قازاقتىڭ دالا ساحناسىندا اۋىزدان اۋىزعا ءان ۇيرەنىپ، ەستى انشىگە شاكىرت بولعان قانشاما دارىندار وتكەن. سولاردىڭ ىشىندە شوقتىعى بيىگى، قازاق ءانىن دۇنيەجۇزىنە تانىتقان ارقالى ءانشى، بيىك داۋىس يەسى، كەڭ تىنىستى امىرە قاشاۋباەۆ دەسەك، سول ءانشىنىڭ قاسىنا ەرىپ، ايتقانىن ءانىن قۇيما قۇلاققا قۇيىپ الىپ ىڭىلداپ، اسەرلەنىپ ۇيرەنىپ العان اتاقتى ءانشى – قازاقستاننىڭ حالىق ءارتىسى، مەملەكەتتىك سىيلىقتىڭ يەگەرى جۇسىپبەك ەلەبەكوۆتىڭ ەسىمى انسۇيەر حالقىمىزدىڭ جۇرەگىندە جاتتالعان، شەبەر ورىنداعان اندەرى ءالى كۇنگە رۋحاني باعا جەتپەس قۇندىلىققا اينالعانى حاق.

امىرە ءاندى ءبىر ورىنداعاننان كەيىن قايتالامايتىن بولسا، سول مەزەتتە ۇيرەنىپ الۋ انشىلەردىڭ پارىزى بولعان. ءانشى بۇگىن ءبىر انگە ادەمى ءيىرىم قوسسا، كەلەر جولى ورىنداعاندا تىپتەن تۇرلەندىرىپ، يمپروۆيزاتسيا قوسىپ وتىرعان. ءار كەزدە قۇبىلتىپ ورىندار ايگىلى ءانشىنىڭ ونەرىن ساف ءمولدىر قالپىندا قاعىپ الىپ، شەبەرلىكپەن ورىنداۋ جۇسەكەڭە العاشىندا وڭاي دا بولماعانى شىندىق.

جۇسىپبەك ەلەبەكوۆ ءومىر بويى قازاق ساحناسىندا ونەر كورسەتتى. تەك الپىستان اسقان شاعىندا شاكىرت تاربيلەلەۋگە بەت بۇردى. ول كىسىنىڭ ۇستازدىق جولىن باستاۋعا سول كەزدەگى رەسپۋبليكالىق ەسترادا-تسيرك ستۋدياسىن اشقان كوركەمسوز شەبەرى، قازاقستاننىڭ حالىق ءارتىسى گۇلجيھان عاليقىزى عاليەۆانىڭ ىقپالى ەرەكشە ەدى. جاڭا اشىلعان ستۋدياعا جۇسەكەڭمەن قوسا قازاقستاننىڭ حالىق ءارتىسى عاريفوللا قۇرمانعاليەۆتى دا شاقىرۋى تابىلعان اقىل ەدى.

جۇسەكەڭ ەسترادا-تسيرك ستۋدياسىندا ارنايى مەكتەبى اشىلىپ، شاكىرت تاربيەلەدى. جۇسەكەڭنىڭ الدىنان مادەنيەت ەشەكەەۆ، قايرات بايبوسىنوۆ، جانىبەك كارمەنوۆ، مۇراتبەك جۇنىسبەكوۆ، عالىم مۇحامەدين، امانگەلدى جىكەنوۆ، تۇرسىنعازى راحيموۆ، مارا ەسمۇحانوۆا، ساناق ابەۋوۆ، كەلدەنباي ولمەسەكوۆ، ماكەن مۇقىشەۆا، رايحان تەرگەنباەۆا، كلارحان جاناليەۆا، مىرزاحمەت مۇقامانوۆ، الماحان كەنجەبەكوۆا، حاسەن توپەەۆ، ءانۋزا نۇكسىنحانوۆا، دۇيسەكە دايىروۆ جانە كەنجەعالى تاشكەنوۆ سىندى شاكىرتتەر ءدارىس السا، سولاردىڭ ەڭ كەنجە شاكىرتى دە، ىزدەۋشى، ونەرىن ناسيحاتتاۋشى دا مەنمىن.

