اقمولا وبلىسى قورعالجىن اۋدانىنداعى سابىندى اۋىلىنان 2 شاقىرىم جەردە «شوپتىكول» بوگەتى جارىلدى. قازىرگى ۋاقىتتا وقيعا ورنىندا سۋدى قاۋىپسىز وتكىزۋ بويىنشا جەدەل جۇمىستار جۇرگىزىلىپ جاتىر جانە جاعداي مينيسترلىكتىڭ تۇراقتى باقىلاۋىنا الىنعان.

اپات سالدارىن جويۋعا تجم، جەرگىلىكتى اتقارۋشى ورگاندار، اۋداندىق پوليتسيا ءبولىمى مەن جول قىزمەتتەرىنىڭ كۇشتەرى جۇمىلدىرىلدى. ماماندار دامبانى نىعايتۋ، ينەرتتى ماتەريالداردى توگۋ جانە سۋدى بۇرۋ جۇمىستارىن اتقارۋدا. «قازاۆتوجول» ۇلتتىق كومپانياسىنىڭ مالىمەتىنشە، بوگەتتەن شىققان سۋ ەگىستىك القاپتارى ارقىلى ەلدى مەكەنگە قاراي جايىلىپ، «استانا – قورعالجىن» تاس جولىنىڭ 75-شاقىرىمىنا دەيىن جەتكەن.

دەگەنمەن، رەسپۋبليكالىق ماڭىزى بار جولدى سۋ باسۋ قاۋپىنە جول بەرىلگەن جوق. كولىك جولىنىڭ بويىنداعى سۋ وتكىزۋ قۇبىرى شتاتتىق رەجيمدە تولىق قۋاتىندا جۇمىس ىستەپ تۇر. جولدىڭ زاقىمدالماعانى نەمەسە شايىلماعانى رەسمي تۇردە راستالدى.

قازىرگى ساتتە «قازاۆتوجول» وبلىستىق فيليالىنىڭ 14 بىرلىك تەحنيكاسى مەن 30-دان استام قىزمەتكەرى جولدىڭ قاۋىپسىزدىگىن قامتاماسىز ەتۋدە.

Abai.kz