جاقىندا مەن دەۆيد پەرەلل مەن سەم التمان اراسىنداعى جەتى مينۋتتىق سۇحباتتى تىڭداپ شىقتىم. قىسقا عانا اڭگىمە بولعانىمەن، وندا جاساندى ينتەللەكت پەن جازۋ، ءبىلىم بەرۋ، قۇرالداردىڭ ەۆوليۋتسياسى جانە ادامارالىق بايلانىس سياقتى تالاي ماڭىزدى تاقىرىپ قامتىلعان.

بۇل سۇحبات مەنى كوپتەن مازالاپ جۇرگەن ءبىر سۇراققا جەتەلەدى:

ءبىز جازۋدىڭ ادام ءۇشىن اسا قۇندى ەكەنىن بىلەمىز. جازۋ دەگەنىمىز ويلاۋدىڭ ءوزى. بىراق جاساندى ينتەللەكت ءماتىندى ادامنان الدەقايدا جىلدام ءارى ءتيىمدى جاساي الاتىن زاماندا، نەگە ءبىز ءالى دە ادام جازعان دۇنيەلەردى وقيمىز؟ نەگە ولار بىزگە تارتىمدى؟

جاۋابى قاراپايىم: ءبىز تەك ءسوزدى نەمەسە بەينەنى وقىمايمىز، ءبىز اۆتوردىڭ وزىمەن بايلانىس ورناتامىز.

ءوزىمنىڭ وقۋ تاجىريبەمدى ەسكە الامىن. قىزىقتى ماقالا نەمەسە جاقسى كىتاپ وقىسام، مىندەتتى تۇردە اۆتوردىڭ ءومىر جولىن، تاعدىرىن زەرتتەي باستايمىن. بۇل دەگەنىمىز جاساندى ينتەللەكت بەرە المايتىن ەرەكشە اسەر.

تەحنولوگيا ءومىرىمىزدى، ءتىپتى قوعامنىڭ قۇرىلىمىن وزگەرتۋى مۇمكىن. بىراق ادامعا عانا ءتان قاسيەتتەر، اڭگىمە ايتۋ قابىلەتى مەن بايلانىس ورناتۋعا دەگەن قۇشتارلىق ەشقاشان جوعالمايدى.

بىزگە جازۋ كەرەك. بىزگە ءتىل كەرەك. بىزگە ءسوز قاجەت.

ويتكەنى ءتىلدىڭ شەگى — ءبىزدىڭ الەمىمىزدىڭ شەگى.

سۋرەت: ۆيدەو سكرينى.

سىزدەرگە الگىندە ايتقان سۇحباتتان ءۇزىندى تومەندە:

دەۆيد پەرەلل: نەلىكتەن جاساندى ينتەللەكت جازۋدى جويىپ جىبەرمەيدى؟

سەم التمان: مەن جاساندى ينتەللەكت جازۋدى جويىپ جاتىر دەگەن ەشقانداي دالەل كورىپ تۇرعان جوقپىن. ءيا، ينتەرنەتتە ساپاسى تومەن جي ماتىندەرى كوپ، ستۋدەنتتەردىڭ كەيبىر جۇمىستارى دا سول ارقىلى جازىلىپ جاتقان شىعار. بىراق مۇنىڭ ءبارى شىنايى قاۋىپ دەپ ويلامايمىن.

جاساندى ينتەللەكت تولىققاندى «سۋپەرينتەللەكت» دەڭگەيىنە جەتكەندە عانا ادام جازۋىن تولىق الماستىرادى دەپ ايتۋعا بولار ەدى. بىراق ول كەزدە ءبىزدى بۇدان دا ءىرى ماسەلەلەر كۇتىپ تۇرادى.

ءتىپتى ادامنان دا جاقسى جازا الاتىن جۇيە پايدا بولدى دەلىك.

سوندا 2027 جىلعى ەڭ تانىمال رومانداردىڭ مۇقاباسىندا ادام اۆتورىنىڭ اتى جازىلا ما؟ مەنىڭشە، ءيا.

ويتكەنى مەن جاقسى كىتاپ وقىپ بولعان سوڭ ەڭ الدىمەن اۆتور تۋرالى بىلگىم كەلەدى. ونىڭ ءومىرىن، تاعدىرىن تۇسىنگىم كەلەدى. ال جم ءماتىنى ماعان ونداي سەزىم سىيلاي المايدى.

كەرەمەت كىتاپ وقىعاندا، سەن ءبىر اداممەن بايلانىس ورناتاسىڭ. ونى جەكە تانىماساڭ دا، تانىعانداي بولاسىڭ. ورتاق ادامدىق تاجىريبە بارداي سەزىنەسىڭ. مىنە، كىتاپتىڭ ناعىز قۇندىلىعى وسى.

دەۆيد پەرەلل: ChatGPT داۋىرىندە جازۋشىلاردى قالاي تاربيەلەۋ كەرەك؟

سەم التمان: ءبىر شىعارماشىلىق جازۋ ۇستازى تۋرالى اڭگىمە ەستىگەنمىن. ستۋدەنتتەرگە ءبىرىنشى كۇنى روماننىڭ العاشقى ابزاتسىن جازۋدى تاپسىرادى. ادەتتە ولار جاس جازۋشىلارعا ءتان قاتەلىكتەر جىبەرەدى: ارتىق مەتافورا، تىم ءساندى سوزدەر، جاساندى اسەر.