جۇسەكەڭنىڭ ءۇمىت ارتقان ءتول شاكىرتى، قازاقستاننىڭ ەڭبەك سىڭىرگەن ءارتىسى مىرزاحمەت مۇقامانوۆتىڭ دا بۇل جولعا تۇسۋىنە سەبەپشى بولعان جاندار بار.

العاش ويىمىزدى ءانشىنىڭ بالالىق شاعىنان باستاساق دەيمىن. مىرزاحمەت 1949 جىلى 23 ناۋرىز كۇنى قازىرگى الماتى وبلىسى جاركەنت اۋدانىنا قاراستى كيروۆ اتىنداعى كولحوزدىڭ ءالتىۇي دەگەن اۋىلىندا دۇنيەگە كەلگەن. اكەسى اۋىل سوۆەتتىڭ توراعاسى بولعان. اكەسى 85 جاسقا كەلىپ دۇنيەدەن وتسە، اناسى ءتورت جاسىندا مەزگىلسىز قايتىس بولادى. اناسى ديىرمەنگە بيداي الىپ بارا جاتقاندا ءىشىپ العان شوفەر شەشەسىنىڭ ات-ارباسىن سوعىپ، مەرت قىلادى. مىرزەكەڭنىڭ قوجاحمەت دەگەن اعاسى، شاياحمەت دەگەن ءىنىسى ەرتەرەكتە كوز جۇمدى. رابيعا، رايالار دا قايتىس بولدى. قازىر جاماش، ءجاميلا دەگەن اپايلارى بار.

اناسى قايتىس بولعان سوڭ مىرزاحمەت اكەسىنىڭ ۇلكەن اعاسى، جيىرما جاسىندا قاري مولدا بولعان ماۋكە دەگەن كىسىنىڭ قولىندا بولادى. مىرزاحمەتتىڭ اكەسى مەن ونىڭ اعاسى ماۋكە مايداننان امان-ەسەن كەلگەن سوڭ انالارى جالعىز سيىرىن سويىپ، «مەن باقىتتىمىن» دەپ توي جاساعان دەسەدى. مىرزاحمەت اتا-اجەسىنە ەركەلەپ ءوستى.

اتاقتى سۋرەتشى ءابىلحان قاستەەۆ قوي باققان شاقپاقتى دەگەن تاۋدىڭ ەتەگىندە ول دا قوزى باقتى. اتاسى «قالقانىڭ ءانىن» تاماشا ورىندايتىن. كۇي دە تارتاتىن.

مىرزاحمەت تاۋدىڭ باسىنا شىعىپ الىپ، ورمانعا قاراپ ءان سالاتىن. سوندا وگىز اربامەن قۇرلىسشىلار ءوتىپ بارا جاتادى. «كىم ەكەن، ءبىلىپ كەلشى» دەپ ماعان قاراي ادام جىبەرەدى. ومار دەگەن كىسى كەلىپ، «سەن كىمسىڭ؟ داۋىسىڭ الىسقا جەتىپ جاتىر عوي» دەپ تاڭعالىسقانى بار.

مىرزاحمەتتىڭ اناسى دا ءان سالعان كىسى ەكەن. ەرتەرەكتە قايتىس بولىپتى. «انام «وسى بالام ءبىر توبە، باسقالارى ءبىر توبە» دەپ وتىرۋشى ەدى» – دەپ ەسكە الادى ءانشى. اپايلارى جاماش پەن ءجاميلا دا ءان سالىپتى.

