقىندىق، سازگەرلىك، ورىنداۋشىلىق ونەردى تەڭ الىپ جۇرگەن بەساسپاپ تۇلعا. قوبىز بەن دومبىرانىڭ سازىن دا، فورتەپيانا دىبىستارىن دا جەتىك بىلگەن، كوكىرەگى مەن قولى تەڭ جۇيتكىگەن قۇيماقۇلاق، جانى نازىك ونەردىڭ ءوز پەرزەنتى، تابيعي تالانت.

كەزىندە جەكە اۆتورلىق جوباسى «كەش جارىق» حابارى ونى ەل ىشىنە تانىمال ەتسە، 1993 جىلى شىعارعان «التايدىڭ ار جاعىنان كەلگەن ارۋ» ءانى شەتەل قازاقتارىنا ماشھۇر ەتتى. ۇلتتىق بوياۋى كۇشتى «بوزورامال» انىدە ەل ءىشى-سىرتىنا كەڭ تاراپ، حالىق انىنە اينالىپ كەتتى. مەملەكەتتىك تاپسىرىسپەن شىققان تاڭداۋلى ولەڭدەر جيناعى ءوز الدىنا ءبىر توبە.

تاريح تولقىنىندا تۋىلىپ، حالىق قالاۋلىسىنا اينالعان تالانتتاردى ۇلىقتاۋ، ءومىرى مەن ونەرىن وسكەلەڭ ۇرپاققا جەتكىزۋ قاسيەتتى پارىزىمىز. وسىنداي يگى باستامالار، ناقتى ءىس-شارالار ارقىلى ۇلت رۋحانياتى تولىعىپ، مازمۇنى باي بەرەتىنى ءسوزسىز.

Abai.kz