ەندى كوۋچتار ازاماتتارعا پسيحولوگيالىق قىزمەت ۇسىنا المايدى. ءتيىستى زاڭ جوباسى ءماجىلىستىڭ ءبىرىنشى وقىلىمىندا ماقۇلداندى. ارنايى رەەستر قۇرىلماق. وعان ديپلومى جوق ماماندار قوسىلا المايدى. پسيحولوگتارعا تاعى قانداي تالاپتار قويىلادى؟ ونى ورىنداماسا، قانداي جازا قاراستىرىلماق؟ 

«باقىتتى ءومىر ءسۇرۋدى ۇيرەتەمىن! ۋايىم-قايعىڭدى ۇمىتاسىڭ!». جالعان كوۋچتاردىڭ جەلىدە قاپتاعان جارناماسىن ەندى كورمەيسىز. ديپلومسىز پسيحولوگتاردىڭ ءداۋىرى اياقتالدى. كاسىبي ستاندارت ەنگىزىلەدى، ارنايى رەەستر  قۇرىلادى. وعان تەك جوعارى نە ارناۋلى ءبىلىمى بار ماماندار قابىلدانباق.

اسحات ايماعامبەتوۆ، قر پارلامەنتى ءماجىلىسىنىڭ دەپۋتاتى:

ەگەر اسپاز ادامدى ۋلاپ قويسا، مەيرامحانا جابىلادى، جاۋاپكەرشىلىك بار، ءىس قوزعالادى. ال ەگەر اتالعان پسيحولوگ ادامنىڭ تاعدىرىن، ءومىرىن تاس-تالقان ەتسە شە، كىم وعان جاۋاپتى؟ ەندى پسيحولوگتاردىڭ اشىق ءارى ناقتى رەەسترى بولادى. پسيحولوگ پەن پسيحياتر دارىگەردىڭ اراسىنداعى ايقىن شەكارا اجىراتىلادى. كاسىبي قۇپيانى ساقتاۋ مىندەتى دە ەنگىزىلەدى. 

رەەسترگە ەنبەسە دە، ءوزىن پسيحولوگ رەتىندە تانىستىرىپ، كۋرس ساتقاندار الاياقتىق بابى بويىنشا جازالانادى. ديپلومى بار ماماندار دا قايتا دايارلاۋ ساباقتارىنان ءوتىپ، كەمى بەس جىلدا ءبىر رەت ەمتيحان تاپسىرۋعا مىندەتتەلەدى. بۇدان بولەك، پسيحولوگتىڭ كەڭەسىنەن كەيىن كۇيزەلىس ۇدەي تۇسسە، سوتقا جۇگىنۋگە بولادى.

باقىتجان بازاربەك، قر پارلامەنتى ءماجىلىسىنىڭ دەپۋتاتى:

كەيبىر پسيحولوگتاردىڭ وزىنە قازىر پسيحولوگ كەرەك. وكىنىشكە قاراي، ونداي پسيحولوگتار ءوز كۋرستارىن ساتىپ جاتىر؟ ەگەر پسيحولوگيالىق كومەكتەن كەيىن ادامنىڭ جاعدايى ناشارلاسا، رەەستردەن تەك الىپ تاستاماۋ كەرەك، ازاماتتىڭ شىعىنىن مورالدىك زيانىن وتەۋ كەرەك.

دەپۋتاتتىڭ بۇل ۇسىنىسى ەكىنشى وقىلىمدا قارالماق. وقىماعان پسيحولوگتاردىڭ دەنساۋلىققا قاتەر توندىرەتىنى تۋرالى عىلىمي ساراپتاما دا بار. الەمگە ايگىلى PlusCare پلاتفورماسى Tikتok-تان 500 ونلاين-كونسۋلتاتسيا تاڭداپ الىپ، زەرتتەۋ جاساعان. ناتيجەسىندە كونتەنتتىڭ 84 پايىزى قاۋىپتى ەكەنى انىقتالدى. ءبىرى پسيحوتەراپەۆتىڭ كەڭەسىن الماي تۇرىپ ءدارى جازىپ بەرسە، ەندى ءبىرى اسا كۇردەلى تەراپيالاردى قاشىقتان جاساعان. زاڭ جوباسىندا وسى ماسەلە دە ەسكەرىلدى. ەندى ەم تاعايىنداعان پسيحولوگتار قىلمىستىق جاۋاپكەرشىلىككە تارتىلۋى مۇمكىن.

Abai.kz