اكەسى ءبىر-ەكى جىل وتكەننەن سوڭ ءابىلحان قاستەەۆتىڭ ۇسەن دەگەن اعاسىنىڭ قىزى قايشانى ۇيگە الىپ كەلىپ، بالالارىمەن تانىستىرادى. ەكىنشى شەشەسى تۋماسا دا تۋعانداي قامقورشى بولىپتى.

مىرزاحمەت ەڭ العاش مەكتەپكە بارعان كەزىندە تۇردىكە دەگەن اعاي احمەت جۇبانوۆتىڭ «اق كوگەرشىن» دەگەن ءانىن ۇيرەتەدى. وسى ءان بولاشاق ءانشىنىڭ ونەر جولىنا جول اشتى. حالىقتىڭ «كوگارشىن» ءانىن جۇسەكەڭ ستۋدياعا تۇسكەن كەزدە ۇيرەتىپتى. بۇل ءاندى مىرزاحمەت ۇنەمى كونتسەرتتىك باعدارلاماسىندا ورىنداپ ءجۇردى.

بىردە مەكتەپكە باعداگۇل سۇلتانوۆا دەگەن مۇعالىم كەلىپ، بالالارعا كۇي ۇيرەتە باستادى، انسامبل اشتى. مىرزاحمەتكە «قوسالقا»، «ارىنعازى»، «كەڭەس» كۇيلەرىن ۇيرەتتى. اپاي مەملەكەت قايراتكەرى قۋانىش سۇلتانوۆ اعامىزدىڭ اپاسى بولاتىن.

بەسىنشى سىنىپتا مىرزاحمەت حوردى باسقاردى. اۋىلدا «ءانشى بالا» اتاندى. اتا-انادان بىردەي كەلگەن انشىلىك ونەر تىنىشتىق بەرمەدى. اكەسى «اققۇم»، «جيىرما بەس»، «قاناتتالدى، «قاراتورعاي» دەگەن اندەردى تامىلجىتا ورىندايتىن. ول كەزدە ماناربەك ەرجانوۆ، جۇسىپبەك ەلەبەكوۆ اعالار كونتسەرتپەن ءجيى كەلىپ، مىرزەكەڭنىڭ ۇيىندە قونا جاتىپ ءان سالعان ەكەن.

بىردە «مۇراگەر» انسامبلىمەن بىرگە بەكبولات تىلەۋحانوۆ پەن ءابدىلحاميت رايىمبەرگەنوۆ كونتسەرتپەن كەلىپ، ءبىزدىڭ ۇيدە قوناق بولدى. اكەمنىڭ اندەرىن تىڭداپ، تاڭعالىستى. «باسە، ءان وسى كىسىدەن شىققان ەكەن-اۋ» دەپ، اكەمنىڭ ونەرىن مويىندادى.

بىردە بالاڭ ءانشى مەكتەپتەن كەلسە راديودان ءبىرجاننىڭ «جامباس سيپار» ءانى شىرقالىپ جاتىر ەكەن. ۇيىپ تىڭداي بەردى. اكەسىنە «مىنا انشىدە ارمان بار ما ەكەن؟ مەن دە وسكەندە ءانشى بولعىم كەلەدى» دەپ ءوزىنىڭ ويىن ءبىلدىردى. اكەسى بۇل ءانشىنىڭ جۇسىپبەك ەلەبەكوۆ ەكەنىن، تالاي رەت ۇيدە قوناق بولعانىن ايتتى. وسىدان باستاپ بار ارمانى جۇسەكەڭدى كورۋ بولدى.