سوسىن ۇستاز ءبىر جاتتىعۋ جاساتادى: ءار بەتتەن ءبىر مەتافورانى، ءار سويلەمنەن ءبىر ارتىق ءسوزدى الىپ تاستاۋ. وسىلايشا 10 بەت 1 بەتكە دەيىن قىسقارادى. ناتيجەسىندە ءماتىن جەڭىلدەيدى. بىراق ءبىر ماسەلە اشىلادى: وندا وقيعا جوق.

ادامدار ادەمى جازۋعا تىرىسادى، بىراق وقىرمانعا قىزىعى وقيعا.

ال كەيبىر بەستسەللەرلەردى قاراڭىز: سيۋجەتى كەرەمەت، بىراق ءتىلى ءالسىز.

وسىندايدا ەكەۋىن بىرىكتىرۋگە بولا ما؟ جي قۇرالدارى سوعان كومەكتەسە الا ما دەگەن سۇراق تۋادى.

دەۆيد پەرەلل: ChatGPT-ءدىڭ اڭگىمە ايتۋ قابىلەتى تۋرالى نە ويلايسىز؟

سەم التمان: ازىرگە بۇل باعىتتا السىزدەۋ، بىراق بولاشاقتا جاقسارادى. مودەلدەر جىلدام دامىپ جاتىر. ەگەر ولاردى اڭگىمە ايتۋعا ارنايى ۇيرەتسەك، ناتيجە الدەقايدا جاقسى بولادى.

دەۆيد پەرەلل: ChatGPT-ءدى كۇندەلىكتى قالاي قولداناسىز؟

سەم التمان: بۇرىن بىرنەشە عانا ماقساتتا قولداناتىنمىن. قازىر ول امبەباپ قۇرالعا اينالدى. ءار بىرنەشە اي سايىن ونى قولدانۋدىڭ جاڭا ءتاسىلىن تابامىن. ازىرگە جۇمىس پروتسەستەرىنە تولىق كىرىگە قويعان جوق، بىراق ۋاقىت وتە بۇل وزگەرەدى.

كوپ ادامدار ونى باعدارلامالاۋدا قولداناتىنىن ايتادى， «ءومىرىمدى وزگەرتتى» دەيدى. باسقالارى بالالاردىڭ وقۋىنا، مۇعالىمدەر ساباق بەرۋىنە اسەر ەتكەنىن ايتادى. مەديتسينا مەن شىعارماشىلىقتا دا مىسالدار كوپ.

دەۆيد پەرەلل: ول سىزگە ەلەكتروندى حاتتار جازۋعا كومەكتەسە الا ما؟

سەم التمان: ۇزاق حاتتاردى قىسقاشا مازمۇنداۋدا وتە ىڭعايلى. كەيدە ۇزاق حاتتاردى مۇلدە وقىمايمىن، تەك ونىڭ قىسقاشا نۇسقاسىن قارايمىن.

دەۆيد پەرەلل: ۇلكەن تىلدىك مودەلدەر جازۋ مەن كوممۋنيكاتسياعا دەگەن كوزقاراسىڭىزدى قالاي وزگەرتتى؟

سەم التمان: بولاشاقتا ادامدار باسقاشا جازاتىن بولادى.

قازىر ءبىر قىزىق جاعداي بار: بىرەۋ بىرنەشە ويدى جي-گە بەرىپ، ادەمى حات جازدىرادى، ال ونى العان ادام قايتادان قىسقارتىپ وقيدى. ءبىز نەگىزى تەك نەگىزگى ويلاردى عانا قالايمىز، بىراق الەۋمەتتىك ەتيكەت ساقتالادى.

بىراق بولاشاقتا جاڭا قۇرالدار پايدا بولادى， ولار تەك ءماتىندى كەڭەيتپەيدى، كەرىسىنشە ويلاۋ كەڭىستىگىندە جاڭا يدەيا تابۋعا كومەكتەسەدى.

كومپيۋتەردىڭ ەڭ جاقسى قاسيەتى دە وسى ەمەس پە؟ ول بىزگە ءوز بەتىمىزشە جاساي المايتىن نارسەنى جاساۋعا كومەكتەسەدى.

ءبىر قىزىعى، بىزدە ونداعان جىل بويى «ويلاۋ قۇرالدارى» بار، بىراق ادامدار ءالى دە جازۋدى Microsoft Word اشىپ، تەرۋمەن شەكتەلەدى. بۇل بىلايشا ايتقاندا， كادىمگى جازۋ ماشينكاسى سياقتى.

ال شىن مانىندە، جازۋدىڭ ءوزى-اق كەرەمەت نارسە. بىراق ونى ودان دا جەتىلدىرۋگە تولىق مۇمكىندىك بار.

دايىنداعان دۇيسەنالى الىماقىن

Abai.kz