«شابىت» ونەر اكادەمياسىنىڭ اينالاسىندا داۋلى جاعداي تۋىندادى. اڭگىمە قازاقستاننىڭ حالىق ءارتىسى مەرۋەرت وتەكەشوۆا مەن وقۋ ورنىنىڭ دەكانى ەرنياز بىرىمقۇلوۆقا قاتىستى بولىپ وتىر.

الەۋمەتتىك جەلىدە جاريالانعان ۆيدەودا ستۋدەنتتەر ەكىنشى سەمەستر باستالعالى بەرى مەرۋەرت وتەكەشوۆاعا قاتىستى «وتكازنوي» جانە «دوكلادنوي» جازۋ جاعدايلارى بولعانىن ايتتى.

ستۋدەنتتەردىڭ سوزىنشە، بۇل ىسكە ولاردى شەبەرحانا دەكانى ەرنياز بىرىمقۇلوۆ ارالاستىرعان. ولار دەكاننىڭ قۇجاتتى كىمگە جانە قالاي جازۋ كەرەكتىگىن ءتۇسىندىرىپ، ناقتى باعىت بەرگەنىن العا تارتتى.

«ەكىنشى سەمەستر باستالعالى بەرى مەرۋەرت وتەكەشوۆا شەبەرحاناسىندا اپايىمىزعا قاتىستى “وتكازنوي” جانە “دوكلادنوي” جازۋ جاعدايلارى ورىن الدى. ساباقتان بولەك، ستۋدەنتتەردى وسى ىسكە ارالاستىرعان دەكانىمىز ەرنياز بىرىمقۇلوۆ بولدى. ول قۇجاتتاردى كىمگە جانە قالاي جازۋ كەرەكتىگى، “وتكازنوي” جازۋ ءتارتىبى تۋرالى ناقتى نۇسقاۋلار بەردى. بۇگىنگى ەمتيحان كەزىندە دە ۇستازىمىزعا جانە ترۋپپاداعى قىزدارعا قاتىستى اۋىر سوزدەر ايتىلىپ، پسيحولوگيالىق قىسىم كورسەتىلدى. ءبىز مۇنداي جاعدايعا قارسىمىز»، – دەيدى ستۋدەنتتەر.

ولاردىڭ ايتۋىنشا، دەكان ستۋدەنتتەرمەن جەكە كەزدەسىپ، جاعدايدى تالقىلاپ، «وسىلاي ىستەڭدەر، بىلاي جازىڭدار» دەپ باعىت بەرىپ وتىرعان.

«مۇنداي ارەكەتتەر وقۋ پروتسەسىنە، ساباعىمىزعا جانە اپايىمىزبەن قارىم-قاتىناسىمىزعا كەرى اسەر ەتتى»، – دەلىنگەن ۆيدەودا.

بۇل جاعداي قوعامدا قىزۋ تالقىلانىپ جاتىر. وسىعان بايلانىستى پروديۋسەر بايان الاگوزوۆا دا پىكىر ءبىلدىردى. ول Instagram پاراقشاسىندا ۇستازعا قاتىستى مۇنداي ارەكەتتى اۋىر قابىلداعانىن ايتىپ، جاعدايدى ساتقىندىققا تەڭەدى.

«مەرۋەرت اپا ءۇشىن جانىم اۋىرىپ وتىر. بۇل – ۇستازعا جاسالعان ۇلكەن قيانات. ءتىپتى بۇل ىسكە باسشىلىقتىڭ ىقپالى بولدى دەگەننىڭ وزىندە، ستۋدەنتتەردىڭ دە ءوز ۇستانىمى بولۋى كەرەك ەدى»، – دەپ جازدى پروديۋسەر.

ال مەرۋەرت وتەكەشوۆا 4vlastinfo پورتالىنا بەرگەن پىكىرىندە دەكانمەن اراداعى قارىم-قاتىناسى تۋرالى ايتتى.

«جالپى ءبىز دەكانمەن 4 جىل بىرگە جۇمىس ىستەدىك. جاس بولعاندىقتان، ول ءالى دە ۇيرەنەدى دەپ ويلايمىن. بالا دا ەمەس، ەر ازامات قوي. وسى بالادان بىردەڭە شىعادى دەپ سەنىپ، بىرگە جۇمىس ىستەدىك. بىراق بۇل بالانىڭ ماعان دەگەن كوزقاراسى وزگەرگەن سياقتى.

مۇمكىن، ول مەنىمەن جۇمىس ىستەگىسى كەلمەيتىن شىعار، ونى دا بىلمەيمىن. دەكان بولعاننان كەيىن ول كافەدرانىڭ باستىعى عوي. سوندىقتان جاستارعا اقىل ايتىپ، ولاردى ءتۇسىنىپ، دۇرىس جولعا باعىتتاۋى كەرەك. ال قازىر نە ىستەپ ءجۇر – بەلگىسىز. مەن رەكتورعا دا بارىپ ايتتىم: ول كىسىمەن جۇمىس ىستەمەيمىن. تاعى ءبىر مۇعالىم بار، ول كىسىمەن دە جۇمىس ىستەگىم كەلمەيدى. قاشانعا دەيىن مەنى سىيلامايتىن اداممەن جۇمىس ىستەيمىن؟ ول مەنىمەن اقىلداسپايدى، ءوز بىلگەنىن ىستەيدى. مەنى قابىلدامايتىن سياقتى. نەگە ەكەنىن تۇسىنبەيمىن»، – دەدى اكتريسا.

«شابىت» ونەر اكادەمياسىنىڭ وكىلى ءمان-جايدى سۇراعان NEGE تىلشىسىنە اتالعان جاعدايعا بايلانىستى ىشكى تەكسەرىس باستالعانىن مالىمدەدى. وقۋ ورنى وكىلدەرىنىڭ ايتۋىنشا، تەكسەرۋ ناتيجەسى بويىنشا رەسمي اقپارات قوسىمشا جاريالانادى.

دەرەككوزى: nege.kz

Abai.kz