مەكتەپ بىتىرگەن سوڭ مىرزاحمەت ءۇش ايلىق تراكتورشىلار كۋرسىنا وقۋعا ءتۇسىپ، تراكتور، كومباين ايدادى. تراكتوردا وتىرىپ ءان شىرقادى. اۋىلشارۋاشىلىعىنا ءوز ۇلەسىن قوستى. قولمەن شالعى شاۋىپ، ءشوپ جينادى. ءسويتىپ جۇرگەندە اسكەر قاتارىنا ىلىكتى. اسكەري بورىشىن وتەپ جۇرگەن كەزىندە دە اننەن قول ۇزگەن جوق. ۇنەمى ءان قاناتىندا سامعادى. اسكەردەن امان-ەسەن اۋىلعا كەلىپ، شارۋاشىلىققا ارالاسا باستاعاندا الماتىدان جانسەيىت ساۋرانباەۆ دەگەن جىگىت كەلىپ، «مىرزاحمەت، سەنىڭ ونەرىڭدى ەستىپ جاتىرمىز، ءجۇر، دانەش راقىشەۆ دەگەن اعاڭ بار، سول كىسىگە كورىنسەيشى، سەن سياقتى انشىلەر جوق، تەاترعا بارايىق» دەگەن سوڭ ءبىر شەشىمگە كەلىپ، جانسەيىتكە ەرىپ كوكتالداعى حالىق تەاترىنا كەلەدى.

بۇل حالىق تەاترىن سوۆحوز ديرەكتورى ءازتاي ەرساليەۆ اشىپ بەرگەن ەكەن. سول جەردە دانەش اعامىز كوركەمدىك جەتەكشى بولىپ قىزمەت ەتەدى ەكەن. مىرزاحمەت دانەش اعا جوقتا باتتال دەگەن بايانشى كىسىمەن ءان ايتۋعا دايىندالىپ العان. ەرعالي نايمانتاەۆ دەگەن كىسى بار ەكەن. قازىرگى اسقار نايمانتاەۆتىڭ اكەسى. دانەش اعانى ۇستاز تۇتقان ادام ەدى. دانەش اعا ايەلىمەن بولمەگە كىرىپ كەلدى. «بوتەن بالا قايدان ءجۇر؟ – دەپ ەدى، جانسەيىت «ءسىزدىڭ اۋىلدىڭ بالاسى، ءانىن تىڭداپ كورىڭىز!» دەدى. «قانداي ءان ايتاسىڭ؟» دەپ، دانەش اعا سۇراپ جاتىر. ول قىرعىزدىڭ «تاۋلار» دەگەن ءانىن ايتاتىنىن ايتتى. تاعى ەكى-ءۇش ءان ورىنداپ بەردى. «مىناۋ ناعىز ءانشى ەكەن عوي» دەپ، داكەڭ ۇناتىپ قالدى. ينەرباەۆ دەگەن تەاتر رەجيسسەرى بار ەدى، ول كەلىپ قالىپ «تەاترعا الساق الايىق، جالاقىسى وتىز سوم» دەگەندە مىرزاحمەت ءسال ويلانىپ قالادى. «كومبايىندا ءۇش ءجۇز سوم الۋشى ەدىم، بۇل قالاي بولادى ەكەن» دەگەن وي كەلەدى. ونەر ءۇشىن ازعا قاناعات ەتىپ، حالىق تەاترىندا ءبىر جارىم جىل قىزمەت ەتەدى.

ءبىر كۇنى دانەش اعانى تالدىقورعاننىڭ وبلىستىق فيلارمونياسىنا انشىلىككە شاقىرادى. مىرزاحمەت بولسا اۋىلعا قايتادى. تاعى ءبىر جارىم جىل مەكتەپتە ءان ساباعىنان ءدارىس بەرەدى. جازدا الماتىداعى چايكوۆسكي اتىنداعى مۋزىكا ۋچيليششەسىنە تۇسۋگە كەلسە، دومبىرامەن ءان ايتقانداردى المايمىز دەپ قايتارىپ جىبەرەدى. كەلەسى جىلى گازەت بەتىندەگى جارنامانىڭ ارقاسىندا ماسكەۋدەگى ششەپكين ۋچيليششەسىنە تۇسپەككە الماتىداعى مادەنيەت مينيسترلىگىنىڭ كادرلار بولىمىنە كەلەدى. كادرلار ءبولىمىن باسقاراتىن عاپپاروۆ دەگەن كىسى «بالام، ماسكەۋدە نە بار، ودان دا ەسترادا ستۋدياسىنا تۇسسەڭشى» دەپ باعىت-باعدار بەرەدى.

قازاقستاننىڭ حالىق ءارتىسى عاريفوللا قۇرمانعاليەۆ ونەرلى جاستاردى ءۇش كۇن بايقاۋعا دايىندايدى. جامبىل اتىنداعى مەملەكەتتىك فيلارمونيادا بايقاۋ ءجۇرىپ جاتىر ەكەن. ادىلقازىلار القاسى مىرزاحمەتتى تىڭداپ، نەگىزگى شەشىم قابىلداۋشى، ستۋديانىڭ ديرەكتورى گۇلجيھان عاليەۆا «سەنى بىردەن ستۋدياعا قابىلدايمىز، ءتىپتى «قازاقكونتسەرتكە» بىردەن ءانشى ەتىپ قابىلداسا دا بولادى» دەيدى. كوپشىلىكتىڭ ىشىندە وتىرعان عاريفوللا قۇرمانعاليەۆ اعامىز «ستۋديادا وقىپ، قورجىنىن انگە تولتىرسىن، ودان دا كوبىرەك ۇيرەنسىن» دەپ اقىل قوسادى. مىرزاحمەت مۇقامانوۆ ستۋدياعا تۇسكەننەن سوڭ عارەكەڭ «جۇسىپبەك بۋرابايدا دەمالىپ جاتىر، مەن سەنى وزىمە الايىن دەسەم، جۇسەكەڭ قۋانسىن دەپ وعان بەرمەكشىمىن» دەپ اعىنان جارىلادى. جۇسەكەڭ مەن عارەكەڭنىڭ دوستىعى ەرەكشە ەدى.

جۇسىپبەك ەلەبەكوۆتى مىرزاحمەتتىڭ العاش كورۋى اسەرلى ەدى. ەسىكتەن سۇستى ادام كىرىپ كەلەدى. ۇستەلدىڭ باسىنا وتىرىپ، شاكىرتتەرىمەن تانىسا باستايدى:

– سەن قايدان كەلدىڭ؟ – دەپ مىرزاحمەتتەن سۇرايدى. –جاركەنتتەنمىن – دەپ جاۋاپ بەرەدى ول.

– ە، باياعىدا ونەر ساپارىندا جۇرگەندە وگىز ارباسىن بەرمەگەن ەلدەن ەكەنسىڭ عوي، – دەپ سىناي قارادى. شاكىرت ىڭعايسىزدانىپ قالادى. قازاقستاننىڭ ءار تۇكپىرىنەن كەلگەن شاكىرتتەردىڭ ىشىندە تۇرسىنعازى راحيموۆ، عالىم مۇحامەدين، ءانۋزا نۇكسىنحانوۆا، حاسەن توپەەۆ، مارا ەسمۇحانوۆا سىندى بولاشاق انشىلەر دە بار ەدى.

وسىدان باستاپ جاڭا وقۋ جىلى باستالادى. جۇسەكەڭ ءاندى از ۇيرەتەتىن. ءبىر كۇنى مىرزاحمەت ۇستازىنا: – اعاي، ءسىز ءبىر ءاندى قايتالاتا بەرەسىز. جاڭا ءاننىڭ كوبىن عالىمنان (مۇحامەدين) ۇيرەنىپ ءجۇرمىز، – دەپ وكپە-نازىن ايتادى. ۇستاز تىكسىنىپ قالادى. كەلەسى كۇننەن باستاپ جاڭا ءاندى كوبىرەك ۇيرەتە باستاعان ەكەن. ارينە، جۇسەكەڭ ءاندى سەزىممەن، ءتۇسىنىپ ورىنداعاندى باعالايتىن. قانشا دەگەنمەن ەسەيىپ قالعان مىرزاحمەت ۇستاز ۇيرەتكەن اندەردى ناشىنە كەلتىرىپ ورىنداپ، جوعارى نوتانى ەركىن الاتىن دارەجەگە جەتتى. بارا-بارا سۇيىكتى شاكىرتىنە اينالدى.

داۋىسى بيىك تەنور بولعاندىقتان مىرزاحمەت مۇقامانوۆتىڭ داۋىسىن ۇستازى امىرەنىڭ داۋىسىنا ۇقساتاتىن. كەيىن ساحنا شەبەرلەرىنە «امىرەنىڭ ورنىن باساتىن ءانشى» دەپ ايتا ءجۇرىپ، جۇسەكەڭ ۇلكەن جيىندارعا ەرتىپ تە جۇرەتىن بولىپتى.

1974 جىلى ونەر زەرتتەۋشىسى جارقىن شاكارىم 1925 جىلى پاريج ساحناسىندا ءان شىرقاعان امىرەنىڭ داۋىسىن تابادى. العاش ۇستازى ەستىگەندە كوزىنە جاس الىپ: – ولگەنىمىز ءتىرىلىپ، وشكەنىمىز جاندى-اۋ، – دەپ تەبىرەنسە كەرەك.

جۇسەكەڭنىڭ شاكىرتتەرى عىلىم اكادەمياسىنا بارىپ، امىرەنىڭ داۋىسىن ۇستازىمەن بىرگە تىڭدايدى. امىرەنىڭ داۋىسى اركەز قۇلاعىندا تۇراتىن مىرزاحمەت اتاقتى ءانشىنىڭ ورىنداۋىنداعى اندەردى شەبەر ورىنداۋعا ماشىقتانادى.

1980 جىلعى رەسپۋبليكالىق امىرە اتىنداعى بايقاۋدىڭ باس جۇلدەسىن قانجىعاسىنا بايلاۋى، «ءان اتاسى – امىرە» فيلمىنە مىرزاحمەتتىڭ ورىنداۋىنداعى ءبىرجاننىڭ «جانبوتا» ءانىنىڭ الىنۋى – امىرە ۇنىمەن ساباقتاستىعىندا بولسا كەرەك.

1973 جىلى ستۋدياعا ءتۇسىپ، 1975 جىلى بىتىرگەن مىرزاحمەتتىڭ وقۋ مەرزىمىنىڭ كەزەڭى دە امىرە داۋىسىنىڭ تابىلعان ۋاقىتىمەن استاسىپ جاتىر. ول ستۋديا قابىرعاسىندا جۇرگەندە ايكەش مۇقاشەۆاداي ءانشى قىزبەن سىرلاسىپ، جازعى گاسترولدا ەل ارالاپ، جۇپتارى جازىلمايدى، باس قوسادى. وقۋ بىتىرگەن سوڭ تالدىقورعان وبلىستىق فيلارمونياسىنا جولداما الدى. ءبىرجان، جاسۇلان ەسىمدى ۇلدار دۇنيەگە كەلدى. ءبىرجانى بەرتىندە دۇنيە سالدى.

1978 جىلى مىرزاحمەت مۇقامانوۆ بىشكەكتە وتكەن حالىقارالىق بايقاۋدىڭ لاۋرەاتى بولدى. سول جولى اكىمشىلىك ءۇش بولمەلى پاتەر بەردى. جولداستارى ءبىر جىلقى مىنگىزدى. ءان قۇدىرەتى دەگەن وسى بولار!

1993 جىلى «دوستىق كوپىرى» دەگەن جوبانىڭ ناتيجەسىندە شەتەلگە بارعان ساپارىندا ەدىل قۇسايىنوۆ ەكەۋى كوشەگە شىعادى. ەلگە تەلەفون شالعان كەزىندە مىرزاحمەت مۇقامانوۆ قازاقستاننىڭ ەڭبەك سىڭىرگەن ءارتىسى اتاعىن العانىن ەستيدى. ساحنادا ون سەگىز جىل ەڭبەك ەتىپ، جەر-جەردى تىنباي ارالاپ، قازاق ونەرىن تىڭداۋشىسىنا جەتكىزگەن ءانشى اتاق العانىن ەستىگەندە ەڭىرەپ جىلاپ جىبەرگەن ەكەن. ءبىر جاعىنان قۋانعانى، ەكىنشى جاعىنان كورگەن قيىندىعى، قاعاجۋلارى ەسىنە تۇسسە كەرەك. ادال ەڭبەكتىڭ باعاسى ەكەنىن دە ءتۇسىندى.

مىرزاحمەت مۇقامانوۆ كەيىن ءىلياس جانسۇگىروۆ اتىنداعى ۋنيۆەرسيتەتتىڭ مۋزىكا فاكۋلتەتىندە ءان ساباعىنان ءدارىس بەردى. ارايلىم راحيموۆا، بەيبىتكۇل بىرىمعوجينا، قۇرالاي شاياحمەتوۆا، نۇرجان جانپەيىسوۆ سىندى انشىلەردى ساحناعا دايىندايدى.

ءومىرىنىڭ قىرىق جىلدان استام ۋاقىتىن قازاق ونەرىنە ارناپ، امىرەنىڭ جولىن قۋىپ، امىرەنىڭ شاكىرتى جۇسىپبەك ەلەبەكوۆكە شاكىرت بولا بىلگەن مىرزاحمەت مۇقامانوۆ ءوز ماقساتىنا جەتكەن باقىتتى انشىلەرىمىزدىڭ ءبىرى ءارى بىرەگەيى. بالا كەزىنەن ەستىگەن ارقا اندەرىمەن سۋسىنداپ، وسى اندەردى ءان قورجىنىنان تۇسىرمەي، اسقاق اندەردەن بويىنا قۋات العان، دانەشتەي جەتىسۋ اندەرىنىڭ شەبەر ورىنداۋشىسىنان ەل بىلمەيتىن تاماشا اندەردى ۇيرەنگەن، ارىندى اسەت اندەرىنەن شىعارماشىلىعىنان شابىت العان، كەيىن ءوزى دە جانىنان ءان شىعارعان ارقالى ءانشى ءارى سازگەر مىرزاحمەت مۇقامانوۆ بۇگىندە جەتپىستەن استى. سوڭىنان ەرگەن ءبىرجان مەن جاسۇلان دا جاپ-جاقسى ءانشى. بىراق اكە جولىن قۋمادى.

سوناۋ سارىارقادان جەتىسۋعا كەلىن بولىپ تۇسكەن ايكەش مۇقاشەۆا ءومىر بويى جارىمەن بىرگە ساپارلاس بولىپ، ادەمى قوڭىر داۋىسىمەن تىڭداۋشىسىن تامساندىردى. ومىردە دە، ونەردە دە بىرگە جۇبىن جازباعان ولار حالىق ونەرىنە تەڭىزدىڭ تامشىسىنداي بولسىن، ءوز ۇلەستەرىن قوستى. سانالى ءومىرىن تەك قانا كيەلى ونەرگە ارناعان جانى جايساڭ، اينالاسىنا انىمەن، كوركەم مىنەزىمەن شۋاق شاشا بىلگەن انشىدە ارمان بار ما؟!

بۇل ماقالا مەنىڭ ونەر جايلى جيناعىما شىققان ەدى. جۇسەكەڭنىڭ دارىندى شاكىرتىنىڭ ءبىرى مىرزاحمەت اعامىز دا ومىردەن ءوتىپتى. اللا الدىنان جارىلعاسىن!

التىن يمانباەۆا

قازاقستاننىڭ ەڭبەك سىڭىرگەن قايراتكەرى

Abai.kz